Moskvada 3 nəfərin ölümü ilə nəticələnmiş avtomobil qəzasının üstü açılıb. Virtualaz.org xəbər verir ki, afrikalı nazir qızının törətdiyi bu qəzada ölənlərdən biri azərbaycanlıdır. Qəzaya düşən maşını isə nazir qızına başqa azərbaycanlı veribmiş.

2010-cu ildə baş vermiş bu səs-küylü qəzanın kim tərəfindən və necə törədildiyi barədə istintaq artıq yekunlaşıb. Həmin əhvalat barədə “Moskovskiy Komsomolets” qəzeti yazır. Müstəntiqlər qəzanı kimin törətdiyini “Zoluşka” nağılında olduğu kimi, maşında qalan qırmızı tufli vasitəsilə aça biliblər.

Bildirilir ki, sözügedən qəza 2010-cu ilin payızında Moskvanın Lenin prospektində baş verib. İçərisində Rusiya Xalqlar Dostluğu Universitetinin tələbələri olan “Yaguar S-Type” avtomobili yüksək sürətlə hərəkətdə olarkən işıq dirəyinə dəyib. Avtomobildəki dörd nəfərdən üçü yerindəcə ölüb, möcüzə sayəsində Qana Respublikasının vətəndaşı, atası bu ölkənin yüksək rütbəli diplomatı və naziri olan Lina Ahmed sağ qalıb.



Əslində isə istintaq müəyyən edib ki, avtomobili idarə edən də Lina olub. Lakin 3 nəfərin öldüyü qəzadan sonra o, hadisə yerinə gələn polislərə bildirib ki, sükan arxasında yox, sərnişin kreslosunda oturmuşdu. Polislər buna inanaraq Linanı buraxıblar, sonradan onun yalan dediyi üzə çıxanda isə artıq gec olub. Məlum olub ki, Lina artıq Rusiyada yoxdur.

Qəzetin yazdığına görə hadisə Hellouin bayramı günündə, oktyabrın 30-da baş verib. Universitetin tələbələri, Qvineya-Bisaudan olan Osvaldo Korreya, qanalı Bernard Antvi-Boasikao, azərbaycanlı Elbrus Seyidov və Lina Ahmedin olduğu kampaniya yaxşıca əylənib.

Gecə yarısı Lina əyləncəni davam etdirmək üçün bara getməyi təklif edib. Dəbdəbəli “Yaguar”ı isə ona azərbaycanlı tanışı Orxan İsmayılov verib. Lakin afrikalı qıza maşını idarə etmək üçün etibarnamə verməyi “unudub”. Bu cür xırda məsələ isə afrikalını narahat etməyib. Axı onun vətənində qayda-qanunla maşın sürən kimdir? Hər il Qanada avtomobil qəzalarında 2 mindən çox adam ölür. Üstəlik Linanın atasının diplomatik immuniteti var. Onun atası Mustafa Ahmed yüksək rütbəli diplomatdır, ölkəsinin əsas nazirliklərindən birinin rəhbəridir. Azərbaycanlı anası Sabina isə biznesvuməndir. Linanın atası da vaxtilə Moskvada oxuyub.

Ərköyün afrikalı balası Lina ziyafət paltarında və dikdaban qırmızı tuflidə “Yaguar”ın sükanı arxasına keçir. Yanında Osvaldo oturur, Bernard və Elbrus isə arxa oturacaqda əyləşirlər. Lina qaza basan kimi “Yaguar” komet kimi şığıyır. Gecə saat 1.40 olduğu üçün küçələr boş olur, ancaq “Yaguar” yolda idarəetməni itirir və saatda 91 kilometr saat sürətlə işıq dirəyinə çırpılır. Sürücü möcüzə sayəsində sağ qalır, sürücü tərəfin qapısı yerindən çıxır və zərbə Linanı qazonun üstünə atır. O, yüngül sıyrıqlarla canını qurtarır, üç tanışı isə yerindəcə ölür.



Lina əvvəlcə özünü itirir, ancaq dərhal başına möhtəşəm ideya gəlir: “Yaguar”ın sürücüsü kimi artıq ölmüş dostu, qvineyalı Osvaldonu qələmə versin. Axı ölüdən kim nə soruşub dəqiqləşdirə bilər? Qanalı nazir qızı tanışı Orxana zəng edir. Orxan afrikalı dostu ilə Linanın köməyinə gedir, hadisə yerinə polislər də gəlir. Lina göz yaşları içində polisləri əmin edir ki, sükan arxasında Osvaldo idi, Orxan və digər afrikalı isə bir ağızdan bunu təsdiq edirlər, Osvaldonun sükan arxasında olduğunu öz gözləri ilə gördüklərini deyirlər.

Bəlkə də Linanın danışdıqlarına hamı inanardı. Ancaq Zoluşka kimi qırmızı tuflisinin birini maşında, sürücü kreslosunun altında unutmasaydı. Daha sonra ekspertiza araşdırır ki, gombul Osvaldo heç sürücü kreslosuna yerləşməzmiş. Çünki sürücü kreslosu sükana çox yaxın nizamlanıb və onun ölçülərinə uyğun olmayıb. Nəhayət ekspertiza maşını Linanın idarə etdiyini sübuta yetirir.



Ancaq gec olur. Lina elə qəzanın ertəsi günü atasının diplomatik əlaqələrindən istifadə edərək Rusiyanı tərk edir. Moskvada isə onun barəsində 5 maddə üzrə iş qaldırılır. 2011-ci ildə afrikalı nazir qızı beynəlxalq axtarışa verilir və nəhayət İnterpol müəyyən edir ki, o, Qananın paytaxtı Akkrada yaşayır. Lakin Rusiya ilə Qana arasında qarşılıqlı ekstradisiya haqda razılaşma olmadığından onun Rusiyaya təhvil verilməsi mümkün deyil. Hazırda Rusiya hüquq-mühafizə orqanları Linanın Qanada həbs olunmasına çalışır.