Azərbaycan bu ilin əvvəlindən etibarən Gürcüstana belə görünür ki, əsl ticarət müharibəsi elan edib.

Virtualaz.org saytı özəl mənbələrinə istinadən xəbər verir ki, artıq bir aydır Gürcüstandan Azərbaycana “Borjomi” və “Likani” əmtəə nişanlı mineral sular gətirilmir. Qeyd edək ki, “Borjomi” sularının Azərbaycana idxalını “Aqua Line LTD” şirkəti həyata keçirirdi. Amma bu şirkət Xocalı prospekti, 55 ünvanında yerləşən “AGA Centre” biznes-mərkəzində icarələdiyi ofisini bir müddət öncə boşaldaraq oranı tərk edib. Şirkətə məxsus telefonlara da heç kim cavab vermir.

“Borjomi” şirkətinin mərkəzi ofisindən virtualaz.org saytının müxbirinə bildiriblər ki, Azərbaycanın gömrük orqanları “Borjomi” mineral suları ilə dolu yük maşınlarını bir aydan çoxdur ölkəyə buraxmır. Yük maşınlarının gömrük-keçid məntəqələrində saxlanılmasına belə bir formal səbəb göstərilir ki, həmin məhsulları müşayiət etməli olan, habelə həmin suların keyfiyyətini təsdiqləyən, onların təhlükəsizliyinə zəmanət verən zəruri sənədlər yoxdur. Azərbaycan tərəfindən isə bildirilib ki, onlar bu məhsulları ölkəyə buraxmağa hazırdırlar, lakin həmin məhsullar gömrük tələblərinə cavab vermir.

Qeyd edək ki, ötən 2013-cü ildə Azərbaycanda 7 milyon şüşə “Borjomi” mineral suyu satılıb.

“Borjomi” şirkətinin Tiflis ofisindən isə virtualaz.org saytının əməkdaşına bildiriblər ki, şirkətin nümayəndəliyi Bakıda son vaxtlar sıxışdırılır. Gürcüstanın Sərhəd Xidmətindən Azərbaycan tərəfinin bu addımlarının nə ilə bağlı olduğunu hələ də aydınlaşdırıb izah edə bilmədiklərini bildiriblər. Yeri gəlmişkən, Azərbaycanın Dövlət Gömrük Komitəsi də bu məsələ ilə bağlı hansısa tutarlı səbəb göstərə, vəziyyətə izah verə bilmir.

Azərbaycan Səhiyyə Nazirliyinin Sanitar-Karantin Mərkəzindən isə bildiriblər ki, bu qurumun “Borjomi” mineral sularının keyfiyyəti ilə bağlı hər hansı iradı yoxdur: “Ən azı əvvəl gətirilən məhsullarla bağlı heç bir problemin olmadığını deyə bilərik. Sonra gətirilən məhsulları isə hələ yoxlamamışıq”.

Bundan əlavə, araşdırmalarımız zamanı onu da öyrəndik ki, Gürcüstanın digər məhsullarının da Azərbaycana idxalında ciddi problemlər yaranıb. Müxbirimizin şəhərin iri supermarketlərində apardığı sorğu nəticəsində bəlli olub ki, bu ilin əvvəllərindən etibarən onlar Gürcüstandan gətirilən ət, “İveriya” əmtəə nişanlı sosiskalar, “Borjomi” və “Likani” ticarət markalı mineral sular almırlar. Hazırda gürcü mineral sularından yalnız “Nabeqlavi” gətirilir. Onu da öyrənmək mümkün oldu ki, paytaxtın restoranları və şadlıq evləri də “Borjomi” qıtlığı çəkir.



Market sahiblərindən biri virtualaz.org saytının müxbirinə deyib ki, dünəndən etibarən kiçik bir partiya “Borjomi” suyu tapa bilib. Amma həmin məhsul 10 qəpik baha başa gəlib - onun şüşəsi 60 qəpikdən 70 qəpiyə qalxıb.

“Görünür, ona görə belədir ki, burada “Borjomi”nin və digər gürcü məhsullarının Azərbaycana idxalına nəzarət etmək uğrunda əsl müharibə gedir. İnhisarçılar öz aralarında dil tapıb anlaşan kimi hər şey qaydasına düşəcək” - deyə iş adamı yaranan durumu şərh edib.

Azad İstehlakçılar Birliyinin (AİB) sədri Eyyub Hüseynov də öz növbəsində belə hesab edir ki, “Borjomi” mineral suyu ətrafında yaranan bu böhranlı vəziyyət inhisarçıların rəqabəti ucbatından yaranıb.

“Amma o da ola bilər ki, bu vəziyyət Azərbaycan hökumətinin məqsədyönlü siyasətinin nəticəsidir. Ola bilsin ki, Gürcüstan tərəfi Azərbaycanın hansısa məhsulunun öz ərazisindən tranzitini qadağan edib deyə rəsmi Bakı da gürcü tərəfini belə cəzalandırmaq qərarı verib. Amma biz belə bir siyasəti heç bir halda dəstəkləmirik və hesab edirik ki, istehlakçıların geniş seçim hüququ və imkanları olmalıdır. Məsələn, 4 il əvvəl Gürcüstandan Azərbaycana saxta “Borjomi”lər gətirilirdi. Amma sonradan bu məsələ də həll olundu. Son illər bununla bağlı şikayətlər yoxdur” deyə AİB sədri bildirdi.