«Ən pis məmur» Əli Həsənov, «ən pis deputat» Arif Əşrəfov, «ən pis siyasətçi” Fazil Mustafa və digər «pislər»…

gundemxeber.az Hər kəsin «ilin ən yaxşıları»nı müəyyən etdiyi bir vaxtda, 2012-ci ilin yekunları ilə bağlı növbəti sorğusunun nəticələrini açıqlayan «Söz» Analitik Araşdırma Bürosu «ilin ən pisləri» ilə bağlı araşdırma nəticələrini təqdim edib. Bürodan ötürülən xəbərlərdən aydın olur ki, əsasən ölkənin 4 ən iri şəhərinin sakinləri arasında keçirilən sorğunun nəticələrində həm ilin «ən pis deputatını» və həm də digər kateqoriyalar üzrə ən pisləri müəyyən ediblər.
Onu da bildirək ki, bu sorğu nəticələri 4 iri şəhərdə 2000 respondent arasında keçirilib. Beləliklə, nəticələrlə tanış ola bilərsiniz. Respondentlərin böyük əksəriyyətinin qənaətinə görə, «ilin ən pis nazirliyi» təhsil nazirliyidir. Belə ki, rəyi öyrənilənlərin tam olaraq 68 faizi cənab Misir Mərdanovun rəhbərlik etdiyi nazirliyin fəaliyyətindən narazı qalıb. Bildirək ki, respondentlər rəy bildirərkən həm fəaliyyətsizliyi və həm də fəaliyyətdəki bərbadlığı arqument kimi irəli sürüblər. Digər nəticələr isə aşağıdakı kimidir:
2. Sənaye və Energetika Nazirliyi - 20,3 %;
3. Ekologiya və Təbii Sərvətlər Nazirliyi - 10,6 %;
4. Fərqli cavablar - 1,2 %.
Sorğuya qatılanların rəyinə görə isə «ilin ən pis deputatı» adına İqbal Məmmədov layiq görülüb. Ola bilsin ki, burada İqbal Məmmədovla bağlı mətbuatda daha çox tənqidi yazıların yer alması mühüm əhəmiyyət daşıyıb. Sorğu iştirakçılarının 47,3 faizinin qənaəti bu nəticəni ərsəyə gətirib. Digər nəticələr isə belədir:
2. Arif Əşrəfov - 55 saylı Xaçmaz seçki dairəsi - 26,8 %;
3. Ərəstun Cavadov - 87 saylı Ağsu-İsmayıllı seçki dairəsi - 14,6 %;
4. Tahir Rzayev - 82 saylı Ağcabədi seçki dairəsi - 10,1 %;
5. Fərqli nəticələr - 1,2 %.
Sorğu iştirakçıları «ilin ən pis ali məktəbi» adına isə Bakı Biznes Universitetini layiq görüblər. Bildirək ki, bu seçimi edərkən həm təhsilin səviyyəsinin arzuolunan həddə olmaması və həm də ki, ali məktəblə bağlı mətbuatda mənfiyə doğru yazıların üstünlük təşkil etməsi faktları respondent rəylərinə mühüm təsir göstərib. 4 iri şəhərin - Bakı, Gəncə, Sumqayıt və Mingəçevirin sorğuya qatılan sakinlərinin 56,2 faizinin qənaətinə görə, məhz Bakı Biznes Universiteti «ilin ən pis ali məktəbi» hesab olunur. Digər nəticələr isə aşağıdakı kimidir:
2. «Təfəkkür» Universiteti - 21,3 %;
3. Sumqayıt Dövlət Universiteti - 16,7 %;
4. «Odlar Yurdu» Universiteti - 5,1%;
5. Fərqli nəticələr - 0,7 %.
«İlin ən pis məmuru» məsələsində isə sorğu iştirakçılarında o qədər də yekdillik müşahidə olunmayıb. Belə ki, respondentlərin bu məsələdə fikirləri haçalandığından səs faizləri arasında da böyük uçurum olmayıb. Amma ilk yerdə təhsil naziri Misir Mərdanovun adı gəlir ki, bu da əvvəlki sorğu nəticələrindən də hasil olan bir qənaət kimi diqqətə gəlməkdədir. Belə ki, rəyi öyrənilənlərin 26,8 faizinə görə, məhz təhsil nazirimiz «ilin ən pis məmuru» hesab olunur. Digər nəticələr isə belədir:
2. Əli Həsənov - Prezident Administrasiyasının şöbə müdiri - 23,5 %;
3. Nazim İbrahimov - Diasporlarla iş üzrə Dövlət Komitəsinin sədri - 20,2 %;
4. Kərəm Həsənov - Əmlak Məsələləri üzrə Dövlət Komitəsinin sədri - 19,6 %;
5. Fərqli nəticələr - 9,9 %.
Sorğuya qatılanların ümumi rəyinin nəticələrinə görə «ilin ən pis partiyası» adını isə maraqlıdır ki, Milli İstiqlal Partiyası alıb. Ola bilsin ki, cəmiyyətin bu partiyadan daha çox nəticə gözləməsi, amma bunu ala bilməməsi Etibar Məmmədovun liderlik etdiyi təşkilatı bu nominasiyada birinci yerə çıxarıb. Respondentlərin 61 faizinin qənaətinə görə, AMİP «ilin ən pis partiyası»dır. Digər nəticələrdə isə fərqli qənaətlər var:
2. Demokrat Partiyası - 25,2 %;
3. Ana Vətən Partiyası - 11,4 %;
4. Yeni Azərbaycan Partiyası - 1,3 %;
5. Fərqli nəticələr - 1,1 %.
«İlin ən pis siyasətçisi» adının müəyyənləşməsində də sorğu iştirakçılarının əməlli-başlı «əziyyət çəkdiyi» müəyyən olunub. Belə ki, kifayət qədər fikir ayrılığının hiss olunduğu nəticələrlə bu adı alan Qurtuluş Partiyasının sədri Fazil Mustafa ilə ikinci yerdə adı gələn Bütöv Azərbaycan Xalq Cəbhəsi Partiyasının sədri Qüdrət Həsənquliyevin topladığı səs faizləri arasında cəmi-cümlətanı 0,6 faizlik fərq var. Beləliklə nəticələrlə tanış olun:
1. Fazil Mustafa - Milli Qurtuluş Partiyasının sədri - 34, 3 %;
2. Qüdrət Həsənquliyev - Bütöv Azərbaycan Xalq Cəbhəsi Partiyasının sədri 33,7 %;
3. Eldar Namazov - Azərbaycan Ziyalılar Forumu - 29,2 %
4. Fərqli nəticələr - 2,8 %.
Redaksiyadan: Bildirək ki, SAAB adından keçirilən sorğunun sosial bölümü ilə bağlı redaksiyamıza göndərilən nəticələri növbəti tarixlərdə diqqətinizə çatdıracağıq. Bizi izləməkdə davam edin…

«Xəbər xidməti»