Krasnoyarskdakı Azərbaycan diasporunun liderini öldürənlər Azərbaycan vətəndaşlarıdır

Rusiyanın Krasnoyarsk Vilayət Prokurorluğu tanınmış azərbaycanlı biznesmen, bu regiondakı Azərbaycan diasporunun liderlərindən biri olmuş Rafiq Məmmədovun qatillərinə qarşı irəli sürülmüş ittihamı təsdiq edib.
Prokurorluq iş adamını, onun sürücüsünü və mühafizəçisini güllələyən iki muzdlu qatilə - Azərbaycan vətəndaşlarına ömürlük həbs cəzası tələb edir. Məhkəmə tezliklə killerlərə hökm çıxarmalıdır.

R.Məmmədov 2009-cu il, aprelin 25-də bağ evinin yaxınlığında öldürülüb. Naməlum şəxslər onun “Volkswagen Touareg” avtomobilinə avtomatdan atəş açıblar. İş adamı başından yaralanıb, onu müşayiət edən “Jiquli”dəki iki nəfər də ağır yaralanıb və xəstəxanaya aparılarkən yolda keçiniblər.

İstintaq bu qətlin sifarişli olduğunu müəyyən edib. Lakin sifarişçinin kimliyini dəqiqləşdirmək mümkün olmayıb. Qətli törətmək üçün Azərbaycan vətəndaşları olan muzdlu qatillər Krasnoyarska Moskvadan gediblər. Qətli törətdikdən sonra onlar Moskvaya qayıdıb və gizləniblər.

2012-ci ildə killerlər saxlanılıb. Onların başqa qətllər də törətdiyi müəyyənləşdirilib. İstintaqın gəldiyi qənaətə görə, “naməlum sifarişçi” R.Məmmədovu borca görə əvvəlcə qorxutmaq istəyib, sonra onun qətlini sifariş edib.

Qeyd edək ki, R.Məmmədov Krasnoyarskda çox tanınmış iş adamı hesab olunurdu. Lakin əslən Şəmkir rayonundan olan və “Təkə” ləqəbi ilə tanınan bu iş adamının qruplaşması ilə Krasnoyarsk rayonunda biznes sahələrinə nəzarət uğrunda digər azərbaycanlı klanı, əslən Tovuzdan olan Oqtay Əhmədovun qruplaşması arasında uzun müddətdir qanlı hesablaşma gedirdi. Bu qarşıdurmada o vaxta qədər R.Məmmədovun bir qardaşı öldürülmüşdü, iki qardaşı yaralanmışdı.

Məmmədovların 6 qardaş olduğu məlumdur. Həmçinin Əhmədovlar klanı ilə qarşıdurmada hər iki tərəfdən bir neçə adam həlak olub.

Rusiya mətbuatının yazdığına görə, iki qruplaşma arasında düşmənçilik 90-cı illərin sonlarından başlayıb. Qanlı hesablaşma 2003-cü ildə pik nöqtəsinə çatıb. Tərəflər bir-birinin obyektlərini partladıb və yandırıblar. Oqtay Əhmədov həmin il avtomat silahla güllələnib, həmçinin R.Məmmədovun avtomobili atəşə tutulub və o, yaralanıb.

Krasnoyarskda iki azərbaycanlı qruplaşması arasında davam edən silahlı qarşıdurma vilayət rəhbərliyini məcbur edib ki, bir müddət şəhərdə azərbaycanlılara aid olan bütün ticarət obyektlərini bağlasın. Oqtay Əhmədovun klanının ciddi itkilər verməsindən və zəifləməsindən sonra Krasnoyarskda əsas gəlirli biznes sahələrinə nəzarət R.Məmmədovun klanının nəzarətinə keçmişdi. Lakin çox çəkmədən onun özünü də öldürdülər. Bununla da Krasnoyarskda azərbaycanlı klanların hökmranlığı ciddi şəkildə zəifləmiş oldu.