Qərar - Lənkəranski-Lotu Quli münasibətlərinə də aydınlıq gətirir

Uzun müddətdir ki, Azərbaycan türmələrində “obşak”a nəzarət məsələsi ilə bağlı kriminal aləmin məşhur simalarından Lotu Quli (Nadir Səlifov) və Rövşən Lənkəranskinin (Canıyev) tərəfdarları arasında qovğalar yaşandığı barədə mətbuatda müxtəlif yazılar gedir.
Bir müddət əvvəl Kürdəxanıda kütləvi bıçaqlanma hadisəsi barədə məlumat verilmişdi. Məlumata görə, “Qanuni oğrular” “sxodka” keçirərək Lotu Qulinin haqlı olduğuna qərar vermişlər və bu qərardan sonra türmələrə göndərilən “ksiva” ilk olaraq Kürdəxanıda icraya yönəldilmişdir. Lotu Qulinin tərəfdarları Rövşən Lənkəranskinin adamlarına baldırdan yüngül bıçaq xəsarəti yetirməklə “obşak”ın dəyişdiyi xəbərdarlığını etmişlər.
Mətbuata sızan məlumatlar sırasında hətta Rövşən Lənkəranskinin “oğru” adından məhrum edilməsi də var idi. Bir neçə ay öncə KİV-də yayılan bu məlumat 25 nəfər Oğrunun mətbuata yazılı müraciəti ilə təkzib olunsa da, daha sonra “Qoca” ləqəbli Oğrunun adı hallandırılmaqla yenidən mətbuata ayaq açdı. Xəbərdə “Qoca”nın tələbi ilə “sxodka”nın çağırıldığı və Oğruların ümumi yığıncağında Rövşən Lənkəranskinin tituldan məhrum edilməsi söylənilirdi.
AzNews.az-ın əldə etdiyi unikal bir sənəd bir-birindən fərqlənən bu informasiyalara və ümumiyyətlə, Rövşən Lənkəranski haqqında deyilənlərə tam aydınlıq gətirməklə, həm də yenicə “Oğru” adını qazananları tanıdır.
Sənəd – “Qanuni oğrular”ın 10.12.12, yəni 2012-ci il dekabrın 10-da keçirilən “sxodka”sında qəbul olunub. Oğrular “bizim dünyaya və orada yaşayan layiqli adamlara” müraciətlə “Oğru qanunlarının” dəyişmədiyini və xüsusilə, Oğrular haqqında qərarın da “sxodka”da verildiyini bir daha diqqətə çatdırırlar:
“Oğruların taleyini yalnız sxodka, həm də həmin şəxsin özünün iştirakı ilə, həll edə bilər. Bizim dünyamızda yaşayan insanlar söhbətin nədən getdiyini anlayırlar. Maraqlananlar Oğru ilə görüşdə detalları şəxsən öyrənə bilərlər. Həmçinin sizin diqqətinizə çatdırırıq ki, Oğrular öz məsələlərini özləri həll edirlər. Bizə vasitəçilər və vəkillər lazım deyil. Bizim işlərimizə özümüzdən başqa heç kəs müdaxilə edə bilməz”.
Anlaşılmazlığın olmaması üçün arxasında heç bir Oğrunun durmadığı siqnalları qəbul etməmək çağırışını edən qərardan da görünür ki, son günlər yayılan və mətbuata da ayaq açan xəbərlər heç də əsassız deyil. Belə ki, bu xəbərlər nəticə etibari ilə toqquşmalara səbəb olur, ona görə də Oğrular arxasında “sxodka” qərarı olmayan xəbərlərə inanmamağa çağırırlar.
Mətnin sonunda kriminal aləmdə “qardaşlığa” qəbul edilən avtorirtetlərin adı açıqlanır. “Oğru” adı alanlar: Lyoxa Zlok, Hacı, Paşa Paştet, Rufat Gəncinski, Astik Suxumski, Ruslan Lebed, Manço Suxumski, Tolyan Tolyatinski, Tengiz Xoca, Əhməd Şalinski, Oleq Mumu, Gio Jorka, Xamzat İnquş, Laşa Piterski, Sanya Medvejenok, Entso.
Qərar 32 “Oğru”nun adından yazılıb və onların arasında Rövşən Lənkəranskinin də imzası var. Bu fakt bir daha təsdiqləyir ki, R.Lənkəranski haqqında deyilənlər, Oğruların özünün də bildirdiyi kimi, “hansısa özfəaliyyətin” nəticəsidir. Lənkəranski öz titulunu yaşadır və Oğru dünyasının qərarlarının qəbulunda əsas simalardan biridir.
Əmir