Rayondan şikayətlər hara yoxa çıxır?

Özünü həmişə millətinin 1-ci qulluqçusu hesab edən Pezident İlham Əliyev məmurların xalqa zülm etməyindən, bəlkə də xəbərsizliyi adamı çıxılmaz suallar qarşısında qoyur. Qəribədir ki, istər əhali, istərsə də jurnalistlərlə söhbəti zamanı ölkə başçısı məmurlardan gələn şikayətləri operativ həll etməyini bildirməyinə baxmayaraq, vəzifə “kralları” yenə öz bildiyini edirlər. Süründürməçilik, bürokratiya, rüşvətxorluq və etinasızlıq ayaq tutub yeriməkdədir. Yaxını qoyub uzaqdan danışmaq istəməzdim. Belə ki, Qazax rayon İcra Hakimiyyətində çalışan bir qisim məmurlar rayonda bir adamın da işini həll etmək meyarında deyil. Demək olar ki, görsələr haradasa satılası bir qarış torpaq qalıb, inanın ki, onu da özlərinə götürərlər.
Yetişməyən ərizələr
Prezident İlham Əliyevin “ Vətəndaşların ərizə və şikayətlərinə baxılması haqqında” verdiyi sərəncama Qazaxda əməl edən tapılmır. Vətəndaşa ən tezi 15, geci isə 30 günə veriləcək ərizələrin cavabları 2, bəzən də 3 aya çatdırılır. Çox vaxt isə vətəndaş icra strukturlarına çağrılmadan ərizələr başdansovdu şəkildə məmurlar tərəfindən bağlanılır. Burada 2 məsələ diqqəti çəkir: ya məmur özü prezident sərəncamından xəbərsizdir, ya da şikayətçini hesaba almır. Əgər xəbərsizdirsə, bu bisavad necə icra strukturuna yol tapıb? Şikayətçini dolayıbsa, ölkə başçısına hörmətsiz yanaşdığı üçün niyə cəzalandırılmır?
Məmurun belə hərəkətləri vətəndaşı təkrarən ali orqanları narahat etməsinə gətirib çıxarır.
Atalar yaxşı deyib: “Başına gələn başmaqçı olar”.
Düz 2 aydan çoxdur ki, Qazax rayonunun 3 nəfər sakini Qazax şəhər Kommunal Müəssisələri Kombinatının müdiri Mirzəyev Mahmud haqqında ölkə başçısına yazdıqları şikayət ərizəsinə hələ də cavab ala bilmirlər. İnsafən, prezident aparatına göndərilmiş şikayət ərizəsi 15 gündən sonra baxılması üçün Qazaxrayon İcra Hakimiyyətinə göndərilsə də, ərizə 2 aya yaxındır ki, “yatızdırılır”. Həmin ərizəyə baxılması üçün kimin üstünə yazılması ilə maraqlandıq. Ümumi şöbə müdiri Gündüz Abışov qeydiyyat kitabını açaraq belə dedi: “Prezidentə göndərilmiş şikayət ərizəsinə baxılması üçün 16 yanvar 2014-cü il tarixdə bizə daxil olub. İcra başçısı Ayaz Əsgərov həmin məktubu aqrar məsələlər üzrə şöbə müdiri Aqil Qurbanovun üstünə yazıb. Uzağı fevralın 18-nə kimi şikayətçilərin iştirakı ilə cavab veriləcəkdir”. Bəli, bu gün də mart ayının 11-i olmağına baxmayaraq, cavablandırmadan səs-soraq yoxdur.
Anoloji olaraq diğər vətəndaşların ərizələrinə də bu cür laqeyd münasibət bəslənməkdədir. Gənclər tanıyırıq ki, istedadı, bacarığı ilə rayonda fərqlənirlər. Lakin işsizliyi barədə dəfələrlə Qazax rayon İcra Hakimiyyətinə yazılı şikayət etməsinə baxmayaraq tədbir görən yoxdur. Təəssüflər ki, həmin icra hakimiyyəti işinə yaramayan kadrlar axtarışındadır. Belə neqativ hallar ölkə başçısının göstəriş və sərəncamlarına zidd kimi qiymətləndirilmirmi?
İcra aparatına işə düzələnlər birinci özlərini “düzəldirlər”.
Qeyd etdiyimiz kimi, icrada çalışanların əksəriyyəti işinin nədən ibarət olduğunu da bilmirlər. Onlar elə düşünürlər ki, “bəlkə məni bu gün, sabah çıxartdılar. İmkandı, nə bacarıram ev üstünə ev alım, torpaq üstünə torpaq alım, maşın üstünə maşın alım. Diqqət yetirək. Kimin ağlına gələr ki, Qazaxda evləri qəzalı vəziyyətdə olan vətəndaşlar üçün tikilmiş 24 mənzilli binadan 10 mənzili icra aparatının işçiləri tərəfindən zəbt oluna... Hansı ki, mənzilləri zəbt edən icra işçilərinin ayrı-ayrı yerlərdə tikdirdikləri evləri göz oxşayır. Eyni zamanda, qapısında velosiped olmayanlar icra aparatına məxsus maşınları oğlu, həyat yoldaşı, qaynı, nə bilim aidiyyətiolmayan adamlar sürsün. Üstəlik, avtomobil müfəttişləri də sürücüyə baxmadan maşına baxıb çubuğu ilə salam versin. Belə məsələlərlə qarşılaşanda hər kəs daxilən bir sualla düşünür: “görəsən, prezidentin bu işlərdən xəbəri varmı?”
Fərz edək ki, yoxdur. Bəs prezidentin məmurlara silkələdiyi barmağı hara qoyaq? Yəqin məmurlar həmin barmağı sadə adamlar üçün silkələdiyini zənn edirlər.
Anti-sanitariya ayaq “tutub yeriyir”
Bu ifadələri “kolxoz “ (Nazim MMC) bazarında, şəhərin mərkəzində, dolanbac küçələrdə və s. işlətmək mümkündür. Şəhərin mərkəzində yayda cəmi 1-2 dəfə işləyən fantanların içi zir-zibildən qəm oxşayır. Bir çox idarə, müəssisə və təşkilat binalarının ətrafı zibilliklərə çevrilib. İstirahət parklarında, hətta icra hakimiyyətinə bitişik parkda da səliqəsizlikdir. Arxa küçələrin vəziyyətindən də danışmağa dəyməz.Qazaxda aidiyyəti bir məmura təsadüf etməzsən ki, şəhərinin vəziyyəti ilə maraqlansın. Aldığımız məlumata görə, icra başçısı hansının işdən çıxmaq ərizəsini istəyən kimi, həmin məmur ya özünü xəstəliyə vurur, ya da sakitcə xəstəlik vərəqəsi açdıraraq aranı uzadır. Daha deyən yoxdur ki, “xəstəsən, get evində otur, nə maddi marağın var ki, canına yazığın gəlmir? Özünə yazığın gəlmirsə, Qazax vətəndaşlarına da maneəçilik törətmə!”
Zona “ukratoru” varmı?
Hələ, sovet dönəmində bu ən aparıcı vəzifə sayılırdı. Hazırda isə sirr deyil ki, deputatlıq dəbə minəndən “ukrator”(zona təhkimçisi) adı əhalinin yadından çıxıb. Belə ki, onlar ali rəhbərliyə dəfələrlə şikayət ərizələri ünvanlayan vətəndaşları şəxsən qəbul edər, onlarla həmişə ünsiyyətdə olardılar. Lazım gəldikdə müvafiq tədbirlər görərdilər. İcra başçılarının işlərinə kağız üzərində deyil, birbaşa nəzarət edərdilər. Belə olan halda da hər kəs yerini tanıyardı. Bu məsələlər “yox” dərəcəsinə çatdığından başlı-başını saxlasındır. Lakin çox arzulayardıq ki, zona təhkimçisi varsa Qazaxı dağıdanların əllərindən alıb sadə vətəndaşların özlərinə qaytarsın. İcra aparatını təsadüfi düşənlərdən təmizləməklə vətəndaşların payını yeyən məmurlara qarşı qəti surətdə tədbir görsün. Onda ölkə rəhbəri İlham Əliyevin verdiyi sərəncam və tapşırıqlara da əməl olunar.
İlham Hacalı