Jurnalist Məhəmmədəli Qəribli Nizami rayonu Keşlə qəsəbəsində evlərin yağış sularının altında qalması ilə bağlı öz Feysbuk səhifəsində sərt ifadələrlə dolu status paylaşıb. Maraqlıdır ki, həmkarımız əsas hədəf kimi bahalı avtomobillərin alqı-satqısı ilə məşğul olan «Audi Center»i seçib. Həmin statusu olduğu kimi təqdim edirik:

«Bütün aparıcı media vasitələrində çalışan dəyərli həmkarlarıma Keşlə qəsəbəsində baş verən hadisə ilə bağlı göstərdikləri həmrəyliyə görə təşəkkür edirəm. Problem olduqca ciddidir. Qəsəbənin yarısı suyun altında qalıb. Rəsmilər bütün evləri su basandan sonra hadisə yerinə gəlib çıxdılar. Özü də olduqca aşağı rütbəli məmur kotingenti ilə. Yalnız Keşlə qəsəbəsinin yerli icra nümayəndəsi Qara Qarakişiyev gecədən hadisə yerinə özünü yetirib.


Bu yalnız mənim problemim deyil. Keçən il eyni vəziyyət yaşanmışdı. Araşdırıldıqda məlum oldu ki, mərkəzi kolektorun kecdiyi yerin üstündə «Audi Center» özünə maşın satışı və təmiri üçün böyük ofis tikib. Sakinlərin dediyinə görə, həmin vaxt kolektorda aparılan qaynaq işləri zamanı ölüm hadisəsi də olu. Bu səbəbdən də işlər çox tələsik görülüb. «Audi Center»in binasına kimi su kollektorda normal gəlir, ancaq binanı keçə bilmir. Nəticədə şəhərin müxtəlif yerlərindən gələn yağış suları şişib qəsəbədəki həyətlərə dolur. Hadisə yerinə gələn rəsmilər hadisəni adi təbii fəlakət kimi qələmə verməyə çalışsalar da, belə deyil. Nizami rayonunun icra başçısı Tahir Budaqov niyə hadisə yerinə gəlmir? Niyə Qorxmaz Hüseynov kabinetindən çıxmaq istəmir? Onları bu vəzifəyə xalqa xidmət üçün təyin etməyiblər bəyəm?

«Audi Center»in rəsmi və ya qeyri rəsmi yiyəsi olan Sabuncunun icra başçısı Adil Vəliyevə səslənirəm. Hörmətli Adil müəlim, gəlin bu problemi həll edin. Unutmayın ki, Sadə əhaliyə üz verən bu cür bədbəxtliyin üzərində heç kim xoşbəxt ola bilməz. Pulu da halallıqla qazanmaq lazımdır.
Özü də qeyd edim ki, Adil müəllim bu məhəlləni yaxşı tanıyır. Tez-tez falçı kimi xidmətindən istifadə etdiyi baxıcı Cəbi gilin məhələsidir bura».