Bakı Ağır Cinayətlər Məhkəməsində qayınanasını bıçaqlamaqda ittiham olunan Sumqayıt şəhər sakini, 1981-ci il təvəllüdlü Razim Mehman oğlu Həsənovun məhkəmə istintaqı yekunlaşıb.

Virtualaz.org saytının verdiyi xəbərə görə, prosesə hakim Səbuhi Hüseynov sədrlik edib.

Məhkəmə yolu ilə müəyyən edilib ki, hadisə bu il fevral ayının 17-də gecə saatlarında Sumqayıt şəhəri, Sumqayıt stansiyası qəsəbəsi, Sülh küçəsi, ev 29-da baş verib.

Hadisənin səbəblərinə gəlincə isə məlum olub ki, azyaşlı övladlarını görmək üçün onların yanına gedən R.Həsənova qayınanası irad tutub və uşaqları göstərməkdən imtina edib. Bundan əsəbiləşən R.Həsənov münaqişə zəminində 1961-ci il təvəllüdlü qayınanası Zərnigar Lətifovaya bıçaqla xəsarət yetirib.

Törətdiyi cinayət əməlinə görə R.Həsənova qarşı Cinayət Məcəlləsinin 126.1-ci (qəsdən sağlamlığa zərər vurma) maddəsi ilə ittiham elan olunub və barəsində 3 aylıq həbs-qətimkan tədbiri seçilib.

Təqsirləndirilən şəxs qismində dindirilən Razim Həsənov ona elan olunmuş ittihamla özünü təqsirli bilib. O, ifadəsində Sumqayıt şəhər sakini Zeynəb Həsənova ilə 2007-ci ildə ailə qurduğunu, birgə nikahdan iki övladları olduğunu göstərib: “Müxtəlif ünvanlarda kirayə yaşayırdıq. Arada bir müddət rayonda da (R.Həsənov əslən Saatlı rayonundandır-red.) yaşadıq. Ər-arvad kimi həmişə mehriban olmuşuq. Amma son beş-altı ayda münasibətlərimiz korlanmışdı. Bunun səbəbi isə qayınanam Zərnigar olub. Qayınanam ailə işlərimizə müdaxilə edirdi, arvadımın beynini doldururdu.



Son vaxtlar qayınanamın evində yaşayırdıq. Lakin hadisədən 20 gün əvvəl məni evdən çıxarmışdı, onlarla bir yerdə yaşamağa icazə vermirdi. Təxminən on gün əvvəl uşaqları görmək üçün getdim, məni söyüb qapıdan qovdu”.

Təqsirləndirilən şəxsin ifadəsinə görə, hadisə baş verən gün növbəti dəfə uşaqları görmək üçün qayınanasının yaşadığı ünvana yollanıb: “Evdə bir şüşə pivə içmişdim. Ürəyim uşaqlarımı istəyirdi. Onları görmək üçün gecə saatlarında qayınanamgilə yollandım. Qayınanam Zərnigar qapını açıb məni görəndə itələyə-itələyə bayıra çıxartdı. Aramızda mübahisə yarandı, yenə də söyüş söyməyə başladı. Əhəmiyyət vermədim, dedim uşaqları görüb gedəcəm.

Zərnigar isə buna imkan verməyəcəyini deyib anamın gorunu söydü. Özümü saxlaya bilmədim, əsəbi halda masanın üstündən götürdüyüm bıçaqla qayınanama bir neçə zərbə vurdum. Neçə zərbə vurmağım yadıma gəlmir. Zərbələrin təsirindən onun yerə yıxıldığını görüb qorxdum və qaçıb getdim. Evdən çıxan zaman digər otaqda yatan arvadım Zeynəb oyanıb qonaq otağına gəldi. Qaçarkən bıçağı da özümlə götürmüşdüm, Bakı-Quba yolunun kənarında boş sahəyə atdım və qardaşımgilə getdim. Qardaşım Namiqə baş verənləri danışdım və onun la birlikdə Sumqayıt Şəhər Polis İdarəsinin 2-ci polis bölməsinə gedib könüllü təslim oldum”.

Zərərçəkmiş şəxs qismində dindirilən Zərnigar Lətifova kürəkəninə ağır cəza verilməsini istəyib: “Razimlə aramızada bir neçə dəfə mübahisəmiz olub. Gecə vaxtı divanda yatarkən Razimin evə gəldiyini gördüm. Əsəbiləşdim, onunla mübahisə etdim. Razim uşaqları görmək istədiyini dedi. Onu evdən qovanda əlindəki bıçaqla qarnıma vurdu. Özümü itirdim. Qızım Zeynəbi köməyə çağırdım. Zeynəb gələnə kimi Razim qaçıb getdi. Bundan sonra məni xəstəxanaya apardılar. Ona ən ağır cəza verilməsini məhkəmədən xahiş edirəm”.

Şahid qismində dindirilən Zeynəb Həsənova həyat yoldaşının içki düşkünü olduğunu deyib: “Evlənəndən sonra müxtəlif ünvanlarda kirayədə yaşamışıq, sonradan anamın evinə köçmüşük. Anamla həyat yoldaşımın araları soyuq idi, arabir mübahisə edirdilər. Razim spirtli içkilərə meylli adam idi. Buna görə mübahisəmiz düşürdü. Razim evdən çıxıb getmişdi, qardaşı Namiqin evində yaşamağa başladı. Sonradan digər qardaşı Ələsgər bizə gəlib Razimin barışmaq istədiyini və bir daha spirtli içki qəbul etməyəcəyini dedi. Buna görə də yenidən barışıb bir yerdə yaşamağa başladıq. Lakin söz verməsinə baxmayaraq Razim yenə də içməyə davam edirdi. Onun bu hərəkəti məni əsəbiləşdirirdi. Hadisədən təxminən 20 gün öncə Razim yenə kirayə ev tutub yaşamağı təlkif etsə də razılaşmadım. Bundan sonra Razim özü çıxıb getdi və yenidən Namiqin evində yaşamağa başladı.

Hadisə baş verən gecə qonşu otaqdan anamın “ay ana, öldüm” deyərək qışqırdığını eşitdim. Cəld yerimdən qalxıb anam yatan otağa keçdim. İçəri girəndə gördüm ki, Razim əlindəki bıçaqla anamın sinəsinə vurub. Onun qaçdığını görüb tez pəncərəni açıb qonşuluqda yaşayan xalam Gülnazı harayladım. Sonra təcili yardıma zəng vurdum. Anamı xəstəxanaya çatdırdıq, onun üzərində cərrahiyyə əməliyyatı aparıldı”.

Məhkəmənin hökmü ilə Razim Həsənov 5 il müddətinə azadlıqdan məhrum edildi.