Tanınmış ilahiyyatçı alim və ictimaiyyət arasında kifayət qədər geniş nüfuzu malik olan Elşan Mustafaoğlunun iki gün bundan öncə həbs olunması barədə yayılan xəbərlər ölkədə şok effekti yaratdı. Ötən həftəsonu yayılan məlumatlarda qeyd olunur ki, ilahiyyatçı 3 gün MTN-də saxladıqdan sonra, guya barəsində Səbayel Rayon Məhkəməsi tərəfindən 4 aylıq həbs-qətimkan tədbiri seçilib.
Lakin ilahiyyatçının hansı maddə ilə ittiham olunduğu rəsmən elan edilməyib. Digər tərəfdən şənbə günü Milli Təhlükəsizlik Nazirliyinin İctimai Əlaqələr İdarəsindən “AzVision.az”a bildiriblər ki, ilahiyyatçı Elşən Mustafaoğlunun saxlanması barəsində heç bir məlumatları yoxdur.
Elşən Mustafaoğlu Azərbaycanda kifayət qədər tanınmış ilahiyyatçı və ictimai xadimdir. Bu səbəbdən onun ehtimal edilən həbs xəbəri şok effekti yaradıb və sosial şəbəkələrdə gedən müzakirələrdə onun həbsi ilə bağlı bir çox fikirlər yayılıb və hər kəs üçün gözlənilməz olub.
İlahiyyatçının həbsinə münasibət bildirən tanınmış siyasilər ictimaiyyət və inanclı kəsim nümayəndələri baş verənləri birmənalı olaraq pisləyərək, Elşən Mustafaoğlunun vətənpərvər, sivil və radikallıqdan kənar bir şəxs kimi xarakterizə ediblər.
AzadXeber.az olaraq ictimaiyyət nümayəndələrinin, ziyalıların Elşən Mustafaoğlu ilə fikirlərini sizlərə təqdim edirik.
İlqar İbrahimoğlu: “Mən Elşən Mustafaoğlunu illərdir tanıyıram. Çox dürüst, ləyaqətli, sadiq insandır”
Dini Etiqad və Vicdan Azadlıqlarını Müdafiə Mərkəzinin (DEVAMM) sədri, ilahiyyatçı alim Hacı İlqar İbrahimoğlu öz facebook səhifəsində tanınmış ilahiyyatçı Elşən Mustafaoğlunun həbsinə reaksiya verib. Açıqlamada deyilir: “Xəbər verildiyi kimi, tanınmış maarifçi və ictimai fəal Elşən Mustafaoğlu həbs edilib. Anlaşılmaz səbəblər ucbatından və qaranlıq qalan məqamlar səbəbindən, Elşən Mustafaoğlu kimi bir ziyalı barədə həbs-qətimkan tədbiri seçilib.
Mən Elşən Mustafaoğlunu illərdir tanıyıram. Çox dürüst, ləyaqətli, sadiq insandır. Mustafaoğlu araşdırmaçı-alim, ictimai fəal olmaqla yanaşı, çox aktiv maarifçıdır. Bununla bərabər, onun yanaşmalarında qırmızı xətt kimi hər zaman dövlətçilik təfəkkürü keçib. Mustafaoğlunun həbsinə inanmaq olmur. Məmləkətin sayılı maarifçilərindəndir Elşən Mustafaoğlu. Hər zaman şəffaf, dürüst fəaliyyəti ilə seçilib.
Təəccüblüdür ki, E.Mustafaoğlu yenicə QMİ-də posta gətirilmişdi. 10 ildən artıqdır ki, TV-də müəllif proqramlarının aparıcısıdır. Hərtərəfli ictimai bir şəxsdir. Bəs nə baş verdi?!
Elşən Mustafaoğlu kimi bir ziyalı nə etdi ki, onun barəsində məhz belə sərt qətimkan tədbiri seçdilər?! İnanmaq istəyirəm ki, tezliklə qapısı açılacaq, baş verən bu dəhşət, bir anlaşılmazlıq kimi izah ediləcək.
Allaha pənah...".
Arzu Abdullayeva: “Elşən Mustafaoğlunun həbsinin səbəbi ilə bağlı məntiqli bir cavab tapmaq mümkün deyil”
Açıqlama verən hüquq müdafiəçisi Arzu Abdullayeva bildirdi ki, Elşən Mustafaoğlunun həbsinin səbəbi ilə bağlı məntiqli bir cavab tapmaq mümkün deyil. Bu indiyə qədər baş verən repressiyaların davamıdır və hazırda da davam edir: “Elşən Mustafaoğlunun həbsindən sonra onun barəsində maraqlandım və fəaliyyəti ilə bağlı heç bir radikallıq görmədim. Kifayət qədər sülh sevər və sivil bir inanclı təsiri bağışlayıb.”
Vüsal Hətəmov: “Hazırda Doktor Elşən Mustafaoğlu kimi alimlər öz intellektləri ilə ölkəmizdə radikal dini mühitin yaranmasına, ölkədə din-dövlət qarşıdurmasının başvermə riskinə həmişə əngəl olublar”
Birlik Təşkilatının sədri, şərqşünas Vüsal Hətəmov isə açıqlaması zamanı qeyd edib ki, baş verənləri anlaşılmazlıq kimi qəbul edirəm. Çünki başqa bir şey ağlıma gəlmir:
“Hazırda Doktor Elşən Mustafaoğlu kimi alimlər öz intellektləri ilə ölkəmizdə radikal dini mühitin yaranmasına, ölkədə din-dövlət qarşıdurmasının başvermə riskinə həmişə əngəl olublar. Əsl ziyalı olan Elşən Mustafaoğlunun haqqının bərpa olunması, istintaqın ədalətli olması ümidi ilə..!
Zülfüqar Mikayılzadə: “Onun əxlaqı, davranışı və fəaliyyəti heç bir dindara və qeyri-dindara məxfi deyildir. Hamı onu ağıllı alim və təqvalı bir şəxsiyyət kimi tanıyırdı”
Tanınmış ilahiyyatçı alim Zülfüqar Mikayılzadə isə bildirdi ki, Elşən Mustafaoğlu dini camiədə və xalq arasında kifayət qədər tanınan bir şəxsiyyət olub: “Onun əxlaqı, davranışı və fəaliyyəti heç bir dindara və qeyri-dindara məxfi deyildir. Hamı onu ağıllı alim və təqvalı bir şəxsiyyət kimi tanıyırdı. E. Mustafaoğlunun üstünlüklərindən biri bu idi ki, o heç zaman ixtilaflı məsələlərə getməzdi. Eyni halda istənilən məsələyə münasibət bildirərkən şəxsi marağı ilə yox, Allahın razılığını nəzərə alıb münasibət bildirirdi. Bütün insanlar onu belə tanıyıb və mən də belə tanıyıram. Əgər bundan sonra onun barəsində nəyisə deyiləcəksə, bunların hamısı yalan və iftira olacaq. Biz Elşən Mustafaoğlu barədə ehtimal ediləcək hər hansı bir cinayət ittihamını və həbsi qabaqcadan məhkum edirik və düşünürük ki, bu alimlərimizə qarşı baş qaldıran repressiyaların davamı ola bilər. Nəticədə müsəlmanlar arasında bu işləri görən şəxslərə qarşı nifrət hissi daha da artacaqdır.”
Eldəniz Quliyev: “E. Mustafaoğlu ilə bir neçə dəfə görüşmüşük. Həm ilahiyyatçı şəxsiyyət, həm də bir insan kimi qibtə ediləsi insandır”
Ziyalılar Birliyinin sədri Eldəniz Quliyev isə açıqlaması zamanı qeyd etdi ki, Elşən Mustafaoğlu olduqca elmə, imana və daxili mədəniyyətə malik olan bir şəxsdir:
“Həqiqətən də hörmət ediləsi şəxsiyyətdir. Hesab edirəm ki, onun saxlanılması tarixin bir ironiyasıdır və bir səhvdir. Ümid edirəm çox tez bir zamanda hər şey aydın olar. Azərbaycanda bəzən kimisə sifarişlə şər böhtanla həbs etdirmək də mümkündür. Əgər elə olsa bu görülməmiş bir hadisə olacaq. E. Mustafaoğlu ilə bir neçə dəfə görüşmüşük. Həm ilahiyyatçı şəxsiyyət, həm də bir insan kimi qibtə ediləsi insandır. Eləcə də onun Azərbaycan cəmiyyəti üçün gördüyü işlər göz qabağındadır. Statusları, tədbirlərdəki çıxışları həm cəmiyyətimiz, həm də dövlətçilik üçün gərəkli olub. İndi niyə nə səbəbə saxlanılıb, əsas da maraqlı olan odur ki, niyə susurlar? Artıq 4-5 gündür hadisə baş verib, amma heç bir açıqlama verilmir. Gözləyək Allaha pənah görək nə olur.”
Mirəcəfər Əyyubzadə: “Onun rəhbərliyi dövründə onda elə bir nöqsan görməmişəm. Azərbaycanda nə qədər proffessor varsa, hər zaman Elşən bəy öndə gedənlərdən olub”
Elşən Mustafaoğlunun həbsi ilə maraqlandığını və hələ ki, heç bir orqanın onun həbs edilməsi ilə bağlı rəsmi açıqlama vermədiyini söyləyən QMİ əməkdaşı və tanınmış ilahiyyatçı alim Mircəfər Əyyubzadə bildirdi ki, o sayt rəhbəri idi və Təzə Pir məscidində fəaliyyət göstərirdi: “Onun rəhbərliyi dövründə onda elə bir nöqsan görməmişəm. Azərbaycanda nə qədər proffessor olubsa, hər zaman Elşən bəy öndə gedənlərdən olub. Bir sözlə mən bu insanı doktor kimi tanımışam.”
Ərəstun Oruclu: “E. Mustafağlunu hər zaman yüksək mədəniyyətə, mütərəqqi düşüncəyə, geniş dünyagörüşünə malik olan vətənpərvər insan kimi tanımışam”
Politoloq Ərəstun Oruclu facebook hesabından E. Mustafaoğlunu tanıdığını və onun dini radikalizmdən uzaq, mütərəqqi bir ziyalı kimi tanıdığını qeyd edib: “Hər zaman yüksək mədəniyyətə, mütərəqqi düşüncəyə, geniş dünyagörüşünə malik olan vətənpərvər insan kimi tanımışam. Tanıdığım 2 ilə yaxın müddətdə bu insanda zərrə qədər də dini radikalizm əlamətinə rast gəlmədim. İndi onu da həbs ediblər, özü də çox absurd bir ittihamla. Özü də elə özlərinin cızma-qara etdikləri ”qanunları" növbəti dəfə ayaqları altına alaraq. Ölkənin yüzlərlə vətəndaşının əlinə silah götürüb, İraqda, Suriyada terrorçu dəstələrin sıralarında döyüşdüyü və belələrinin Azərbaycanın gələcəyinə təhdid yaratdığı bir zamanda, vəzifəsi onlarla mübarizə aparmaq olan dövlət qurumlarının Elşən Mustafaoğlu kimi sağlam düşüncəli insanı həbs eləməsi bir tərəfdən də anlaşılandır. Məqsəd ölkəni müxtəlif qəbildən olan terrorçu, ekstremist radikallardan təmizləmək yox, özlərini istənilən kəsimdən olan sağlam düşüncəli insanlardan sığortalamaqdır, çünki birincilərlə hər zaman asanlıqla dil tapa biləcəklərinə əmindilər. Elə mənim də buna əmin olmaq üçün kifayət qədər əsaslarım var".
Mirvari Qəhrəmanlı: ” Elşən bəy haqqında hər zaman müsbət rəylər eşitmişəm həmçinin yaxşı bir ilahiyyatçı kimi tanımışam“
Hüquq müdafiəçisi Mirvari Qəhrəmanlı isə açıqlamasdı bildirdi ki, Elşən Mustafaoğlunun həbsi ilə bağlı hələ heç bir rəsmi açıqlama yoxdur. Niyə nə səbəbə saxlanıldığını heç kim dəqiq bilmir: “Elşən bəy haqqında hər zaman müsbət rəylər eşitmişəm həmçinin yaxşı bir ilahiyyatçı kimi tanımışam. Məni narahat edən rəsmi qurumların münasibətini bilməməkdir. Hər kəs bu insan haqqında bir söz deyir. Dəqiq haqqında heç bir ittiham olmadan günahı sübuta yetirilmədən, artıq bu insan haqqında artıq əskik yazılmağa başlayıb. Ümumiyyətlə bu cür ziyalı ilahiyyatçı haqqında müvəqqəti həbs imkan tədbiri seçilməsi məni çox narahat edir. Bu həbslərin getdikcə artması ürəkaçan deyil. Onun günahsız olduğunu düşünüb Allahdan tezliklə qapısının açılmasını arzu edirəm. Bu yaxınlarda onun Qafqaz Müsəlmanlar İdarəsinə hansısa vəzifəyə təyin edildiyini də internetdən oxudum. Telekanallarda çıxışlarını izləmişəm gözəl insandır. Bir sözlə kimliyindən asılı olmayaraq hansısa bir ilahiyyatçının həbsi məni hər zaman narahat edir.”
Sorğu
Hansı bölmədə daha çox xəbər görmək istərdiniz?