Rayon sakinləri səfalətdən xilas olmaq üçün
çıxış yolunu kütləvi aksiyalarda görürlər

Əyalətlərdə məmur özbaşınalığının baş alıb getməsi artıq heç kim üçün sirr deyil, xüsusilə də Saatlıda. Bu rayonun demək olar ki, ayrıca özəllikləri var. Allahın bəxş etdiyi ən elementar insan hüquq və azadlıqları Saatlının məmurları üçün mücərrəd bir anlayışdır. Yaxşı xatirimdədir, bir neçə il əvvəl Banditizm və Terrorizmə Qarşı Mübarizə İdarəsinin məsul əməkdaşı ilə söhbət edərkən o, mənə dedi: «Bilirsən kimlər bərk getməlidir?» Doğrusu, o, tərəddüd içində olduğumu görüb bildirdi: «Yalnız və yalnız məmurlar». Bu haqqın, ədalətin, ictimai asayişin, bir sözlə, qanunların keşiyindən olan yüksək rütbəli zabitin dediyi sözlərdir. Nə qədər acı olsa da, bəli, bu bir həqiqətdir.
Düz, 20 ildən çoxdur ki, Saatlı məmurları özlərini bax beləcə, qanunlardan üstün tuturlar. Yalan, saxtakarlıq, soyğunçuluq və talançılıq bu məmurların gündəlik iş və əsas prinsiplərindən biridir. Məsələn, elə götürək Su Təsərrüfatı İdarəsinin müdiri Tahir Rzayevi. Adından göründüyü kimi, bu idarə kənd təsərrüfatının inkişafı üçün ən başlıca sahələrdən biri olsa da, lakin T.Rzayev dövlət idarəsini özünün şəxsi mülkiyyəti hesab edərək, ancaq pul sandığını doldurmaqla məşğuldur. T.Rzayevin qəbuluna düşmək hər adama müyəssər olmur, qaranlıq otağında gözəgörünməzə çevrilir. Rayon sakinləri deyir ki, məmurların özbaşınalığından olunan şikayətlərə baxılmır. Çünki özlərini Saatlının kiçik padşahı kimi aparan həmin bu məmurlar yığdıqları çirkli pulları ilə «yuxarılar»ı ram edirlər. Nə isə...…
Keçək əsas mətləbə. Bu ayın 7-də xəstəxananın doğum şöbəsində tükürpədici ölüm faktı qeydə alındı. Bu hadisə rayon sakinlərini əməlli-başlıca şoka salmışdı. Doğum şöbəsinin baş həkimi Arzu Əliyeva müayinəyə gəlmiş qadının doğuşunu vaxtından əvvəl həyata keçirmək istəyib. Bu da qadının və dünyaya gələcək uşağın ölümü ilə nəticələnib. Puldan ötrü A.Əliyeva belə ağır cinayətlərə dəfələrlə imza atıb. Lakin yüksək məbləğdə rüşvətlərin müqabilində həm Səhiyyə naziri Oqtay Şirəliyev, həm də ki, rayonun hüquq-mühafizə orqanları işi ört-basdır ediblər. Doğum şöbəsinə bu gün üz tutan hamilə qadınlar ya uşaqlarını itirir, ya da ki, özlərini. A.Əliyeva üçün belə ölümlər əlbəttə ki, heç də fərq etməz, təki pul olsun.
Belə cinayət əməllərinə görə 2010-cu ildə Mərkəzi Xəstəxananın baş həkimi Ələkbər Məmmədov onu tutduğu vəzifədən əmrlə azad etsə də, gəl ki, Şirvan Məhkəməsi A.Əliyevanın xeyrinə qərar verərək işinə bərpa edib. Necə ki, 34 saylı Tibbi Sosial Ekspertiza Komissiyasının müdiri Məmmədəli İbrahimov demişkən: «Polis rəisinin, prokurorun, icra başçısının aylıq pullarını verib işimi görürəm.» Maraqlıdır, deyilmi? Xatırladaq ki, 1996-2007-ci illərdə rayonun Mərkəzi Xəstəxanasında yerləşən 34 saylı Tibbi Sosial Ekspertiza Komissiyasının müdiri vəzifəsində çalışıb. Səhhəti ilə bağlı, qaraciyər serrozundan əziyyət çəkdiyi üçün işindən azad olunan M.İbrahimov Türkiyədə cərrahiyyə əməliyyatı olunub, birinci qrup əlildir. 4 illik fasilədən sonra M.İbrahimov yenidən Tibbi Sosial Ekspertiza Komissiyasının müdiri kreslosunda otuzdurulub. Baxmayaraq ki, tələbə yoldaşı olan TSEK-ın sədri Hüseyn Tahirovun M.İbrahimovun həmin bu vəzifəyə gəlməsində danılmaz xidmətləri olub, lakin Əmək və Əhalinin Sosial Müdafiəsi naziri Füzuli Ələkbərova 160 min manat rüşvət verdiyi bildirilir. TSEK-nı açıq bazara döndərən M.İbrahimov xəstəlik və əlillik dərəcələrini açıq-aşkar hərraca çıxarıb. Hər bir sənədin və qrupun demək olar ki, öz qiyməti var. M.İbrahimovun məntiqinə görə, «iti görüm, qurdu görüm, amma xəstə və şikəst adamları görməyim». O, daha çox sağlam adamlarla işləməyə, ünsiyyət yaratmağa üstünlük verir. Xəstələrin sənədləri illərlə M.İbrahimovun dəmir seyfində saxlandığı halda, sağlam adamların sənədlərini 3500-4000 manat pulun müqabilində qəbul edib, qısa müddət ərzində qruplar təyin edir. Ötən il belə bir məlumat daxil oldu ki, mart ayında dünyasını dəyişmiş İmişli rayon sakinini M.İbrahimov noyabr ayında təkrar komissiyadan keçirib. Analoqu olmayan belə cinayət işinin açıldığını görən M.İbrahimov çirkin əməllərini ört-basdır etmək üçün rayonun hüquq-mühafizə orqanlarına ümumilikdə 250 min manat, Əmək və Əhalinin Sosial Müdafiəsi naziri Füzuli Ələkbərova isə 200 min manat pul peşkəş edir və bütün məsuliyyəti yanında həkim işləyən Mirzəyevin üzərinə ataraq, ona da 60 min manat pul verdiyi bildirilir.
Göründüyü kimi, hüquq-mühafizə orqanlarının dırnaqarası əməkdaşları ancaq məmurların cinayətlərini ört-basdır edib, onların mühafizəsini həyata keçirirlər. Bir soruşan yoxdur ki, ay Məmmədəli həkim, axı bu qədər pullar səndə hardandır? Cinayətə və çirkaba bulaşmış məmurların bax, belə cəzasız qalması. Təbii ki, bu da rayon sakinlərinin hiddətinə səbəb olur.
Aranın qarışıb, məzhəbin itdiyi Saatlıda bu nədir ki. «Aqrolizinq»in müdiri Şakir Həsənovu Saatlıda tanımayan yoxdur. Qara əməllərdə ad çıxarmış bu şəxs ancaq pula sitayiş edir. 2010-cu ildə Maliyyə Nazirliyinin «Aqrolizinq»in Saatlı filialında apardığı yoxlamalar zamanı məlum oldu ki, Ş.Həsənov 1 milyon 200 min manat pulu həzm-rabedən keçirib. İş mahiyyəti üzrə Respublika Prokurorluğuna verilsə də, lakin dövlətə, xalqa xəyanət etmiş Ş.Həsənovun cinayət əməlləri cəzasız qalır. Yenə də vəzifə və cinayət başında o, işini davam etdirir. Belə faktları sadalamaqla qurtarası deyil. Əgər belə davam edərsə, birmənalı olaraq Quba və İsmayıllı hadisələri Saatlıda da gözlənilə bilər. Bunu aclıqdan, səfalətdən, bürokrat məmurlardan, vətəndaşları həm mənəvi, həm də ki, maddi girovluqda saxlayan, faizlə pul verən şəxslərin, hansı ki, bu adamlar bu gün meydan sulayırlar. Ən əsası isə Rayon Polis Şöbəsi əməkdaşlarının özbaşına və heç bir əndazəyə sığmayan əməllərindən əziyyət çəkən sakinlər deyir.
Saatlının ən aktual problemlərindən biri də uşaq bağçasıdır. Bu sahə demək olar ki, tam gözdən-könüldən uzaqdır. Əvvəllər Təhsil Şöbəsinin nəzdində olan uşaq bağçaları ötən ildən etibarən İcra Hakimiyyətinin tabeçiliyinə verildi, amma yenə də heç nə dəyişməyib. Uşaqların təhsil alması üçün heç bir şərait yoxdur. Məktəbə qədər olan həmin bu təhsil müəssisələrində savadlı və ixtisaslı kadr problemi yaşanır. Uşaqlara gün ərzində bir dəfə yemək verilir, o da ki, yağsız, duzsu su. Valideynlərin dediyinə görə, uşaqları iki hissəyə bölüblər: varlı və kasıb. Yəni ki, sinfi ayrı-seçkilik yaradılıb. Maraqlıdır, görünür, bizlər hələ də cəmiyyəti məhvə sürükləyən quldarlıq psixologiyasından qurtula bilməmişik. Görəsən, uşaqların qida rasionuna nə daxildir? Və bir uşağın bir günlük yeməyinə nə qədər pul ayrılır? Bu sual rayonun hər bir sakinini düşündürsə də, lakin Maliyyə İdarəsinin müdiri Namiq Bağırovu bu, heç vaxt ilgiləndirməyib. Rayonun müxtəlif sahələrinə ayrılan maliyyə vəsaitlərini ciddi-cəhdlə qaranlıq saxlayan N.Bağırov rəhbəri olduğu idarəni qapalı bir obyektə çevirməklə açıq-aşkar informasiya azadlığına qənim kəsilib. Uşaq bağçalarında təsərrüfat işlərinə baxan şəxslər deyir ki, bir uşağın günlük yeməyinə ayrılan pul hardasa, 20 qəpikdir. Maraqlıdır, görəsən, N.Bağırov bu qəpik-quruşla günlük yeməyini təmin edə bilərmi? Halbuki, uşaqların çörəyinə göz dikən N.Bağırovun bəllidir ki, bir aylıq gəliri 50-100 min manata durur. Bu maxinasiyalarını tək elə kağız üzərində olan kiçik müəssisələrlə həyata keçirir.
N.Bağırovun bu və ya digər qaranlıq işlərinə, eləcə də Saatlıda baş verənlərə növbəti saylarımızda aydınlıq gətirəcəyik.
Tural