Mikayıl Cabbarovun əmrlərinin icrasının dayandırılmasının səbəbləri üzə çıxır; Təhsil sektorunda ciddi dəyişikliklər olacaq
Prezident İlham Əliyevin dünən Dövlət Torpaq və Xəritəşəkmə Komitəsini ləğv edərək, onun səlahiyyətlərinin Əmlak Məsələri Dövlət Komitəsi ilə Ekologiya və Təbii Sərvətlər Nazirliyi arasında bölüşdürməsindən sonra, iqtidarda islahatların davam edəcəyi fükirləri qüvvətləndi.

Bu barədə “Gündəm Xəbər”ə verilən məlumata görə, islahatların təkcə struktur deyil, həm də kadrları əhatə edəcəyi və bir sıra iri ranqlı məmurların “vurulması” və yerlərinin dəyişdirilməsi də gözlənilir. Bu islahatlar fonunda isə, iki nazirlə bağlı veriləcəyi bildirilən qərar, hazırkı məqamda ən çox dartılaşacaq mövzu sayıla bilər.
Bizi məlumatlandıran şəxsin iddiasına görə, iqtidar islahatlar çərçivəsində əmək və əhalinin sosial müdafiəsi naziri Səlim Müslümov və təhsil naziri Mikayıl Cabbarovla bağlı daha bir planını həyata keçirəcək:
“Bu plan artıq 3-4 aydır hakimiyyət dairələrində qızğın müzakirə olunur. Bu müazkirələrin simasında son aylar Azərbaycanın təhsil sektorundakı problemlərlə bağlı yüksək dairələrin səsləndirdiyi tənqidlər təsadüfi deyil. Məncə son 4 ay ərzində Prezident Adiminstrsiyasının rəhbəri Ramiz Mehdiyevin səsləndirdiyi fikirləri xatırlatmaq yerinə düşər. Bunlar təsadüfi deyil. Artıq hakimiyyətdə təhsil naziri Mikayıl Cabbarovla bağlı fikirlər birmənalı deyil. Bütün bunlara paralel olaraq, əmək və əhalinin sosial müdafiəsi naziri olan və bir ilini arxada buraxan Səlim Müslümovla bağlı başqa plan işə salınıb. Hakim dairələrdə peşəkar idarəçi kimi qəbul edilən və hazırda işlədiyi postda qısa müddətdə hakimiyyətin nəzərində qarşısına qoyulan vəzifələrin öhdəsindən yüksək səviyyədə gələn nazir, bu gün cəmiyyətin əsas problemli sahə saydığı Təhsil Nazirliyinin rəhbərliyinə gətiriləcək.

Mötəbərliyinə şübhə etmədiyimiz qaynaq iddia edir ki, hələ 2013-cü ilin ortalarında Səlim Müslümovun təhsil naziri olan Misir Mərdanovu əvəzləyəcəyi gözlənilirmiş: «Hətta Səlim Müslümovun təhsil naziri təyinatı ilə bağlı sənədləri də hazırlanmışdı. Bu təyinatı Prezident Administrasiyasında bir neçə nəfərlə yanaşı, Səlim Müslümovun ən yaxın adamları da bilirdi. Lakin əmək və əhalinin sosial müdafiəsi naziri təyinatından bir neçə gün əvvəl onu çağırıb, hazırkı vəzifəsinə göndəriləcəyi diqqətə çatdırıldı. Təyinatı zamanı isə ona bu nazirlikdə baş verən korrupsiya və digər hüquqpozmalarla bağlı qəti tapşırıqlar verildi. Səlim Müslümov da nazir təyinatından sonra, bütün gücü ilə büdcədən ayrılan vəsaitlərlə yanaşı, ünvanlı sosial yardımlar (ÜSY) və sair layihələrlə bağlı, sələfi Füzuli Ələkbərovun illərlə edə bilmədiyini cəmi 7-8 aya həll elədi. O, əlillərin avtomobillərlə təminatı prosesini demək olar qısa müddətdə bitirdi, ÜSY məsələsində Rayon Əhalinin Sosial Müdafiəsi mərkəzləri ilə digər qurumların yol verdiyi ciddi mənimsəmə faktlarını minimuma endirdi, hər yoldan keçənə əlil statusu verilməsinin qarşısını böyük ölçüdə aldı. Ən əsası isə o, sələfinin dövründə nazirliyə ayrılan milyonlarla manat vəsaitin böyük bir hissəsinə də qənaət etmiş oldu. Bunu hansı üsullar və ya qanunla edib-etmədiyə, əlbəttə, başqa mövzunun söhbətidir. Ancaq fakt budur ki, iqtidar milyonlarla manat qənaətə yol verən Səlim Müslümovun, eyni zamanda, nazirlik və onun tabeliyində olan ayrı-ayrı müəssisələrdəki qanunsuzluqlardan daxil olan şikayətlərin sayının kəskin şəkildə azaltmasından həddən artıq razı olduqlarını hər addımda göstərməyə başladılar. Bu isə Səlim Müslümova olan inamı yüksəltdi. Ancaq eyni sözləri Mikayıl Cabbarov haqqında demək mümkün deyil».

Müsahibimizin sözlərinə görə, hazırkı postunda hakimiyyətin ümidlərini doğrultduğu deyilən Səlim Müslümovun, yenidən təhsil naziri postuna təyinatı gündəmə gəlib: «Bu dəfə mövcud şərtlər də onun təyinatını yenidən gündəmə gətirib. İqtidar isə düşünür ki, Səlim Müslümov bu sahəni ayağa qaldıracaq ən ciddi və yeganə namizəddir. Diqqət edirsinizsə, son aylar Mikayıl Cabbarovun ünvanına ən yüksək tribunalardan ciddi tənqidlər gəlir. Başda Ramiz Mehdiyev olmaqla, YAP-ın «ağır çəkili» funksioneri Siyavuş Novruzov, hətta Azərbaycan alimlərinin 1-ci qurultayında da AMEA prezidemti və digər alimlərin Mikayıl Cabbarovun ünvanına, onun rəhbərlik etdiyi təhsil sahəsindəki geriləmədən uca səslə danışdılar. Düzdür, Siyavuş Novruzovun təhsil sahəsi ilə bağlı açıqlamalarından sonra, istər hakim düşərgədə, istərsə də cəmiyyətin digər kəsimlərində Əli Əhmədovla Mübariz Qurbanlıdan sonra, onun da vəzifə arzusunda olduğunu deyənlər, yazanlar da oldu. Hətta bəziləri bir qədər də irəli gedərək Siyavuş Novruzovun təhsil naziri olmaq istədiyini iddia etdi. Belə kökü olmayan iddialara Siyavuş Novruzovun da maraqlı cavabı oldu. O, təhsil sahəsindəki problemləri qabartmasını bu sahəyə rəhbərlik etmək niyyəti ilə əlaqələndirənlərə "Bu məntiqə əsaslanılsa, gərək, mən, Müsavat Partiyasının da başqanı olmaq istəyim. Çünki mənim ən çox tənqid etdiyim elə Müsavat Partiyasıdır”, - cavabını verdi. Bəli, onun belə posta iddiası yoxdur. Zatən, iqtidarda bu posta onu heç düşünənlər və ya görmək istəyənlər də yoxdur. Amma eyni sözü Səlim Müslümov haqqında qətiyyən demək olmaz. Zamanla görəcəksiniz, əmək və əhalinin sosial müdafiəsi naziri Mikayıl Cabbarovu əvəzləyəcək».
Müsahibimiz deyir ki, Səlim Müslümovun təhsil naziri olmasını, Mikayıl Cabbarovun gedişini şərtləndirən ciddi əsaslar da var: «İqtidarın beyin mərkəzləri Səlim Müslümovdan fərqli olaraq, Mikayıl Cabbarovun özünün doğrultmadığına əmin olublar. Fakt odur ki, Mikayıl Cabbarov təhsil naziri kimi qarşısına qoyulan əsas problemlərin həllinə nail ola bilmədi. Tam əksinə, bir sıra sahələrdəki neqativ hallar yenə də qalmaqda, bəzi sahələrdə isə daha da geriləməkdədir.
Digər yandan, Mikayıl Cabbarovun təklifi ilə Nazirlər Kabinetinin rayon və şəhər təhsil şöbələrinin fəaliyyətinə xitam verilməsi, onların bazasında isə Regional Təhsil Mərkəzlərinin yaradılması haqqında qərar verilməsinə baxmayaraq, bu qərarın icrasının dayandırılması da, təsadüfi deyil. Bu və digər məsələlər Mikayıl Cabbarovun getməsinə, yeni nazirin isə gəlişinə hesablanıb. Daha dəqiqi, Səlim Müslümovu bura göndərməklə, onun təklifi əsasında Təhsil Nazirliyində daha çevik idarəetmə sisteminin tətbiq oluna biləcəyi ciddi müzakirə mövzusudur».

Son olaraq, Səlim Müslümovun məmurluğa təhsil sahəsindən gəldiyini də xüsusi vurğulayan müsahibimiz, onun 1995-ci ilədək Azərbaycan Dövlət İqtisad Universitetində müəllim, baş müəllim, dekan müavini ilə yanaşı, Türkiyədə də pedaqoji fəaliyyətlə məşğul olduğunu diqqətə çatdırıb: “Bütün bunlar isə, Səlim Müslümovun iqtisad elmləri doktoru kimi, təhsilin incəliklərini də bildiyini söyləməyə yetər. Yəni, onun pedaqoji təcrübəsi də təhsil naziri təyinatında üstünlük hesab olunur. Səlim Müslümovun təyinatından sonra isə təhsildə çox ciddi islahatlara üstünlük veriləcək, ölkədə təkcə kəmiyyət deyil, həm də əsas kimi tədrisin keyfiyyətinə xüsusi diqqət yetirilməsi planlanacaq”.

Mikayıl Cabbarovun taleyinə gəldikdə isə, onun işsiz qalmayacağı da bildirilir: “Əlbəttə, o, yeni vəzifəyə keçiriləcək”.

Cəfər MƏRDANOĞLU