Kəmaləddin Heydərova sorğu göndərdi

gundemxeber.az “Kür” Vətəndaş Cəmiyyəti Qərargahı 2012- ci ilin yazında baş vermiş Qax- Zaqatala zəlzələsi ilə bağlı özünün növbəti hesabatının hazırlanmasına başlayıb. Cəmiyyət bəzi suallara dəqiq cavab almaq üçün yenidən Fövqəladə Hallar Nazirliyinə rəsmi İnformasiya sorğusu göndərib. Bu barədə Gunxeber.com-a daxil olan məlumatda bildirilir ki, sorğuda “Kür” Cəmiyyətinin təklifinə uyğun olaraq 2010- cu ilin yazında baş vermiş Kür- Araz daşqınlarının nəticələrinin aradan qaldırılması istiqamətində görülən işlər və təsirə məruz qalan, kompensasiya alan vətəndaşların adlarının, ünvanlarının, aldıqları yardımların həcmi ilə bağlı məlumatların Fövqəladə Hallar Nazirliyinin rəsmi internet səhifəsində gec də olsa yerləşdirilməsi təqdir olunur. Eləcə də 2012- ci ilin 07 və 18 mayında Qax- Zaqatala bölgəsində baş verən zəlzələ ilə bağlı görülən işlərlə əlaqədar FHN- nin saytında yeni bölümün yaradılması və bəzi məlumatların həmin bölümə yerləşdirilməsinə başlanılması da müsbət hal kimi qiymətləndirilir. FHN- ə ünvanlanan məktubda qeyd olunur ki, həmin məlumatların bir hissəsi 23 noyabrda “Kür” Vətəndaş Cəmiyyəti Qərargahının hazırladığı “Qax- Zaqatala bölgəsində baş vermiş zəlzələ ilə bağlı görülən işlər, mövcud problemlər, qarşıda duran vəzifələr” mövzusunda Hesabatda ictimaiyyətə açıqlandıqdan sonra media qurumları və ictimaiyyət nümayəndələri tərəfindən bu istiqamətdə müxtəlif suallar meydana çıxıb. “Kür” Cəmiyyəti Qax- Zaqatala zəlzələsi ilə bağlı növbəti hesabatın hazırlanmasına start verdiyini qeyd edərək FHN- dən “İnformasiya əldə etmək haqqında” Qanuna uyğun şəkildə aşağıdakı sualların cavablandırmasızı istəyir;
- Qax- Zaqatala zəlzələ bölgəsində tikildiyi qeyd olunan 682 fərdi yaşayış evləri hansı kəndlərdə hansı sayda və kimlərə tikilib (Zəhmət olmasa adlı siyahı təqdim olunsun)?
- Zəlzələ bölgəsində indiyə qədər xərcləndiyi bildirilən 234.605,6 manat vəsaitlə hansı işlər görülüb?
- Zəlzələ nəticəsində çadırlara köçürülmüş insanların qışı harda, necə keçirmələri üçün nə kimi tədbirlər görülür? Kirayələrdə qalan insanlara hansısa yardımların edilməsi (kirayə pulu, ərzaq yardımı, kompensasiya və s.) nəzərdə tutulurmu?
- Qəzalı vəziyyətə düşmüş və tikintisinə qərar verilmiş uşaq baxçalarının fəaliyyəti hazırda necə tənzimlənir? Onlar harda yerləşdirilir və bu yerləşdirməyə görə hansısa quruma kirayə pulu ödənilirmi?

“Xəbər xidməti”