Məhkəmə alman vətəndaşının qətli ilə bağlı cinayət işini geri qaytardı

Dünən Bakı Apelyasiya Məhkəməsində alman vətəndaşı Vüsal Şilderi öldürməkdə təqsirli bilinən Elman İsgəndərov və Seymur Talıbovun apelyasiya şikayəti üzrə məhkəmə prosesi başlayıb.

Elman İsgəndərov qohumu Seymur Talıbov, Xəyal Əlizadə və qeyriləri ilə qabaqcadan əlbir olaraq, sonuncunun yaxın qohumuna münasibəti dəyişmək niyyəti ilə Vüsal Şilderə xəsarət yetirmək qərarına gəlib. Bu məqsədlə o, bir müddət Vüsal Şilderi güdüb.

2 may 2013-cü ildə günorta saatlarında Bakı şəhəri, Ə.Rəcəbli küçəsi 3 B saylı evin qarşısında Vüsal Şilderə yaxınlaşaraq, ona boyun və ürək nahiyəsindən zərbələr endirib. Aldığı xəsarətlər nəticəsində Vüsal Şilder dünyasını dəyişib.

İki gün sonra Elman İsgəndərov şübhəli şəxs qismində tutulub. Keçirilmiş əməliyyat-axtarış tədbirləri nəticəsində Seymur Talıbov hadisədən 2 ay sonra tutularaq istintaqa təhvil verilib. Sözügüdən cinayəti iştirakçısı Xəyal Əlizadə isə, istintaqdan qaçıb gizləndiyinə görə barəsində axtarış elan olunub.

Cinayət işində adı hallanan Xəyal Əlizadə uzun illər daxili işlər orqanlarında yüksək vəzifələrdə çalışmış Məzahir Əliyevin oğlu, Prezident Administrasiyasının sabiq işçisi Tariyel Ağayevin (mərhum prezident Heydər Əliyevin keçmiş köməkçisi-red.) kürəkənidir. Bir müddət əvvəl Xəyal Əlizadənin Birləşmiş Ərəb Əmirliklərində saxlanıldığı və ekstradisiya olunması üçün tədbirlər görüldüyü barədə məlumat da verilmişdi.

Elman isgəndərov Cinayət Məcəlləsinin 120.2.5-ci (tamah məqsədi ilə və ya sifarişlə, habelə zərərçəkmiş şəxsin orqanlarından və ya toxumalarından istifadə etmək məqsədi ilə adam öldürmə), 228.4-cü (Qanunsuz olaraq qaz silahını, soyuq silahı, o cümlədən tullayıcı silahı əldə etmə, satma və ya gəzdirmə, milli geyim ləvazimatı hesab olunan ərazilərdə və ya ovçuluq peşəsi ilə bağlı olaraq soyuq silahı gəzdirmə), Seymur Talıbov isə, həmin məcəllənin 307.1-ci (ağır və ya xüsusilə ağır cinayətin hazırlanmasını və ya törədilməsini bilərək həmin cinayət barəsində xəbər verməmə) maddəsi ilə ittiham edilib.

Bakı Ağır Cinayətlər Məhkəməsinin hökmü ilə Elman İsgəndərova 15 il, Seymur Talıbov isə 2 il müddətinə azadlıqdan məhrum edilib. Hökmdən narazı qalan təqsirləndirilən şəxslər, apelyasiya şikayəti veriblər. Elman İsgəndərov cəzasının yüngülləşdirilməsini istəyib. Seymur Talıbov isə günahsız olduğunu əsas gətirərək, barəsində bəraət hökmünün çıxarılmasını xahiş edib. Həmçinin zərərçəkmiş tərəf də hökmdən narazı qalıb və onlar da təqsirləndirilən şəxslərin cəzalarının ağırlaşdırılması ilə bağlı apelyasiya instansiyasına müraciət ediblər.

Hakim Mirpaşa Hüseynovun sədrliyi ilə keçirilən prosesdə tərəflərin şikayəti üzrə ilkin baxış iclası olub. Prosesdə apelyasiya şikayətlərinin dəlilləri araşdırılıb. Apelyasiya şikayətlərinin verilməsində bəzi məsələlərdə problemlər yaranıb və buna görə də, iş yenidən birinci instansiya məhkəməsinə qaytarılıb.

Mərhum Vüsal Şilderin anası Mətanət Poladxan qızı Şilder deyib ki, cinayət işində adı keçən Xəyal Əlizadənin İnterpol xətti ilə axtarışda olmadığını dedi: “Oğlumun qətlinin əsas təşkilatçısı bu adamdır. Prokurorluqdan bizə dedilər ki, Xəyal Əlizadəni interpol xətti ilə axtarışa vermişik, həbs olunub. Amma biz özümüz müəyyən etdik ki, Xəyal Əlizadənin adı axtarışda olmayıb, heç kim də onu tutmayıb. Bizdə olan məlumata görə, hal-hazırda Dubayda dincəlir”.

Mətanət Şilder deyir ki, istintaqın niyyəti həbsdə olan üç nəfərin həbs müddəti bitdiyinə görə, Xəyal Əlizadənin işini onlardan ayırmaq, məhkəməyə göndərməkdir: “Amma bizə bu üç nəfər maraqlı deyil, bizi əsas qətlin sifarişçisi maraqlandırır”.

Qeyd edək ki, Vüsal Şilderin atası Adolf Şilder bir vaxtlar “MercedesBenz”in Azərbaycan nümayəndəliyinin rəhbəri işləyib. Vüsal Şilder Mətanət Şilderin birinci həyat yoldaşından olan oğlu olub. Mətanət Şilder AdolfŞilderilə ikici dəfə ailə həyatı qurub. Adolf Şilder Mətanətin birinci həyat yoldaşından olan oğlu Vüsalı isə oğulluğa götürüb.