Lütvəli Babayevin əməlləri əhalinin səbrini son həddə çatdırıb

Böyük xalq etirazlarının bir-birinin ardından baş qaldırması paralel olaraq yerlərdəki məmurlarda da böyük həyəcan yaradıb. Onlardan biri isə Zərdab rayon icra hakimiyyətinin başçısı Lütfəli Babayevdir. Bildirək ki, adı bir çox qalmaqallarda hallandırılan Lütfəli Babayev bir zamanlar Mincgəçevirə rəhbərlik edirdi.

Zərdabda etirazlar başlayır

Şeyxin adamı kimi ciddi şəkildə qorunan Lütfəli Babayevin qardaşı Şirvan bölgəsinin və eyni zamanda Mingəçevir şəhərinin axundudur. Onun, yəni axund olan Xanəli Babayevin adı isə narkotik qaçaqmalçılığında, həmçinin azyaşlı bir qızın zorlanmasında hallandırılsa da, Lütfəli Babayev qardaşını mühakimə olunmaqdan qorumağa müvəffəq oldu. Bu işdə isə Allahşükür Paşazadənin çətiri altında olması faktı təbii ki, mühüm əhəmiyyət kəsb etmiş oldu.
Beləcə, Mingəçevirdə böyük xalq qəzəbinin hədəfinə çevrilən Babayevlərin sonrakı hakimiyyət ünvanları Zərdab oldu və illərdir ki, Lütfəli Babayev Zərdab rayon camaatına istədiyi zülmü edir və bunun müqabilində ona «gözün üstündə qaşın var» deyəcək birisi də müşahidə olunmur. Təbii ki, yenə də Şeyxin hökmlü müdafiəsi Babayevlərin işinə yarayır. Nəticədə bir qadın tərəfindən zorlamada ittiham olunan Lütfəli Babayev nəinki həbsdən yayınmağa müvəffəq olur, hətta həmin qadını şərlədərək həbs də etdirir.
Redaksiyamıza Zərdabdakı mənbələrdən daxil olan informasiyalardan isə aydın olur ki, digər rayonların ayaqlanması Zərdab rayon sakinləri üçün də stimul rolunu oynayıb: «Təbii ki, Lütfəli Babayevə qarşı hər zaman narazılıq olub və indi bu narazılığın şiddəti daha da yüksəkdir. Artıq rayon sakinləri arasında icra başçısının istefa tələbi ilə aksiya tədarükü görülür. Və yaxın günlərdə bütün Azərbaycan Zərdab camaatının edəcəklərindən danışacaq».

Şeyxin zəifləyən dayağı

Onu da xatırladaq ki, Lütvəli Babayev bütün Qafqazın şeyxi Hacı Allahşükür Paşazadənin adamı hesab olunur və onun qardaşı Hacı Xanəli Babayev Mingəçevirin və Şirvanın axundudur. Ona qarşı isə bir ara dövrü mətbuatda çox sərt ittihamlar irəli sürülmüşdü, hətta axund Mingəçevir mədrəsəsində təhsil alan azyaşlı qızlardan birini zorlamada da ittiham olunurdu. Hacı Xanəliyə qarşı ittihamlar içində onun narkotiklə bağlılığı ilə də məqamlar var idi.
İndi isə məlum olur ki, arxalarında Şeyxin dayandığı Babayev qardaşları yenə də şakyətlərə nədən olmaqdadırlar. Amma bu uzun sürməyəcək. Bu barədə redaksiyamıza məlumat verən hökumət içindəki qaynaq bildirir ki, Lütvəli Babayevin artıq vaxtı yetişib və onun vəzifədən çıxarılması an məsələsidir.Qeyd edək ki, bir sıra KİV-lər son zamanlar ümumiyyətlə Şeyxin mövqelərinin zəifləməsi barədə xəbərlər yayırlar. Buna görə də Hacı Allahşükür Paşazadənin əvvəlki qaydada Babayev qardaşlarının arxasında dayanmayacağı da məlum olur.
Bu arada bir başqa mənbə isə bildirib ki, əslində öz hakimiyyətinə qarşı böyük xalq etirazlarının olacağından xəbər tutan Zərdabın icra başçısı «yuxarıları» vəziyyətlə bağlı məlumatlandırmaqla yanaşı, həm də könüllü olaraq istefaya getmək istədiyini də bildirib. Hökumət içindəki qaynaq iddia edir ki, Lütfəli Babayevin bu təşəbbüsü artıq Prezident Administrasiyasında müzakirə olunur.

Altı min manatlıq əməliyyat

Vətən Uğrunda Şəhid Ailələri və Milli Qəhrəmanlar Birliyi Zərdab rayon şöbəsinin sədri Sarıyev Vüqar Nazir oğlu bir müddət öncə Rayon İcra Hakimiyyətinin başçısı Lütvəli Babayevin və RİH-nin Zərdab şəhəri üzrə nümayəndəsi Hafiz Kərimovun dələduzluq əməllərinin qurbanı olması və nəticədə 6000 (altı min) manat məbləğində maddi ziyana məruz qalması haqda məsələ qaldırmışdı.
Ərizədə bildirilir ki, 2010-cu ilin avqust ayında V.Sarıyev başçı L.Babayevlə görüşüb. Həmin görüşdə V.Sarıyev sahibkarlıqla məşğul olmaq niyyətini və bu məqsədlə ona torpaq sahəsi ayrılması (satılması) barədə xahişini icra başçısına bildirib. Qısa sürən müzakirələrdən sonra tərəflər 5000 (beş min) manat müqabilində yeni sahibkara 500 kv.m torpaq sahəsi ayrılacağı barədə razılığa gəlirlər.
Bir neçə gün sonra Vüqar Sarıyev razılaşdırılmış məbləği gətirərək nəğd şəkildə Lütvəli Babayevə verir və icra başçısı da öz növbəsində torpaq sahəsinin ayrılması və sənədlərin hazırlanmasına dair dərhal müvafiq göstərişlər verir. Daha bir neçə gündən sonra bütün lazımi sənədlər, o cümlədən 500 kv.m torpaq sahəsinin ayrılmasına dair Zərdab RİH memarlıq və tikinti şöbəsinin müdiri Sahid Əhmədo tərəfindən imzalanmış rəy, Dövlət Torpaq və Xəritəçəkmə Komtəsi Zərdab rayon şöbəsinin rəyi, Torpaq şöbəsi tərəfindən çəkilmiş plan, torpaq sahəsinin ayrılmasına dair tərtib olunmuş və on təşkilat tərəfindən imzalanmış akt hazırlanmış və həmin sahə V.Sarıyevə göstərilib.
Həm Lütvəli Babayev, həm də Hafiz Kərimov Vüqar Sarıyevə bildirirlər ki, bir neçə günə sərəncam veriləcək və artıq tikinti işlərinə başlamaq olar. Bu vədlərin müqabilində V.Sarıyev həmin ərazidə təqribən 1000 (min) manatlıq qum-çınqıl tökmə işləri gördürür. Lakin bütün bunlardan sonra sərəncam ləngidilərək hələ də verilmir.
Bir neçə gündən sonra isə L.Babayevin əsil məqsədi özünü büruzə verir. Belə ki, icra başçısı yeni formalaşan sahibkardan əlavə olaraq daha 5000 (beş min) manat ödəməsini tələb edir. Buna imkanı çatmadığını və ən əsası da bu tələbin razılaşmaya uyğun olmadığını bildirən Vüqar Sarıyev əlavə məbləği ödəməkdən imtina edir. Lakin iştahasını boğa bilməyən L.Babayev də güzəştə getmir. Nəticədə isə V.Sarıyev həm sərəncamsız, həm də pulsuz qalır. Təbii ki, Lütvəli Babayevin və Hafiz Kərimovun aldıqları pulu qaytarmaq barədə düşündüklərini belə ehtimal etmək çətindir.Vüqar Sarıyevin yeganə ümidi isə şikayət ərizəsi ilə müraciət etdiyi müxtəlif instansiyaların görəcəkləri tədbirlərə qalıb. Lakin bu instansiyaların da əksəriyyəti həmin ərizələri araşdırılması üçün məhz elə L.Babayevin üzərinə ünvanlayır.

Xalqın səbrini daşdıran olaylar

Zərdab icra başçısının adı başqa bir olayda da hallanmışdı. Söhbət Zərdabın icra başçısı Lütfəli Babayevin rayon sakini Şəfəq Səfərəliyevaya təcavüz etməsi, sonra isə qadını şərləyərək həbs etdirməsindən gedir. Qadının keçmiş Yaqub Səfərəliyev və oğlu Aydın Aydınlı hadisə ilə bağlı etatist.com saytına geniş müsahibə veriblər. Onlar bildiriblər ki, icra başçısı iyrənc əməlindən sonra onlara kabinetinə dəvət edərək Şəfəq Səfərəliyevanın əxlaqsız olduğunu deyib. Lütfəli Babayev onlara “siz dəliqanlısız, birdən gedib o qadını öldürərsiz ha?! O qadını öldürməyin” deməklə guya onları cinayətdən çəkindirmək istəyib. Əslində icra başçısının planı Şəfəq Səfərəliyevanı keçmiş əri və oğlu vasitəsilə aradan götürmək olub. Qadının əri hadisə barədə deyib: “Şəfəq, Lütvəli Babayevin otağında olanda, müavini Pərvini çağırtdırıb, gələndən sonra Pərvinə him-cim edib, nə edibsə, Pərvin deyib ki, qoy gedim sənədi götürüm, gəlim. Çıxıb çölə. Gəlin qalıb içəridə. Oturandan sonra əlinin içini qıdıqlayıb. Sonra deyib ki, arxa tərəfdə otaq var, gör ərin buranı nə günə qoyub. O da deyib mənim ərim burda nə gəzir?! Lütvəli də deyib ki, sən nə danışıran?! Gəl otağa bax. Gələndə tutub boynunun dalından. Bu da çox açıqlaya bilmir nə edib. Oğlundan utandığı üçün”. Yaqub Səfərəliyev əlavə edib ki, Şəfəq Səfərəliyevanı icra başçısının əlindən qurtulmaq üçün onun sifətini cırmaqlayıb. Qadının bu məsələni ictimailəşdirməsi isə icra başçısının onu şərləyərək tutdurmasına səbəb olub. İcra başçısı Lütvəli Babayevin qadına təcavüzündən sonra rayonu şoka salan başqa bir əxlaqsız olay baş verib.
Zərdab rayonu Alıcanlı kəndində heç bir əxlaqa və insanlığa sığmayan dəhşətli olay baş verib. Sözügedən kəndin sakini, 7-ci sinif şagirdi olan qız (məlum səbəblərdən adı açıqlanmır) dünyaya uşaq gətirib.
Azyaşlının hamiləliyindən heç kəsin xəbərdar olmadığı bildirilir. Hadisə baş verən gün məktəbə gələn qızın ağrıları məhz təhsil müəssisəsində tutub. Təcili olaraq həkimə çatdırılan qızın hamiləliyi və uşağın doğulmaqda olduğu məhz bu zaman aşkarlanıb.
Zərdab Rayon Mərkəzi Xəstəxanasının baş həkimi Ruslan Nemətov açıqlamasında baş vermiş hadisəni təsdiqləsə də, bu barədə ətraflı danışmaq istəməyib: “Mən bu barədə heç bir məlumat verə bilmərəm. Kriminal hadisədir. Mənim bu barədə danışmağa ixtiyarım yoxdur. Iş Zərdab Rayon Polis Şöbəsində araşdırılır. Onların nəzarətində olduğuna görə, hadisə ilə bağlı ancaq Polis şöbəsi məlumat yaya bilər”.
Həmçinin məlumata görə, Zərdab Rayon Təhsil Şöbəsində toplantı keçirilib. Toplantıda 13 yaşlı ananın təhsil aldığı Alıcanlı kənd məktəbinin direktorunun fəaliyyəti sərt şəkildə tənqid olunub. Təhsil Şöbəsinin keçirdiyi iclasın əsas məqsədi informasiyanın yayılmasının qarşısını almaq olub.
Elçin