Məhkəmə dələduzluqda ittiham olunan şəxslərin işinə yenidən baxır

Heydər Əliyev Fondu və dövlət qurumlarının adından istifadə etməklə dələduzluq törətməkdə təqsirləndirilən 11 nəfərdən ibarət mütəşəkkil dəstə üzvlərinin cinayət işi üzrə məhkəmə prosesi başlayıb.

İttihama görə, Nadir Qasımov Kamil Seyidov, Arif Hüseynov, Muxtar Vəliyev, Rauf Axundov, Malik Mehdiyev, Anar Abbasov, Nadir Qasımov, Vaqif Ələkbərov, Elçin Zülfüqarov , Rövşən Rəhimov, Bayram Hüseynovdan ibarət mütəşəkkil dəstə yaradıb.

Mütəşəkkil dəstənin üzvləri iş adamı Muxtar Vəliyevə məxsus tikinti-inşaat işlərinin layihələşdirilməsi üzrə fəaliyyət göstərən “Master-Dizayn” şirkətinin texniki imkanlarından istifadə edərək, saxta müqavilə və layihələr hazırlayıb, təqdim ediblər.

Azərbaycanda sahibkarlıq fəaliyyəti ilə məşğul olan çoxlu sayda iş adamına guya Heydər Əliyev Fondu və ayrı-ayrı dövlət orqanları tərəfindən maliyyələşən müxtəlif tikinti sifarişlərinin

veriləcəyi barədə yalan vədlər veriblər. Yalan yolu ilə onların əmlaklarını ələ keçirərək, külli miqdarda ziyan vurublar. Dəstənin son iki ildə iş adamlarından təxminən 809 min manat və 300 min ABŞ dolları məbləğində pulu dələduzluq yolu ilə ələ keçirilməsi müəyyən edilib. Dəstə üzvlərini Milli Təhlükəsizlik Nazirliyinin əməkdaşları həbs ediblər.

Bakı Ağır Cinayətlər Məhkəməsinin hökmü ilə Kamil Seyidov 13 il, Arif Hüseynov 13 il, Muxtar Vəliyev 13 il, Rauf Axundov 10 il, Malik Mehdiyev 11 il, Anar Abbasov 13 il, Nadir Qasımov 10 il, Vaqif Ələkbərov 10 il, Elçin Zülfüqarov 9 il, Rövşən Rəhimov 9 il, Bayram Hüseynov 1 il 6 ay müddətinə azadlıqdan məhrum edilib. Həmin hökmdən narazı qalan təqsirləndirilənlər apelyasiya şikayəti veriblər. Onlar şikayətlərində cəzalarının yüngülləşdirilməsini istəyiblər.

Hakim Abid Abdinbəyovun sədrliyi ilə keçirilən prosesdə təqsirləndirilən şəxslərin apelyasiya şikayəti üzrə qərar elan edilib. Qərara görə, təqsirləndirilən şəxslərdən biri Kamil Seyidova aid hissədə hökm qismən dəyişdirilib. Məhkəmə onun cəzasını xüsusi rejimli cəza çəkmə müəssisəsində çəkməsi ilə bağlı qərarı ləğv edib və onun ciddi rejimli cəza çəkmə müəssisəsində cəzasını çəkməsi barədə qərar qəbul edib. Məhkəmə Kamil Seyidovun oğluna aid evin müsadirə edilməsi barədə qərarı ləğv edib. Qərara görə, digər təqsirləndirilən şəxslərin apelyasiya şikayəti təmin edilməyib. Ali Məhkəmə isə təqsirləndirilən şəxslərin kassasiya şikayətini təmin etməyib.

Bakı Apelyasiya Məhkəməsində, hakim Mirpaşa Hüseynovun sədrliyi ilə keçirilən prosesdə təqsirləndirilən şəxs Bayram Hüseynovun Cinayət Məcəlləsinin 320.1-ci maddəsi apelyasiya şikayəti verilməsi üçün buraxılmış prosessual müddətin

bərpasına dair vəsatət verib. Həmin vəsatətlə bağlı ilkin dinləmə olub. Məhkəmənin baxış iclası mayın 15-nə təyin edilib.

Qeyd edək ki, təqsirləndirilən şəxslərdən Nadir Qasımovun barəsində olan Cinayət Məcəlləsinin 178.3.2-ci (külli miqdarda dələduzluq əməli törətmək) maddəsi ilə istintaq davam edib. İstintaq zamanı müəyyən edilib ki, Nadir Qasımov bir çox vətəndaşlara özünü Nazirlər Kabinetinin vəzifəli şəxsləri kimi təqdim edib.

O, vətəndaşları özünə inandırmaq üçün dələduzluq proseslərini Nazirlər Kabinetinin qarşısında həyata keçirib. Belə ki, Nadir Qasımov vətəndaşlardan iş görmək adı ilə pul almaq üçün görüş yerini Nazirlər Kabinetinin qarşısına təyin edib. Əvvəlcədən hakimiyyət qurumunun qarşısına gələn Nadir Qasımov orada pusquda dayanıb. Elə ki, görüşmək üçün gələn vətəndaşı görərkən Nazirlər Kabinetinin qapısına tərəf qaçıb və guya hakimiyyət qurumundan çıxması görüntüsünü yaradaraq həmin vətəndaşla görüşüb. Onunla görüşməyə gələn həmin şəxs

Nadir Qasımovun Nazirlər Kabinetində işləməsinə inanıb, onun iş görəcəyini bilib. Lakin Nadir Qasımovun məqsədi bu yolla vətəndaşları aldadıb, onlardan külli miqdarda pul almaq olub. O, beləliklə, əməllərinə nail olsa da, istintaqa çoxsaylı şikayətlər əsasında barəsində təkrar cinayət işi başlayıb.

Bakı Ağır Cinayətlər Məhkəməsinin hökmü ilə Nadir Qasımovun barəsində olan əvvəlki cəzanın yeni təyin olunacaq cəza ilə birləşdirilməsini və barəsində qəti olaraq 13 il müddətinə azadlıqdan məhrum edilib.