Müdafiə Komitəsinin sədri Azad Mursaliyev:
“Müdafiə Komitəsinin əsas məqsədi qanunlar çərçivəsində
Mahir Abdullayev tapılaraq ailəsinə təhvil verilməsi, onu
oğurlayanların isə qanun qarşısında cavab verməsidir”

Ötən həftə oğurlanmış Mahir Abdullayevin hüquqlarını müdafiə komitəsinin yaradılacağı haqda məlumat vermişdik. Azadlıqnews.tv-yə verilən məlumata görə artıq müdafiə komitəsi rəsmən təsis edilib. Bizə verilən məlumata görə bu gün hüquq müdafiəçilərinin, media təmsilçilərinin, QHT nümayəndələrinin və M.Abdullayevin yaxınlarının iştirakı ilə Mahir Abdullayevin Hüquqlarını Müdafiə Komitəsinin ilk iclası keçirilib. İclasda Müdafiə Komitəsinin yaranma zərurəti və qarşıya qoyduğu məqsədlər haqda danışılıb. M.Abdullayevin yaxın qohumu Azad Mursaliyev Müdafiə Komitəsinin sədri seçilib.
Məlumatla bağlı A.Mursaliyevlə əlaqə saxladıq. O Müdafiə Komitəsinin yaradıması haqda xəbəri təsdiqlədi: “Biz, bir qrup şəxs- Mahir Abdullayevin yaxın qohumları, ziyalılar, hüquq müdafiəçiləri, ictimai fəallar, medai mənsubları olaraq Mahir Abdullayevin hüquqlarının Müdafiə Komitəsini yaratdıq. Mahir Abdullayevin hüquqlarının Müdafiə Komitəsini yaratmaqda əsas məqsəd 10 ilə yaxındır ki, taleyi haqda heç bir məlumat olmayan, oğurlanmız Azərbaycan vətəndaşının, MTN zabiti – Mahir Abdullayevin durumuna aydınlıq gətirilməsidir. Unutmayaq ki, bir insanın oğrulanması, onu ailəsindən, yaxınlarından, iş yerindən, cəmiyyətdən təcrid etmək, gizli saxlamaq və bu günə qədər taleyinin və yerinin qeyri- müəyyən olması insanlıq və qanunlar adına utanc olmaqla bərabər dünyanın ən ağır cinayətlərindən biridir. Müdafiə Komitəsinin əsas məqsədi qanunlar çərçivəsində Mahir Abdullayev tapılaraq ailəsinə təhvil verilməsi, onu oğurlayanların isə qanun qarşısında cavab verməsidir.” A.Mursaliyev həmçinin yaxın günlərdə Müdafiə Komitəsinin media üçün geniş açıqlama verəcəyini və mətbuat konfransı keçiriləcəyini bildirdi.
Xatırladaq ki, 2 övlad atası Mahir Abdullayev 2003- cü ilin 13 oktyabrında gözlənilməz şəkildə oğurlanır. Təəssüflə qeyd etmək lazımdır ki, həmin hadisədən 10 il keçməsinə baxmayaraq M. Abdullayev tapılaraq ailəsinə təhvil verilməyib. Ötən müddət ərzində bu istiqamətdə müxtəlif dövlət orqanlarına onun yaxınları, xüsusən qardaşı Elşad Abdullayev tərəfindən çox saylı müraciətlər edilsə də müsbət nəticə əldə olunmayıb. Mahir Abdullayevin oğurlanması faktı ilə bağlı Azərbaycan Respublikası CM- nin müvafiq maddəsi ilə cinayət işi qaldırılsa və Prezidentin göstərişi ilə Müstəqil İstintaq Komissiyası yaradılsa da onun tapılması və cinayətkarların aşkarlanıb cəzalandırılması ilə bağlı hər hansı nəticə əldə etmək mümkün olmayıb. Ortada müəyyən faktların, şəxslərin adlarının keçməsinə baxmayaraq Azərbaycan dövlətçiliyinin və qanunların aliliyi prinsiplərinə utanc və xələllik gətirən ziyalı bir şəxsin, MTN mayorunun oğurlanması faktı bu günə qədər obyektiv və operativ araşdırılıb hüquqi qiymətini almayıb.