Şahin Verdiyev və onun qoluzorlu dostları ümumi söhbətə razı olmurlar və “NİSSAN MAXİMA” markalı nəqliyyat vasitəsini geri qaytara bilirlər. Son olaraq da onu vurğulayırlar ki, daha maşın da, vermiş olduğunuz pullar da sizlik deyil

Son vaxtlar ictimai həyatımızda baş verən sosial problemlər, qol qoyulan dələduzluq əməlləri və digər xoşagəlməz olaylar tüğyan etdikcə, o halda bilib başa düşürük ki, hələ də bəzi şəxslər atdıqları addımların mahiyyətinə diqqətlə yanaşmırlar. Belə bir səbəblər üzündən də, çox zaman kimlərsə süründürməçilik əməlləri ilə üz-üzə qalırlar, tərəflər arasında vətəndaş narazılığına səbəb olan amillər də, hədsiz dərəcədə çoxalır.

Hələ bir müddət bundan əvvəl, üzləşdiyi problemin mahiyyətini bizimlə bölüşən Göyçay rayonu Heydər Əliyev prospekti ev-6 ünvanında yaşayan Abdulılayev Zamiq Cümşüd oğlu, redaksiyamıza təqdim etdiyi şikayət ərizəsində yazır ki, “mən bu gün elə bir olayla üz-üzə qalmışam ki, düşdüyüm problemdən nə qədər çalışsam da çıxa bilmirəm. Buna səbəb, Tovuz rayonunda anadan olan və hal-hazırda Sumqayıt şəhərində yaşayan Şahin Verdiyev adlı şəxslə, aramızda olan razılaşmanın xoşagəlməz duruma düşməsidir. Yəni, mən 04 may 2015-ci il tarixdə əslən Tovuz rayonundan olan və Sumqayıt şəhəri YAT-6A, Sülh küçəsi ünvanında yaşayan Verdiyev Şahin Vaqif oğluna məxsus “NİSSAN MAXİMA” markalı nəqliyyat vasitəsini, Sumqayıtdakı maşın bazarından aramızda əldə etdiyimiz razılaşma əsasında 8 min manata, yalnız avtomobili idarə etmək şərtilə yaxın dostum Sumqayıt şəhəri MİK-5 ev-39/68 mən-56 ünvanında qeydiyyatda olan Məmmədov Rövşən Mirhəsən oğlunun adına, 10 ay 23 gün müddətinə və hər ay da 450 manat ödəmək şərtilə aldım. İkin olaraq Şahin Verdiyevə 3 min manat nağd pul, iyun ayında isə 450 manat pul çatdırdım. İyul ayı üçün verəcəyim 450 manatı bir qədər gecikdirsəm də, həmin ay qeyd olunan məbləği deyil, 400 manat pulu “NİKOİL BANK”ın Bərdə şöbəsindən Verdiyev Şahin Vaqif oğlunun adına göndərmişəm. Bu barədə bankın verdiyi rəsmi sənəd də var. Və verəcəyim pulun 50 manatını isə, yol maşını ilə ona çatdırmışam. İyul ayına qədər verdiyim pullarla bağlı, bir neçə şahidim də var. Onlardan Emin Məmmədov, adına etibarnamə verilmiş şəxs Rövşən Məmmədov, Pərviz Əliyev, Nadir İsmayılov, Tural Məmmədov, Tariyel Məmmədov, Orxan və digərləri bunu təsdiq edə bilərlər.

Avqust ayı üçün verəcəyim pulu müəyyən səbəblər üzündən gecikdirdiyimə görə, o, mənə, qardaşım Natiq Abdullayevə və dostum Vüqar adlı şəxsə zəng edərək “NİSSAN MAXİMA” markalı nəqliyyat vasitəsinin geri qaytarılmasını qəti surətdə tələb etdi. Sentyabr ayının birinci ongünlüyü olmasına baxmayaraq, yenə də verəcəyim pulu düzəldib verə bilmədim. Buna səbəb, müəyyən şəxslərdən alacağım pulları, həmin şəxslərin gecikdirməsi oldu. 12 sentyabrda isə Şahin Verdiyev və onun qoluzorlu dostları zəng edib məni hədələdilər və maşını geri qaytarmayacağım təqdirdə, mənim üçün pis olacağını da söylədilər. 15 sentyabrda qeyd olunan nəqliyyat vasitəsini dostum Vüqar qardaşım Natiqlə birlikdə Sumqayıta apardılar ki, problemlə

bağlı onunla söhbət edib ümumi razılığa gəlsinlər. Amma, həmin gün Şahin Verdiyev və onun qoluzorlu dostları ümumi söhbətə razı olmurlar və “NİSSAN MAXİMA” markalı nəqliyyat vasitəsini geri qaytara bilirlər. Son olaraq da onu vurğulayırlar ki, daha maşın da, vermiş olduğunuz pullar da sizlik deyil.

Belə bir səbəblər üzündən də, redaksiyamıza üz tutan və Şahin Verdiyevə vermiş olduğu pullarının geri qaytarılması istəyində olan Zamiq Abdullayev, hal-hazırda üzləşdiyi probleminin ictimailəşməsinə də çalışır. Biz də bir redaksiya olaraq inanırıq ki, tərəflər arasında əmələ gəlmiş xoşagəlməz durum, bu gün qanunlarımızın tələb etdiyi formada və hüquq-mühafizə orqanı əməkdaşlarımızın səyi ilə qaydasına düşəcək. Qarşı tərəfi də dinləməyə hazırıq.

Problemin varlığını diqqətdə saxlayacağıq.

Mətləb

gundemxeber.az