Azərbaycanda son dövrlərdə doğuş zamanı ana və uşaq ölümlərinin statistkası ciddi araşdırmaların aparılmasına əsas olsa da, aidiyyatı qurumlar susmağa və bu məsələnin üstündən keçməyə çalışırlar. Xüsusən dövlət xəstəxanalarında baş verən bu dəhşətli hadisələr müvafiq qurumlar tərəfindən araşdırılıb yetərincə qiymətləndirilmədiyindən proseslər artan templə təhlükəli sonluğa doğru gedir. Bir müddət əvvəl jurnalist Həsən Babayev övladının Akademik Mirqasım Adına Respublika Klinik xəstəxanasında ölməsi, xəstəxanada olan özbaşınalıq, həkim məsuliyyətsizliyi, insanların həyatına açıq şəkildə qəsd edilməsi fakt ilə bağlı mətbuatda müraciət yaymışdı. Məsələ ictimailəşdirildikdən sonra Səhiyyə Nazirliyinin mətbuat xidməti açıqlama yayaraq bildirmişdir ki, uşaq ölümləri ilə bağlı komissiya hadisəni araşdırır. Jurnalistin sözlərinə görə, bundan sonra nazirlik susmağa üstünlük verdi. Hazırda Avstriyada yaşayan jurnalist H.Babayev “Gündəm Xəbər”-ə açıqlamasında bildirib ki, onun 2 aya yaxındır ki, Səhiyyə Nazirliyi və digər aidiyyatı qurumlara rəsmi şikayət etməsinə baxmayaraq bu günə qədər nə maraqlanan olub, nə də araşdıran: “Akademik Mirqasımov adına Respublika Klinik xəsətəxanasının Pataloji hamiləlik və Doğum şöbəsində xəstələrin və onların bətnlərində olan körpələrin həyatına açıq şəkildə qəsd edilir. Axı kimə lazımdır bu? Azərbaycanın genofondunun məhv edilməsində maraqlı olan qüvvə kimdir və ya kimlərdir? Hesab edirəm ki, bu çox ciddi məsələdir. Əgər Səhiyyə Nazirliyi və onun tabeliyində olan xəstəxanalar hüquq mühafizə və xüsusi xidmət orqanları tərəfindən yoxlanılarsa, çox ciddi faktlar meydana çıxar. Bizim övladımızı öldürdükləri gün xəstəxanada bir neçə uşaq ölümü qeydə alınıb. Təsəvvür edin, ölüm hadisəsi baş verir və heç bir qurum maraqlanmır. Yoldaşımı əməliyyat edən həkim M.Mirqasımov adına Respublika Klinik Xəstəxanasının Pataloji Hamiləlik şöbəsinin müdiri Z.Abbasov deyir ki, uşaq iki dəfə nəfəs aldı və öldü. Adıgedən xəstəxananın "Şüa-Diaqnostika” şöbəsinin müdiri Fəridə Orucovanın həmin günü səhər saatlarında etdiyi müayinə vərəqində qeyd edir ki, uşağın ürək döyüntüləri yaxşıdır. Ekspert isə verdiyi rəsmi sənəddə uşağın ana bətbnində minimum 24 saat ölü qaldığı bildirilir. Dövlət xəstəxanasının və ekspertin verdiyi rəylər bir-birini təkzib edir. Baxın bu da Azərbaycan səhiyyəsinin siması. Yoldaşım səhər saatlarında yüksək təzyiqlə xəstəxanaya yerləşdirilir və onda heç bir problemin olmadığını deyərək qeydiyyatını ləğv edib evə buraxırlar. Günorta saatlarında yenidən vəziyyəti ağırlaşdığı üçün M.Mirqasımov adına Respublika Klinik Xəstəxanasının Pataloji Hamiləlik şöbəsinə qəbul edilir və axşam saat 19:30 radələrində əməliyyat olunanadək bilə-biləki xəstənin yüksək təzyiqi var, bətnindəki körpənin və özünün həyatı üçün təhlükə ola bilər, ona heç bir profilaktiki tədbir görülmür. Növbətçi həkim isə ümumiyyətlə prosesə müdaxilə etmir. Hansı ki, növbətçi həkim şöbəyə daxil olan hər bir xəstə üçün cavabdehdir”. Jurnalsitin xanımı Avstriyanın Vyana Universitetinin doktorantı Günel Babayeva isə baş vermiş hadisə ilə bağlı bunları deyib: “2015-ci ilin əvvəlində Almaniyada yaşamağı planlaşdırmağımıza baxmayaraq ana olacağımı bildikdən bir müddət sonra Berlindən Bakıya qayıtmağa, övladımızı Azərbaycanda dünyaya gətirməyə qərar verdik. Amma çox təəssüflər olsun ki, bu qərarımız birmənalı şəkildə gələcəyimizi qaraltdı, ona olan ümidlərimizi puç, gələcək planlarımız isə alt-üst elədi. Bu da Azərbaycanda həkimlik məsuliyyətini dərk etməyən ağxalatlıların şüursuz davranışlarının nəticəsində baş verdi. Bu qənaətə mən deyil, müayinələrimə əsasən Avstriyanın tanınmış həkimləri gəlir. Onların rəylərinə görə, tibbdə edilən bu səhv sivilizasiyadan uzaq, tənha bir adada köməksiz insanın başına gətiriləcəyi bir məqamdır. Müraciət etdiyim hər həkim ilk olaraq bu hadisənin hansı ölkədə baş verdiyini soruşur. Böyük təəssüf hissi ilə mən Azərbaycan adını çəkməli oluram. Daha başa sala bilmirəm ki, Vətənim də səhiyyədəki “cəllad”lar ucbatından artıq xəcalət çəkir. Çünki Vətən torpağı yaşamağa haqqı olan balaca bir mələyi anasından ayırıb vaxtsız öz qoynuna alır...” Sonda Həsən Babayev qəzetimiz vasitəsi ilə Prezident İlham Əliyevə müraciət edərək hadisənin araşdırılmasını xahiş edir: “Bu təkcə bizim faciəmiz deyil. Bu gün yaramaz “həkim”lərin qurbanı biz olduq. Sabah başqası olacaq. Bu səbəbdən ölkə başçısı cənab İlham Əliyevdən məsələnin ciddi araşdırılması və cinayət törətmiş ağxalatlıların cəzalandırılmasını xahiş edirəm.

” Gündəm Xəbər