Rusiya İrana S-300 zenit-raket sistemləri satışı prosedurlarına başlayıb.

gundemxeber.az saytı “Reuters”ə istinadən xəbər verir ki, bu bəyanatla İranın Rusiyadakı səfiri Mehdi Sənai çıxış edib.

“İrana S-300-lərin satılması prosesi artıq gerçəkləşdirilməyə başlayıb” - deyə səfir bildirib.

İranın müdafiə naziri Hüseyn Dehqan bundan əvvəl bəyan etmişdi ki, İran S-300 sistemlərini ilin sonunadək alacaq. Nazir bu zaman yerli təqvimi nəzərdə tutmuşdu. Cari ilin sonu İranda 2016-cı il, martın 20-nə təsadüf edir.

H.Dehqan onu da əlavə etmişdi ki, zenit-raket sistemlərinin böyük hissəsi İrana ən azı yaxın iki ay ərzində çatdırılmalıdır. Nazirin sözlərinə görə, iranlı hərbçilər hazırda Rusiyadadır və S-300-lərin istismar qaydalarını öyrənirlər.

Rusiyanın “Rostex” dövlət şirkətinin başçısı Sergey Çemezov noyabrın 9-da verdiyi açıqlamada İrana S-300-lərin satışına dair müqavilənin artıq qüvvəyə mindiyini vurğulamışdı.

“Dubai Airshow 2015” salonundan verilən məlumatda isə deyilirdi ki, İran bu zenit-raket sistemlərinin S-300PMU-2 variantını alacaq.

Rusiya prezidenti Vladimir Putin İrana S-300 sistemlərinin satışına qoyulmuş qadağanı bu ilin aprelində ləğv edib. Putin bu addımını “İranla nüvə danışıqlarında əhəmiyyətli irəliləyişin əldə olunması” ilə əsaslandırmışdı.