İcra başçısı Sumqayıtda öz kadrlarını yerləşdirməkdə israrlıdır

Son günlər Sumqayıt Şəhər İcra Hakimiyyətinin (SŞİH) başçısı Eldar Əzizovun Gəncə şəhərindən xeyli sayda kadr gətirməsi ilə bağlı məlumatlar səslənməkdədir. Bu barədə redaksiyamızı məlumatlandıran özəl mənbənin sözlərinə görə, buna səbəb prezidentin məlum çıxışından sonra bir sıra icra başçısı kimi E.Əzizovun da mövqeyinin zəifləməsidir: “Ölkə başçısının regionaların sosial-iqtisadi inkişafının dördüncü ildönümünə həsr edilən çıxşında icra başçılarının yerlərdəki özbaşınalığını sərt tənqd etməsi, məlum çıxışdan sonra Prezient Administrasiyası tərəfindən icra başçılarının sıxışdırılmasına yol açıb. Mövcud situasiyadan istifadə edərək icra başçılarını özlərindən asılı vəziyyətə salmağa çaışan Administrasiya rəhbərliyi bəzi icra başçılarının nöqsanlarından onlara qarşı əsaslı təzyiq vasitəsi kimi istifadə etməkdədir. Ötənlərdə bəzi icra başçılarının vəzifədən uzaqlaşdırılması faktı da rayon rəhbərlərini təhdid edən təhlükənin kifayət qədər ciddi olduğunu göstərir. Bütün bunlar isə E.Əzizovu öz mövqeyini möhkəmləndirmək, sədaqətinə etibar etdiyi komanda formalaşdırmaq məcburiyyəti qarşısında qoyur”.

Gəncədən kimlər hara gəlir?

Mənbənin məlumatına görə, E.Əzizovun hazırkı “kadr idxal”ında əsas məqsəd həm SŞİH-ni, həm də şəhərdəki hüquq-mühafizə orqanlarını “köhnə qvardiya” hesabına tam nəzarətə götürmək, əlavə göz və qulaqlara malik olmaqdır: “Prezidentin məlum çıxışı və onun ardınca bir sıra icra başçılarının vəzifədən qovulması göstərdi ki, əslində icra başçıları özlərini nə qədər ehtiyatlı aparsa da, onların qanunsuz əməlləri ilə bağlı informasiyalar “ta yuxarılara” qədər sızmaqdadır. Bu isə o deməkdir ki, seçki ilində xalqın etimadını qazanmaq, ən azından özbaşınalıqlara, məmur harınlıqlarla bağlı tam susqunluq göstərmədiyni isbatlamaqda qərarlı olan ölkə başçısı daha bir neçə rayon rəhbərini istefaya göndər bilər. Bu baxımdan E.Əzizov da bütün əsas qurumlarda ona sadiq olan şəxsləri yerləşdirməklə həm “zərərli informasiyalar”ın yuxarılara sızmasını önləməyə, həm də şəhərdə baş verən gadisələrdən anındaca xəbər tutmağa can atır. Və bu mənada heç şübhə yoxdur ki, Gəncədən gətirilən kadrlar E.Əzizovun daha çox eşidib, daha çox görməsini təmin edəcəkdir. Lakin bir məsələ də var ki, Sumqayıta dəvət edilən kadrların çoxluğu və onlarla yerli kadrlar arasında artıq başlanan ədavətin özü E.Əzizovla bağlı yeni və daha ciddi problemə çevrilə bilər”.

İcra başçısı polis generalından ehtiyatlanır?

Bilgili qaynağın məlumatına görə, E.Əzizovun Gəncədən kadr idxalına start verməsinin əsas səbəblərindən biri də Sumqayıt Şəhər Polis İdarəsinin yeni rəisi, polis generalı Sahib Mirzəyevin nümayiş etdirdiyi dəst-xətdir. Icra başçısı hesab edir ki, belə davam edərsə, yaxın gələcəkdə polis generalının dəsti-xətti onu da hədəfə alacaq: “E.Əzimovun “kadr idxalı” bütövlükdə ümumi vəziyyətin həssaslığından qaynaqlansa da, bu məsələdə Sumqayıt Şəhər Polis İdarəsinin rəisi general Sahib Mirzəyev amili də mühüm rol oynayır. S.Mirəzyevin Sumqayıta təyin edilməsindən sonra şəhərin bir çox nüfuzlu iş adamlarının polis rəisi tərəfindən psixoloji baxımdan “sındırılması”, qanunları pozan hər kəsin dərhal cəzalandırılması E.Əzizov tərəfindən də narahatlıqla qarşılanmaqdadır. E.Əzizovu daha çox narahat edən amil isə S.Mirəzyevin icra başçısının “dostluq addımları”na reaksiya verməməsidir. Bu isə o deməkdir ki, icra başçısı nəinki S.Mirzəyevi “bizim adam” edə bilməyəcək, hətta onunla normal münasibətlər belə formalaşdırmağı bacarmayacaqdır. Bu baxımdan S.Mirzəyevə qarşı şəhər daxilində məmurlardan ibarət güclü cəbhə yaratmağa çalışan E.Əzizov lazım gəldikdə öz komandasının sayı və gücü hesabına S.Mirzəyevə müqavimət göstərə, onunla mübarizədə qalib çıxa bilsin. Bu baxımdan, E.Əzizovun Sumqayıt polisində də Gəncə kadrlarının yerləşdirilməsinə səy göstərəcəyi şübhəsizdir”.

“Yerlilər” “gəlmələr”i həzm edə bilmir

Məlumatlı qaynağın bildirdiyinə görə, E.Əzizovun kadr siyasəti Sumqayıt daxilində vəziyyəti daha da gərginləşdirməkdədir. Buna səbəb Sumqayıtın özündə yetərli sayda savadlı kadr olduğu halda, E.Əzizovun Gəncədən kadr gətirilməsinə üstünlük verməsi, yerli kadrların məşğulluğunu təmin etməməsidir: “Sumqayıtdakı kadr heyəti hesab edir ki, şəhərdə ali təhsilli mütəxəssislərin işlə təminatında ciddi problemlərin olduğu bir vaxtda şəhərə kənardan kadrlar dəvət etmək ədalətsizlikdir və bu, hər şeydən əvvəl insanların psixologiyasına mənfi təsir göstərir. “Gəlmə”lərin çoxluğu hazırda müxtəlif vəzifələrdə çalışan şəhərdəki digər xırda və orta məmurlar tərəfindən də narahatlıqla qarşılanmaqdadır. Onlar hesab edir ki, belə davam edərsə, E.Əzizov onları da gəncəli kadrlarla əvəzləyəcək və nəticədə onlar öz iş yerlərini itirəcəkdir. Məhz bu baxımdan işləyən və işləməyən əksər kadrlar Sumqayıta kənardan kadrların gətirilməsi prosesini ciddi narahatlıqla qarşılamaqdadır. E.Əzizovun özünün bütün köhnə komandasını öz ətrafında formalaşdırmaqda israrlı olduğunu nəzərə alsaq, o zaman bu narahatlığın kifayət qədər əsaslı olduğunu anlamaq olar”.

İlqar Rəsulov