Qasım Məmmədov: “2014-cü ilin noyabr ayında heç bir məhkəmə qərarı olmadan, Nazirlər Kabinetinin hər hansı tapşırığı verilmədən, Gədəbəy şəhəri Məhəmməd Əmin Rəsulzadə adına küçədə mənə məxsus 51kvm-lik torpaq üstündə tikili, yəni çayxana kimi istifadə etdiyim obyektim yerlə-yeksan edildi”

“Gündəm Xəbər” qəzeti olaraq hələ bir müddət bundan əvvəl də, Gədəbəydə sahibkarların başlarına gətirilən müsibətlərin varlığından, rayonu ağuşuna alan çoxsaylı qanunsuzluqlardan, mərkəzi ərazilər qalsın bir yana, ən ucqar dağ kəndlərində belə sakinlərin həddi-hüdudu bilinməyən problemlərlə üz-üzə qalmalarından və.s geninə-boluna bəhs etmişdik. Ümumi şəkildə yazıb onu qeyd etmişdik ki, bu gün də baş alıb gedən problemlərin kökündə Ramiz Yediyarovun Gədəbəydə tətbiq etdiyi yarıtmaz idarəçilik durur ki, həmin idarəçilik də rayonda problemlərin həlli ilə deyil, əksinə problemlərin üstünə yeni-yeni problemlər əmələ gətirməklə də məşğuldur. Məhz, belə bir səbəblər üzündəndir ki, bu gün Gədəbəydə haqq-ədalət qeybə çəkilib, yerli sakinlərin tam əksəriyyəti ilə icra hakimiyyəti aparatı arasında sanki bir uçrum da əmələ gəlib.

Bir məqama xüsusi diqqət yetirək ki, ölkə rəhbəri cənab İlham Əliyev televiziya çıxışlarında, keçirilən bir çox tədbirlərdə daim vurğulayır ki, ”mən rəhbər vəzifəyə kimi təyin edirəmsə, ilk növbədə gedin əhali ilə işləməyi bacarın, onların problemlərinin həlli ilə məşğul olun deyə, həmin şəxslərə lazımi tapşırıqlarımı da verirəm” deyir. Belə bir tapşırığın verildiyi halda, bəs səbəb nədir ki, bu gün də bir çox sahibkarlar Gədəbəylə Prezident Administrasiyası arasında qalıblar? Yəni, onlar üzləşdikləri problemlərinin həllinə Gədəbəydə nail ola bilmədikləri üçün, ara-sıra qeyd olunan ünvana üz tuturlar və problemlərinin ictimailəşməsinə də çalışırlar.

Məsələn, 2014-cü ildən Gədəbəylə Prezident Administrasiyası arasında qalan, hələ də üzləşdiyi probleminin həllinə nail ola bilməyən sahibkarlardan biri də, əslən Gədəbəy rayonundan olan Məmmədov Qasım Nəriman oğludur. O da “Gündəm Xəbər”ə ünvanladığı müraciətində bildirir ki, “Ramiz Yediyarovun tətbiq etdiyi yarıtmaz idarəçilik, bir çox sahibkarlar kimi məni də Gədəbəylə Prezident Administrasiyası arasında qoyub. Buna səbəb, 2014-cü ilin noyabr ayında heç bir məhkəmə qərarı olmadan, Nazirlər Kabinetinin hər hansı tapşırığı verilmədən, Gədəbəy şəhəri Məhəmməd Əmin Rəsulzadə adına küçədə mənə məxsus 51kvm-lik torpaq üstündə tikili, yəni çayxana kimi istifadə etdiyim obyektim yerlə-yeksan edildi. Yəni, obyektim icra başçısının verdiyi şifahi tapşırıq əsasında, icra hakimiyyəti aparatının memarlıq və tikinti şöbəsinin müdiri Elxan Vəliyevin rəhbərliyi və həmin şöbənin Babək və Vidadi adlı işçilərinin iştirakı ilə darmadağın edildi. Diqqəti cəlb edən hal odur ki, 2007-ci ildə Gədəbəy şəhər bələdiyyəsinin müvafiq qərarı ilə aldığım 51kvm-lik obyektimə aid lazımi sənədlər, həm şəhər bələdiyyəsinin sədri, həm DTXK rayon şöbəsinin müdiri və onun məsləhətçisi, həm də ki, obyektimin söküntüsünə birbaşa rəhbərlik etmiş və bu gün də rayonun memarlıq və tikinti şöbəsinin müdiri vəzifəsini daşıyan Elxan Vəliyev tərəfindən də təsdiq olunmuşdu. Təəssüf hissi doğuran hal odur ki, 2014-cü ilə qədər sahiblik etdiyim obyektim dövlət əhəmiyyətli plana düşmədiyi halda, rayonun bəzi vəzifə sahiblərinin, xüsusilə də Elxan Vəliyevin hansısa marağı əsasında viran edildi. Bu gün də dağıdılmış obyektimin yerində dövlətə aid heç bir tikili yoxdur. Amma, yerlə-yeksan edilmiş obyektimə məxsus ərazidən, yaxınlıqda yerləşən “Vüsal” şadlıq sarayına pilləkan tikiblər. O halda sual oluna bilər ki, görəsən Elxan Vəliyevin məqsədi və kəsişən marağı nə idi ki, heç bir dövlət əhəmiyyətli plana düşməyən obyektimin darmadağın edilməsinə birbaşa rəhbərlik edib. Hansı ki, vaxtilə obyektimə aid sənədləri təsdiq edən vəzifə sahiblərindən biri də, məhz onun özü olub”. Deməli, torbada “qara pişik” var ki, Elxan Vəliyev vaxtilə sənədlərin qanuni olduğunu imzası və möhürü ilə təsdiq etdiyi obyektimin söküntüsünə, məhz belə bir formada canfəşanlıq edib.
Qasım Məmmədov onu da vurğulayır ki, “əgər ərazi ilk öncə mənə təklif olunsaydı, o halda həmin ərazidə müəyyən qədər təmir-bərpa işləri də aparardım ki, şəhərin ümumi gözəlliyinə heç bir halda xələl gəlməsin. Amma, belə bir təkilf mənə bildirilmədi və ailəmin dolanışığını təmin etdiyim obyektim bir çox vəzifə sahiblərinin, o cümlədən Elxan Vəliyevin hansısa kəsişən marağı çərçivəsində yerlə-yeksan edildi. Bu gün mənə viran edilmiş 51kvm-lik obyektimin müqabilində, rayonun mərkəzindən bir qədər aralı məsafədə yerləşən yeni ticarət mərkəzindən heç bir sənədi olmayan, lazımi standartlara cavab verməyən, hətta qəzalı vəziyyətdə tikilmiş 17kvm-lik obyekt təklif olunur. Mən də edilmiş təklifdən birmənalı şəkildə imtina edərək, üzləşdiyim problemlə bağlı icra hakimiyyətinə yazılı ərizə ilə müraciət etsəm də, təəssüflər olsun ki, bu günə qədər bir kimsə ərizəmlə maraqlanmayıb, etdiyim müraciətimə də heç bir halda cavab verilməyib”.
Qasım Məmmədov ünvanladığı müraciətində onu da qeyd edir ki, “mən düz iki ildir ki, tamamilə işsiz qalmışam. Evdə 85 yaşlı ağsaçlı anamla birlikdə yaşasaq da, ümumi dolanışıq vəziyyətimiz olduqca ağırdır. Çünki, özüm də 63 yaş həddindəyəm. Ailəmizin dolanışığını anamın dövlətdən aldığı 159 manat təqaüdlə birtəhər yola veririk. Bizim belə bir duruma düşməyimizə səbəb, dolanışığımızı təmin etdiyim 51kvm-lik obyektimin heç bir əsas olmadan darmadağın edilməsi oldu. Bir anı başa düşə bilmirəm ki, bu gün də ölkə rəhbəri cənab İlham Əliyev televiziya çıxışlarında sahibkarlıqla bağlı problemləri daim önə çəkir və yerli vəzifə sahiblərinə lazımi tapşırıqlarını da verərək bildirir ki, “hər bir vəzifə sahibi sahibkalara dayaq olmalı, onların problemlərinin həlli ilə, o cümlədən bir çox süni maneələri aradan qaldırmalı, bir sözlə sahibkarlığın inkişafına dəstək verilməlidir” deyə, müəyyən tapşırıqlarını versə də, Gədəbəydə yaşananlar isə, tamam fərqli məqamlardan xəbər verir. Yəni, bu gün təkcə mən yox, neçə-neçə sahibkarlar qanuni mülkiyyət hüququna malik olan sənədlərə sahib olsaq da, nə darmadağın edilmiş obyektlərimizin müqabilində yeni obyekt ala bilirik, nə də ki, almalı olduğumuz kompensasiyanı əldə edə bilirik. Belə bir mənzərənin yaşanması, açıq-aydın şəkildə Gədəbəydə həyata keçirilən idarəçiliyin mahiyyətini müəyyən etməyə imkan verir”.
Şikayətçi sahibkar bir məqama da toxunur ki, “bəlkə də icra başçısının bəzi məsələlərdən dəqiq xəbəri yoxdur və əksər problemlərlə bağlı ona səhv məlumatlar çatdırırlar. Amma, bəzi vəzifə sahiblərinin, o cümlədən rayonun memarlıq və tikinti şöbəsinin müdiri vəzifəsini daşıyan Elxan Vəliyevin, rayonun maliyyə idarəsinə rəhbərlik edən Namiq Məmmədovun daşıdıqları vəzifədən sperkulyasiya etmələri, heç cür əndazəyə sığası məsələ deyil. Çünki, əslən Gədəbəydən olan sahibkarların olmazın müsibətlərlə üz-üzə qalmalarında, hər iki vəzifə sahibinin müstəsna rolu, əvəzsiz “xidmətləri” də var. Buna səbəb, Elxan Vəliyevin üzərinə düşən vəzifəni yerinə yetirməməsidir. Onu da qeyd edək ki, daşıdığı vəzifəsindən ikiəlli yapışan bu şəxs, icra hakimiyyətindəki iş otağında alqı-satqı ofisi düzəltməklə, bu gün çoxsaylı sahibkarların başına sanki “corab toxumaq”la da məşğul olur.
Qasım Məmmədovun “Gündəm Xəbər”ə bildirdiyi iradlardan biri də Namiq Məmmədovla bağlıdır ki, o, qanuni mülkiyyətində olan obyekti söküldükdən sonra, bir gədəbəyli olaraq probleminin həlli ilə bağlı ona müraciət etməsi və son anda aldadılması olur. Çünki, Namiq Məmmədov ilk öncə Qasım Məmmədova probleminin həlli ilə bağlı “yağlı vəd”ini versə də, son anda verdiyi vədinə xilaf çıxır. Belə olan halda bir neçə dəfə onun qəbuluna düşüb problemlərinin araşdırılmasını istəyən sahibkara, maliyyə idarəsinə rəhbərlik edən şəxsin tapşırığı ilə mühafizə xidməti, Namiq Məmmədovun iş başında olmadığını bildirirlər. Baxmayaraq ki, idarə rəisinin iş başında olduğunu dəqiqləşdirən Qasım Məmmədov, onun qəbuluna düşmək istəsə də, “maliyyə şefi”nin oyun qaydaları, son anda onunla görüşməyə heç cür imkan vermir. Belə bir halların da yaşanması ona gətirib çıxarır ki, bu gün Gədəbəydə digər sahibkarlar kimi Qasım Məmmədov da, üzləşdiyi problemlərinin həlli ilə bağlı ayrı-ayrı instansiyalara müraciət etmək məcburiyyətində qalıb. Problemin varlığını diqqətdə saxlayacağıq.

Tariyel Bayramlı

“Gündəm Xəbər”