Rasim Əzizov vəkil Əsabəli Mustafayevdən və Fəxrəddin
Mehdiyevdən oğlunun hüquqlarının müdafiəsinə son qoymağı xahiş edib

NİDA hərəkatının 10 mart mitinqi ərəfəsində həbs edilmiş üç fəalının valideynləri müstəqil vəkillərin xidmətindən imtina ediblər. Belə ki, Məmməd Əzizovun atası Rasim Əzizov vəkil Əsabəli Mustafayevdən və Fəxrəddin Mehdiyevdən oğlunun hüquqlarının müdafiəsinə son qoymağı xahiş edib. Bu barədə Turan agentliyinə vəkil Mustafayev bildirib.
O deyib ki, şənbə günü R.Əzizov onunla və Mehdiyevlə müqavilə bağlayıb, ayın 12-nə vəkillərin M.Əzizovla görüşü təyin edilib. Lakin bir müddət sonra məhbusun atası vəkildən artıq oğlunun hüquqlarını müdafiə etməməyi xahiş edib. Vəkil atanın bunu istintaqın təzyiqi altında etdiyini istisna etmir.
NİDA-dan daxil olan məlumata görə, iki digər məhbusun valideynləri özləri vəkil axtaracaqlarını deyiblər. NİDA fəalları Bəxtiyar Quliyev, Şahin Novruzlu və Məmməd Əzizov martın 7-də axşam saxlanılıb, MTN onları “Molotov kokteyli” və narkotik maddə saxlamaqda ittiham edib. Onlara qarşı Azərbaycan CM-in 234.1 (narkotik maddələri qanunsuz əldə etmə, saxlama, satma) və 228.1-ci (odlu silahları, partlayıcı maddələri və qurğuları qanunsuz saxlama, gəzdirmə, daşıma) maddələri ilə ittiham irəli sürülüb.
Martın 9-da bu fəallar 3 ay müddətinə həbs edilib. Martın 9-da axşam Azərbaycan İctimai Televiziyasında və özəl telekanallarda Nida hərəkatının həbs edilmiş fəallarının dindirilməsi zamanı aparılan əməliyyat çəkilişindən kadrlar nümayiş etdirilib. Kadrlarda onlar etirafedici ifadələr verərək, təşkilat üzvlərinin “polisə zorakı müqavimət göstərməyə” hazırlaşdıqlarını bildiriblər.
Lakin dünın NİDA İdarə Heyətinin 7 üzvü mətbuat konfransı keçirərək, həbs olunanlara təzyiq göstərildiyindən əmin olduqlarını bildiriblər. Eyni zamanda, onlar zorakı mübarizə metodları ilə bağlı planlar haqqında iddiaları təkzib ediblər Elə bu gün ombudsman nümayəndələri təcridxanada 10 mart mitinqi zamanı inzibati qaydada həbs edilmiş 4 AXCP fəalına – Məhəmməd Məcidli, Babək Həsənov, Türkel Əlisoy və Elvin Baycana, habelə aksiya başlamazdan əvvəl həbs edilmiş “Azad gənclik” hərəkatının üzvü İlkin Rüstəmzadəyə baş çəkiblər. Onlar saxlanma şəraitindən və onlara qarşı davranışdan şikayət etməyiblər, lakin Səbail polisində darısqallıqdan şikayət ediblər.