Demokratk Təsisatlar və İnsan Haqları İctimai Birliyinin sədr müavini Sevinc İsgəndərova ilə “Gündəm Xəbər”in müsahibəsini çoxsaylı oxucularımıza təqdim edirik:

Azərbaycanın xarici siyasət kursunu necə dəyərləndirərdiniz?

Ümumiyyətlə ölkənin xarici siyasət kursuna baxarkən aşağıdakı məsələlərə diqqət yetirmək lazım gəlir: ölkənin siyasi konyukturda mövqeyi, coğrafi baxımdan qonşu ölkələrlə münasibəti, beynəlxalq aləmə inteqrasiya etməsi və s. Bu baxımdan Azərbaycanın Ermənistan, İran, Gürcüstan, Türkiyə, Rusiyayla və digər tərəfdən ABŞ və Avropa ölkələrilə münasibətlərinə diqqət etmək lazımdır. Eyni zamanda Xəzərin statusuna görə xəzərətrafı ölkələri, ölkəmizin idxal-ixrac potensialına təsir göstərən dövlətləri də buraya daxil edib dəyərləndirmək lazımdır. Bütün bunları analiz etmək, lazımi siyasi addımlar atmaq, iqtisadi resurslardan səmərəli istifadə etmək bu durumda olduqca vacib vəzifələrdəndir. Təbii olaraq bütün mümkün imkanlardan istifadə edərək Qarabağ məsələsinin həllində irəliləyişə nail olmaq bizim ən uğurlu nailiyyətimiz olardı.

Nəzəri baxımdan dedikləriniz doğrudur, sualın davamı olaraq xarici siyasətimizin uğurlarını nədə görürsünüz?

Bu nəzəri yanaşmanı uzatmaq olar. Lakin, təəssüflə qeyd etmək lazımdır ki, mövcud durum heç də xarici siyasətimizin uğurlu nəticə vermədiyini göstərir. Burada iqtisadi imkanlarımızın bir anda səmərəsiz xərclənməsi nəticəsində mövcud duruma düşməyimiz, gah qərb, gah Rusiya meylli siyasət yürütməyimiz bizim hələ də iki yol ayrıcında qalmağımızdan xəbər verir. Eyni zamanda demokratik dəyərlərdən qaçmağımız Qarabağ probleminin həllində bizim ədalətli mövqeyimizin bərqərar olmasına mane olan əsas səbəbdir. Hakimiyyət anlamır ki, demokratik dəyərlərin inkişafı qarabağ ermənilərinin Azərbaycanın tərkibində təhlükəsiz yaşamasını göstərə amildir. Biz nə qədər demokratik prinsiplərdən qaçırıqsa, o zaman ermənilər də bizim tərkibimizdə necə yaşayacaqlarını dünyaya göstərməyə çalışırlar. Paralel olaraq Azərbaycanın başına gətirilən bütün müsibətlərin əsas səbəbkarı olan və iqtisadi cəhətdən çökmüş bir Rusiya meylli siyasətin aparılması heç bir məntiqə sığmır. Əgər biz Ukrayna təcrübəsindən çəkiniriksə, onda mən qeyd etməliyəm ki, oxşar problemimiz bizi artıq var və Qarabağ problemi ilə Azərbaycan öz suverenliyindən məhrum edilib, Ermənistan tərəfindən məhz Rusiyanın dəstəyilə.

Sevinc xanım, ABŞ-a qarşı aparılan siyasət Sizcə nədən yumşaldıldı?

Əslində ABŞ-ın sırf demokratik dəyərlər, xüsusilə insan haqları problemi ilə bağlı Azərbaycana qarşı tövsiyyə xarakterli müraciətləri bizim Rusiya meylli siyasətimiz nəticəində daha da gücləndi. Bu daha sonra sanksiyalar ola biləcəyilə ciddiləşdi. Siyasi hakimiyyət təmsilçiləri nə qədər gizlətməyə çalışsalar da, narahatçılıqları hiss olunur və müəyyən addımlar atmaq istəyirlər ki, bu vəziyyət yüngülləşsin. Amma erməni stereotipindən istifadə edilməsi bu durumda çox gülməli görünür. Sualınıza gəlincə deyə bilərəm ki, ABŞ-a qarşı siyasi yumşalma çox normaldır və bu istər güc baxımından, istərsə də siyasi baxımdan yaxşı perspektiv vəd edə bilər. Çünki, Avropa dövlətləri ilə olan münasibətlər də ABŞ-a qarşı olan siyasətin davamı sayıla bilər. ABŞ və daha sonra Avropadan təcrid olunma Azərbaycanın İrandan betər vəziyyətə düşməyimizə şərait yarada bilər, nəzərə almaq lazımdır ki, bizim iqtisadi potensialımız fars rejimi ilə müqayisə oluna bilməz.

Cəfər