23 iyul 1993-cü il tarixdən işğal altında olan digər rayonlarımız kimi, Ağdam rayon əhalisi də, məcburi köçkün həyatı yaşamaqdadırlar. Talelərinə Vətən, torpaq nisgili, el-obaya bağlılıq hissi yaşamaq yazılmış bu insanların çəkdikləri müsibətlər, təkcə onların məcburi köçkün olmaları ilə deyil, həm də onlara göstərilən ögey münasibətlərin varlığı da, əksər ağdamlıları sızıldadır, sanki rahat belə buraxmır. Bəli, bu gün onlar belə bir biganəliklərin varlığına haqlı olaraq gileylənməkdədirlər. Təqribən 23 il bundan əvvəl yurd-yuvalarından didərgin düşən ağdamlılar, ölkə rəhbəri cənab İlham Əliyevdən hər zaman diqqət və qayğı görsələr də, hal-hazırda onlara rəhbərlik edən Raqub Məmmədovdan isə, olduqca narazılıq edirlər. Təəssüf doğuran hal odur ki, ölkə rəhbəri yerli vəzifə sahiblərinə lazımi tapşırıqlarını verir ki, “hər bir vəzifə sahibi daha çox sıravi sakinlərə diqqətlə yanaşmalı, problemlərinin həllinə də çalışmalıdır” deyir. Amma, Ağdamın bugünkü rəhbərliyi verilmiş tapşırıqlara biganə yanaşdığından, məcburi köçkün həyatı yaşayan əksər ağdamlıların məskunlaşdıqları ərazilərdə, bu gün həddi-hüdudu bilinməyən problemlər tüğyan etməkdədir. Onu da düşünmək gərəkdir ki, Ağdam rayon İcra Hakimiyyətinin başçısı, rayonda ölkə rəhbərinin təmsilçisisi, səlahiyyət verdiyi şəxsdir. Amma, bunları nəzərə almayan Raqub Məmmədov, bu gün elə bir formada idarəetməni həyata keçirir ki, məcburi köçkün həyatı yaşayanların sosial problemləri aşıb-daşır, dövrü mətbuatda isə, icra başçısının yarıtmaz iş fəaliyyətindən bəhs edən tənqidi məqalələrin ardı-arası kəsilmir. Adicə bir məqama toxunaq ki, bu gün Ağdam Olimpiya İdman Kompleksinə ahıl yaş həddinə çatmış Vaqif Balakişiyev adlı bir şəxs rəhbərlik edir. Yəni, onun 70 yaş həddində çatmasına baxmayaraq, adı çəkilən kommpleksə rəhbərlik etməsinə səbəb, məhz Raqub Məmmədovun onu himayə etməsidir. “Gündəm Xəbər”i məlumatlandıran mənbə onu da bildirir ki, Vaqif Balakişiyev gecələr kompleksin hotelə çevrilməsinə də səbəb olur. Məsələn, o, ətraf rayonlardan gələn müştəriləri kompleksə buraxmaqla, hər gün xeyli miqdarda pul da qazanır. Diqqəti o hal da çəkir ki, kompleksə təşrif buyuran müştərilər, çox zaman özləri ilə gətirdiyi xanım qonaqlarla eyş-işrət məclisləri də qurmağı unutmurlar. Torpaqları işğal altında olan, əhalisi isə məcburi köçkün həyatı yaşayan bir rayonun cəbhə bölgəsində bu cür addımların atılması, öz-özlüyündə olduqca usandırıcı haldır. Ümumiyyətlə, Ağdam rayonu haqda nə qədər istəsək tənqidi məqalə hazırlayıb dərc edə bilərik. Çünki, “Gündəm Xəbər”i məlumatlandıran mənbə bildirir ki, Raqub Məmmədov büdcədən ayrılan pulları çox zaman təyinatı üzrə xərcləmir. Amma, qohum-əqrəbasının problemlərinə gəlincə, həmin problemlər zamanında da həllini tapır. Məsələn, bəzi media orqanlarında açıqlanır ki, icra başçısı büdcədən ayrılan vəsaitlər hesabına qardaşının övladına ev də tikdirib. Amma, digər ağdamlıların problemləri, deyəsən icra başçısını heç bir halda maraqlandırmır. Məsələn, “Gündəm Xəbər”ə şikayət ərizəsi ünvanlayan rayonun Mirəşilli kənd sakini Ağayev Samir Mahmud oğlu yazır ki, “biz bir neçə il bundan əvvəl, kəndimizin bələdiyyə sədri olmuş Habil Abbasova 500 manat pul verib, ondan sənəd-sübut olmadan 8 sotluq torpaq sahəsi aldıq. Həmin yerdə heç bir şəraiti olmayan, yalnız dəmir üzlüklərlə əhatə olunan ev də tikdik. Tikdiyimiz evdə lazımi şərait olmadığından, dəfələrlə icra hakimiyyətinin başçısına müraciətlər etsək də, o, heç bir halda müraciətimizə məhəl qoymadı. Bu hələ azmış kimi, bir müddət bundan əvvəl Ağdam rayon İcra Hakimiyyəti başçısının Mirəşilli kəndi üzrə icra nümayəndəsi Məhərrəm Quliyev və kəndimizin bələdiyyə sədri Elsanə Qasımova mənə bildirdi ki, “siz bu torpağı qeyri-qanuni zəbt etmisiniz. Odur ki, ləngimədən torpaqdan çıxmalısınız” dedikdə, məcbur oldum ki, üzləşdiyimiz problemin ictimailəşməsinə də çalışım. Bu məqsədlə tanıdığım internet televiziyasının əməkdaşını dəvət etdim ki, problemlə bağlı müəyyən çəkliş aparsın və problemimizin həllinə köməklik də etsin. Təəssüf doğuran hal o oldu ki, aparılan çəklişdən xəbər tutan rayon rəhbərliyi, həm bizə, həm də çəkliş qrupuna təzyiq göstərməyə başladı. Çox keçmədi ki, polis şöbəsində müavin vəzifəsini daşıyan Zülfü müəllim mənə bildirdi ki, “ay oğrac sən kimsən ki, çəkliş qrupu gətirirsən” deməklə, məni təhqir də etməkdən belə çəkinmədi. Şöbədə təzyiq də etdilər ki, “izahat yazın ki, bir də şikayət etməyəcəyik” dedikdə, biz buna qəti etirazımızı bildirdik. Elə ki, şöbədən çıxdıq, çox keçmədi ki, rayon icra hakimiyyətinin başçısı cənab Raqub müəllim, həm icra nümayəndəsini, həm də bələdiyyə sədrini yanına çağırıb bir qədər söhbət etdi və sifətini mən tərəfə çevirib “şərəfsiz, şikayət edən sənsən” dedikdə, bir anlığa nə edəcəyimi bilmədim. Axı, mənim günahım nədir, mən nə etmişəm deyə fikirləşsəm də, yenə çaşbaş qaldım. Çünki həyat yoldaşım məcburi köçkün, özüm isə Ağdamın Mirəşilli kənd sakini olsam da və döyüş bölgəsinə yaxın yerdə yaşasaq da, bu gün böyük bir problemlər məngənəsində boğulmaqdayıq. Onu da vurğulamaq yerinə düşər ki, Raqub Məmmədov icra başçısı təyin olunduqdan bir neçə gün sonra, mətbuata açıqlama verərək bildirmişdi ki, “Vəzifədə olduğum müddətdə ərzində, ölkə rəhbərinin mənə göstərdiyi etimadı doğrultmağa çalışacağam. Bilirsiniz ki, Ağdam rayonu cəbhə bölgəsində yerləşir və əhalimizin yarıdan çoxu məcburi köçkündürlər. Rayonun müəyyən hissəsi ermənilər tərəfindən işğal olunub, bunlar da rayonun sosial-iqtisadi inkişafını əngəlləyən səbəblərdir. Amma, bütün bunlara baxmayaraq, biz rayonunun sosial-iqtisadi inkişafının sürətləndirilməsi, əhalinin sosial rifah halının daha da yaxşılaşdırılması istiqamətində əməli addımlarımızı atacağıq və digər məsələlərin həlli üçün də, əlimizdən gələni əsirgəməyəcəyik” demişdi. Bu gün isə, rayon rəhbərlik edən Raqub Məmmədovun söylədikləri ilə, atdıqları addımlar üst-üstə düşmür. O, ölkə rəhbərinin etimadını doğrultmaq istəyirsə, gərək ilk növbədə icra hakimiyyəti daxilində köklü kadr islahatları həyata keçirsin, rayonun sosial-iqtisadi inkişafına büdcədən ayrılan vəsaitlərin hara xərclənməsinə diqqətini artırsın. Ən əsası isə, əli hansısa idarə, müəssisə, təçkilat rəhbərinin cibində olmasın. Əksər ağdamlıların iddiasına görə, başçı hələ ki, özünü “işgüzar icra başçısı” kimi təsdiq etdirməyi bacarmayıb. Biz bir məqamı da xatırlamaq istəyirik ki, rayonun sabiq icra başçısı Nizami Sadıqov da, məhz işində göstərdiyi məsuliyyətsizliyin qurbanı oldu. Araşdırmamız davam edəcək.

Cəfər