Zərərçəkmiş təqsirləndirilən şəxsdən 30 min manat təzminat istədi

Ağır yol-nəqliyyat hadisəsi törətməkdə təqsirli bilinən Bakı şəhər sakini, Azərbaycan Dövlət İqtisad Universitetinin tələbəsi, 1993-cü il təvəllüdlü Ağa Namazovun cinayət işi üzrə məhkəmə prosesi başa çatıb.

Ağa Namazov 3 sentyabr 2015-ci il tarixdə, saat 23 radələrində idarə etdiyi “Toyota Land-Cruiser-Prado” markalı avtomobillə Abşeron rayonu Novxanı qəsəbəsində yol hərəkəti qaydasını pozub. O, Novxanı-Binəqədi avtomobil asfalt yolunda yolu keçən 1988-ci il təvəllüdlü Cabir Həkimovu vurub. Cabir Həkimov aldığı xəsarətdən xəstəxanada tibbi yardım alıb.

Ağa Namazov Cinayət Məcəlləsinin 263-1.2-ci (ol hərəkəti və nəqliyyat vasitələrinin istismarı qaydalarını pozma, eyni əməllər ehtiyatsızlıqdan zərərçəkmiş şəxsin sağlamlığına ağır zərər vurulmasına səbəb olma) maddəsi ilə ittiham edilib.

Abşeron rayon Məhkəməsinin hökmü ilə Ağa Namazov 1 il müddətinə azadlıqdan məhrum edilib. Hökmdən narazı qalan zərərçəkmiş Cabir Həkimovun nümayəndəsi, vəkil Ceyhun Yusifov apelyasiya şikayəti verib. Vəkil Ağa Namazovun barəsində 4 il müddətinə azadlıqdan məhrum edilməsi ilə nəticələnən cəza təyin edilməsini, həmçinin də mülki iddialarının təmin olunmasını istəyib.

Zərərçəkmiş tərəfin şikayəti araşdırılması üçün Sumqayıt Apelyasiya Məhkəməsinə göndərilib. Şikayət hakim Nazim Mövsümovun sədrliyi ilə keçirilən prosesdə araşdırılıb.

Ceyhun Yusifov bildirib ki, zərər çəkmiş şəxsin sağlamlığına ağır zərər vurulub: “Bununla bağlı ailəsində yeganə qazanc gətirən zərər çəkmiş Cabir Həkimov əmək fəaliyyətini itirib və onun ailəsi ağır maddi duruma düşüb. Cabir Həkimovun sağlamlığına vurulmuş ağır zərərə görə təqsirləndirilən şəxsə adekvat cəza təyin edilməlidir. Lakin birinci instansiya məhkəməsi təqsirləndirilən şəxsin törətdiyi əməlin böyük ictimai təhlükəliliyini nəzərə almayıb, təqsirləndirilən şəxsin əməlində cəzanı

yüngülləşdirən halların olmadığı halda ona yüngül cəza təyin edib. Mülki iddianın baxılmamış saxlanılması üçün heç bir əsas mövcüd olmayıb. Amma verilmiş mülki iddianı baxılmamış saxlanılıb”.

Cabir Həkimov təqsirləndirilən şəxsə qarşı mülki iddia qaldırıb. Cinayət nəticəsində ona vurulmuş mənəvi ziyana görə 10000 manat, əldən çıxmış faydaya görə 18900 manat, cəmi isə 28900 manatın təqsirləndirilən şəxsdən tutulub və ona ödənilməsini xahiş edib.

Mülki iddiada qeyd edilib ki, o, taksi fəaliyyəti ilə məşğul olub və ayda 1350 manat pul qazanıb. Qəza zamanı alınmış xəsarətlərin nəticəsində o, əmək qabiliyyətini itirib və 14 ay işləmədiyi üçün 18900 manatı əldən çıxıb.

Ağa Namazov qeyd edib ki, alınmış xəsarətlərlə əlaqədar onun fiziki ağrıları olub: “Gecələr yata bilməmişəm və bunun nəticəsində şüurunda mənfi psixi reaksiyalar baş verib. 2 ay ərzində evdə qalaraq, heç kimlə ünsiyyətdə olmamışam. Bunun nəticəsində də mənə dözülməz mənəvi ziyan vurulub”.

Hakim heyəti sonda apelyasiya şikayətinin dəlillərini araşdırıb və apelyasiya şikayəti təmin edilməyib.

gundemxeber.az