Silah alverçisi məhkəmədə günahsızlığını sübut etməyə çalışdı

Polis rəisinin müavini: “Prezidentin səfəri ilə bağlı rayonunda təhlükəsizlik tədbirləri gücləndirilmişdi”

Göyçay rayon sakini, 1984-cü il təvəllüdlü Aruz Həmidovun cinayət işi üzrə məhkəmə prosesi başa çatıb. İttihama görə, Aruz Həmidov “Kalaşnikov” konstruksiyalı, “AK74” modelli, atəş üçün yararlı 1084140 nömrəli avtomatı, həmin konstruksiyalı avtomatlarda istifadə oluna bilən 27 ədəd patronları və bir ədəd “Kalaşnikov” konstruksiyalı avtomatların komplekt hissəsi olan zavod üsulu ilə hazırlanmış sandıqçanı əldə edib.

Aruz Həmidov 5 sentyabr 2015-ci il tarixdə, saat 06.30 radələrində Siyəzən rayon polis şöbəsi tərəfindən rayonunun Zarat kəndi ərazisində saxlanılıb. Onun əlində olan sellofan torbaya baxış keçirilərkən həmin silah-sursat ondan aşkar olunub.

Aruz Həmidov Cinayət Məcəlləsinin 228.1-ci (qanunsuz olaraq odlu silah, onun komplekt hissələrini, döyüş sursatı (yivsiz odlu ov silahı və həmin silah üçün döyüş sursatı istisna olmaqla), partlayıcı maddələr və qurğular əldə etmə, başqasına vermə, satma, saxlama, daşıma və ya gəzdirmə) maddəsi ilə ittiham edilib. Onun barəsində olan cinayət işi Siyəzən rayon Məhkəməsində araşdırılıb.

“Həm işdə, həm də parkda gecələmişəm”

Aruz Həmidov məhkəmədə verdiyi ilkin ifadəsində özünü elan olunmuş ittihamda özünü təqsirli bilib. O, ifadəsində göstərib ki, ailə üzvləri ilə birlikdə Göyçay rayonunun Çərəkə kəndində yaşayır: “19 avqust 2015-ci il tarixdə işləmək üçün Bakı şəhərinə getdim. Həmin vaxtdan Bakı şəhər Nərimanov rayonunda Türk Liseyinin yanında olan kafenin söküntüsündə fəhlə kimi işləmişəm, həm işdə, həm də parkda gecələmişəm. Sentyabrın 4-də, saat 20 radələrində Nərimanov parkında oturacaqda tək oturan zaman

tanımadığım 40-45 yaşında olan bir kişi gələrək yanımda oturdu. Həmin şəxs məndən hansı rayondan olduğumu, nə işlə məşğul olduğumu soruşdu. Ona Göyçay rayonundan olduğumu və fəhlə işlədiyimi dedim. Həmin şəxs adının Elmir olduğunu, fəhlə yığaraq söküntü işlərinə briqadirlik etdiyini, lazım olsa mənə də iş tapa biləcəyini dedi”.

“200 manat verəcəyini dedi”

Təqsirləndirilən şəxsin sözlərinə görə, 2-3 saat parkda söhbət edəndən sonra həmin Elmir adlı şəxs ona birlikdə çay içməyi təklif edib: “Parkın ətrafında olan çayxanaya gəldik. Orada çay içib söhbət edən zaman Elmir mənimlə yoldaşlı Siyəzən rayonuna getməsini, orada bir nəfərə sellofan torba verib qayıdacağımızı dedi. Elmirlə razılaşaraq tanımadığım taksi ilə Siyəzən rayonuna “Beş Barmaq” adlanan pirin yanına gəldik. Saat 05 radələrində taksidən düşərək orada olan kafelərdən birində oturduq. Oraya gələn zaman Elmirin əlində göy sellofan torba olduğunu gördüm”.

Aruz Həmidov bildirib ki, kafedə oturandan sonra Elmir ona əlindəki göy sellofanda silah olduğunu, silahı satmaq üçün gətirdiyini, bir nəfər vəhhabiyə 3800 manata satacağını və ona da 200 manat pul verəcəyini deyib: “Pula ehtiyacım olduğu üçün razı oldum və orada gözlədim.. Kafedə oturub bir az çay içəndən sonra Elmir çölə çıxaraq qayıdacağını dedi və sellofan torbanı yanımda qoydu. Elmir kafedən çıxandan bir az sonra tanımadığım mülki geyimli polis əməkdaşları mənə yaxınlaşdı. Onlar özlərini təqdim etdi və məndən sellofan torbada nə olduğunu soruşdular. Polis əməkdaşlarına torbada nə olduğunu bilmədiyimi dedim. Bundan sonra polis əməkdaşları iki nəfər tanımadığım hal şahidinin iştirakı ilə həmin sellofan torbanı baxış keçirdilər. Torbada bir ədəd qundaqsız avtomat, bir ədəd avtomat darağı, 27 ədəd patron və qara plastirin olub. Polis əməkdaşları baxış keçirəndən sonra torbada olan avtomatı, sursatı və plastirini qablaşdırdılar. Bu barədə protokol tərtib edildi, özüm də həmin protokola imza etdim. Bundan sonra isə məni Siyəzən rayon polis şöbəsinə apardılar”.

“Təhlükəsizlik tədbirləri gücləndirilmişdi”

Cinayət işi üzrə şahid qismində dindirilən Rasim Nəsibov bildirib ki, Siyəzən rayon polis şöbəsində əməliyyat işləri üzrə rəis müavini vəzifəsində xidmət edir: “Hadisə ilə əlaqədar qeyd edirəm ki, həmin ərəfədə ölkə prezidentinin Siyəzən rayonuna səfəri gözlənildiyindən rayonda gücləndirilmiş iş rejimi müəyyən olunub, təhlükəsizliyin təmin olunması məqsədi ilə hər yerə ciddi nəzarət olunub. Siyəzən rayonu, “Beş Barmaq” adlanan pirin yerləşdiyi ərazidə daha çox kriminal hadisələr baş verdiyindən orda da güclü nəzarət olub. Sentyabrın 5-də, təxminən 06 radələrində Siyəzən rayon polis şöbəsinin əməliyyat müvəkkili Turan Hacıyev cinayət-axtarış bölməsinin rəisi Sadıq Həsənova zəng vuraraq ziyarətgahın yanındakı kafedə bir nəfərin özünü çox şübhəli apardığını, yanında bağlama olduğunu, verilən suallara isə şübhəli cavab verdiyini bildirib. Bu barədə məlumatı aldıqdan sonra dərhal polis əməkdaşları ilə birlikdə həmin kafeyə getdik. Kafeyə çatdıqdan sonra Aruz Həmidovdan sellofanın içində nə olduğunu soruşduq. O əvvəlcə sellofanın içində nə olduğunu bilmədiyini, daha sonra isə ümumiyyətlə sellofanın ona aid olmadığını bildirdi. Bundan sorna hal şahidlərinin iştirakı ilə sellofana baxış keçirildi və sellofanda qundaqsız “Kalaşnikov” avtomatı, həmin avtomatın darağı, 27 ədəd patron və qara rəngli plastirinə oxşar maddə olduğu müəyyən edildi. Baxış keçirildikdən sonra Aruz Həmidov özünü səmimi aparmağa başladı, silahın özünə məxsus olmadığını, lakin Bakı şəhərindən Siyəzən rayonuna müəyyən pul müqabilində satmaq üçün gətirdiyini göstərdi.

“Suallara dəqiq cavab verməyib”

Aruz Həmidovun silahın Elmir adlı şəxsə məxsus olması barədə ifadəsi ilə əlaqədar deyə bilərəm ki, Aruz Həmidovu kafedə ilk görən polis əməkdaşı Turan Hacıyev də onlara məlumat verərkən onun tək olduğunu bildirib. Bundan başqa polis əməkdaşları Elmir adlı şəxsin kimliyini müəyyən etmək üçün Aruz Həmidova suallar versələr də, o bu suallara dəqiq cavab

verməyib. Yalnız həmin şəxsin adını bildiyini göstərib. Eyni zamanda Aruz Həmidovun dediklərini yoxlamaq məqsədi ilə ərazidə yerləşən video kameralara polis əməkdaşları tərəfindən əməliyyat tədbiri kimi qeyri-rəsmi baxış keçirildi və Aruz Həmidovun yanında hər hansı bir digər şəxsin olmadığı müəyyən edildi”.

“Onun ailəsi ağır vəziyyətdədir”

Şahid qismində dindirilən Göyçay rayonunun Çərəkə kənd sakini, eyni zamanda Aruz Həmidovun qonşusu Mehman İsmayılov bildirib ki, Aruz Həmidovu uşaq vaxtlarından tanıyır: “Onun ailəsi ağır vəziyyətdədir, atası Fəniyaz Həmidov Aruz Həmidovun uşaq yaşlarından anası Güleykə Həmidovadan ayrılaraq Rusiya Federasiyasında başqa bir qadınla yaşayır və uzun illərdir ki, ailəsinə baxmır. Aruz Həmidov əvvəllər cinayət əməli törətməyib, kənddə hər kəsin hörmətini qazanaraq öz zəhməti ilə ailəsini dolandıran şəxs olub. Onun Bakı şəhərinə getməsi isə ailəsini dolandırmaq xatirinə məcburiyyətdən olub. Onun himayəsində heç yerdə işləməyən xəstə arvadı, yaşlı anası və iki azyaşlı uşaqları var. Aruz Həmidovun həbs olunması xəbərini eşitdikdən sonra arvadında psixoloji pozuntular yaranıb və tibbi yardım göstərilməsi üçün tez- tez evlərinə təcili yardımın əməkdaşları gəlir”.

Siyəzən rayon Məhkəməsinin hökmü ilə Aruz Həmidov 1 il müddətinə azadlıqdan məhrum edilib. Hökmdən narazı qalan prokuror İsgəndər Cabbarov apelyasiya protesti verib.

Prokuror protestində göstərib ki, məhkumun əməli cinayət qanunu ilə düzgün tövsüf edilsə də, ona törətdiyi cinayət hadisəsinin ictimai təhlükəlilik dərəcəsinə, xarakterinə və şəxsiyyətə uyğun olmayan yüngül cəza verilib: “Belə ki, məhkəmə cəza təyin etmənin ümumi prinsiplərindən bəhs edən Cinayət Məcəlləsinin 2, 8, 41.2 və 58.3-cü maddələrinin tələblərinə formal yanaşaraq törədilmiş cinayətin xarakterini və ictimai təhlükəlilik dərəcəsini nəzərə almayıb. Bundan başqa məhkəmə Aruz Həmidovun himayəsində azyaşlı uşaqlarının, yaşlı anasının olmasını,

əməlindən səmimi peşmançılıq çəkməsini cəzanı yüngülləşdirən hallar kimi qəbul edərkən, bu halların hansı səbəbdən yüngülləşdirici hallar kimi qəbul edildiyini əsaslandırmayıb. Hökmün məhkuma təyin edilmiş cəza ağırlaşdırılmaqla dəyişdirilməsi xahiş edirik”.

Prokurorun protesti araşdırılması üçün Sumqayıt Apelyasiya Məhkəməsinə göndərilib. Protest hakim Mübariz Zeynalovun sədrlik etdiyi kollegiyada araşdırılıb. Apelyasiya protestinin dəillərini araşdıran hakim heyəti sonda qərar elan edib. Qərara görə, prokurorun protesti təmin edilməyib.

gundemxeber.az