"Prezident Administrasiyasında Məhərrəm Əliyevin tapşırıqı ilə məni döydürüb çölə polis bölməsinə apardılar"

Ötən il iyulun 31-də dünyasını dəyişən dörd ayın əsgəri Ismayıl Ibayevin valideynləri bir neçə gün öncə Prezident Administrasiyasında olub. Prezidentin müdafiə məsələləri üzrə köməkçisi xidmətinin Müdafiə məsələləri şöbəsinin müdiri Məhərrəm Əliyevin qəbulunda olan Ibayevlər övladlarının qatillərinin cəzalandırılmasını tələb ediblər. Bu haqda məlumat verən jurnalist Zümrüd Məmmədova deyir ki, ailə şikayətinin Milli Təhkükəsizlik Nazirliyinə göndəriləcəyini onlara söz verən, ancaq bunu yerinə yetirməyən Məhərrəm Əliyevdən narazı olublar: “Məhərrəm Əliyev Ibayevlərlə görüşdə ”Mənim səlahiyyətim yoxdur" deyib. Bu cavabdan əsəbləşən əsgərin anası Iradə xanım “səlahiyyətin yoxdur sözünü yaz kağıza ver mənə. Söz sahibi deyildinsə onda niyə şikayətçiləri aldadıb onlara söz verirsən” cavabını verib. Oğlunun qanının batırılmasından əsəbləşən ana özünə xəsarət yetirmək istəyib. Bunu görən Məhərrəm Əliyev “onu burdan götürün” əmrini verib. Prezident Administrasiyasının mühafizəçiləri içəri doluşub qadını sürüməklə otaqdan çıxarmaq istəyiblər. Qəbulda olan mərhum əsgərin atası Rafiq Ibayev həyat yoldaşını onların əlindən almaq istəyəndə onu da vurublar. Bu zaman Prezident Administrasiyasının qarşısında daimi keşik çəkən 9-cu polis bölməsinin əməkdaşları içəri doluşub qadını döyə-döyə, təpiklə vurub sürüyərək maşına mindirib 9-cu bölməyə aparıblar".
Mərhum əsgərin anası bir neçə saat polis bölməsində saxlandıqdan sonra sərbəst buraxılıb. Iradə Məmmədova oğlunun ölümü ilə bağlı istintaqdan narazıdır: “10 aydır oğlumun istintaqı gedir. Ancaq Hərbi Prokurorluq hələ ki, 5 nəfəri istintaqa döymə maddəsi ilə cəlb edib. Işin bir hissəsini ayırıb Naxçıvan Hərbi Məhkəməsinə göndəriblər. Ekspertiza göstərir ki, 39 günə oğlumun orqanları çürüyüb. Halbuki kəsilən yerlər, meyid çürüməmişdi. Sadəcə içindən pambıq çıxdı. Dünya tibbinə müraciət edin. Görün ki, 39 günə orqanlar çürüyər? Bu rəyi verən ekspert cinayət məsuliyyətinə cəlb edilməlidir. Çünki onlar həmin şəxslərin cinayətlərini ört-basdır etməklə cinayətkarlara himayədarlıq edirlər. Məhkəmə Naxçıvanda necə obyektiv aparıla bilər ki, orada vəzifə başındadırlar. Oranın hərbi prokuroru Yaşar Həsənov niyə məsuliyyətə cəlb edilmir? Mən 3 ay dalbadal Məhərrəm Əliyevin qəbuluna düşmüşəm. Ondan işin araşdırılmasının MTN-yə həvalə edilməsini xahiş etmişəm. O, mənə söz verdi. Ancaq ərizəmi elə şöbədən şöbəyə ötürüb. Mən oğlumun qatillərini tələb edirəm. Hələ Hərbi Prokurorluqda olanda onlar mənim nümayəndəmin üstünə hücum təşkil edib onu döydülər. Əsgərə əmr verərək nümayəndəmə hücum etdirdilər. Bu cinayəti ört-basdır etdirdilər. Mən oğlumu çətinliklə böyüdüb dövlətə əmanət vermişəm. Övladımı qutuda göndərməmişəm ki, onu mənə qutuda qaytarırlar. Onu böyüdəndə dövlət mənə bir manat verməyib”

Vüsalə