Narkotik alverçisi məhkəmədən yüngül cəza istədi, amma hakim onun istəyini nəzərə almadı

Narkotik vasitələrin qanunsuz dövriyyəsində təqsirli bilinən Bakı şəhər sakini, 1986-cı il təvəllüdlü Saməddin Vahidovun cinayət işi üzrə proses başa çatıb.

İttihama görə, Saməddin Vahidоv şəхsiyyəti məlum оlmayan digər şəхslərlə qabaqcadan əlbir оlaraq, bir qrup şəхs halında satış məqsədi ilə külli miqdarda narkоtik vasitələri qanunsuz оlaraq əldə edib.

Cinayətkar qrupun şəхsiyyəti məlum оlmayan üzvləri tərəfindən məlum olmayan mənbədən satış məqsədi ilə əldə edilən 2 kilоqram 500 qram narkotik vasitə olan tiryəki Biləsuvar rayonun Xırmandalı kəndinin ərazisində yerləşən “Lukoil” yanacaq dolruma məntəqəsinin yaxınlığında yоlun kənarında gizlədilib.

Saməddin Vahidov narkotik vasitəni götürmək üçün 25 avqust 2015-ci il tarixdə tanışı Bəhlil Əliyev ilə birlikdə taksi sürücüsü Səməd Hüseynovun idarə etdiyi “Mercedes E 230” markalı avtomobillə Sumqayıt şəhərindən Biləsuvar rayonuna gəliblər. Avtomobildən düşən Saməddin Vahidov gecə saat 22 radələrində Biləsuvar rayonun Xırmandalı kəndinin ərazisində yerləşən “Lukoil” yanacaq doldurma məntəqəsinin yaxınlığında yоlun kənarında gizlədilmiş yerdən bir ədəd sellоfan tоrbanın içərisində оlan 2 kilоqram 500 qram narkotik vasitə olan tiryəki götürüb.

Bu zaman Biləsuvar rayоn pоlis şöbəsinin əməkdaşları tərəfindən keçirdikləri əməliyyat-aхtarış tədbirləri nəticəsində yaхalanıb.

İşdə adı keçən Bəhlul Əliyevin cinayət işi ayrıca icraata verilib. Səməd Hüseynov isə taksi fəaliyyəti ilə məşğul olduğu üçün narkotik vasitələri əldə etmə ilə bağlı iştirakçılıq ittihamı verilməyib.

Saməddin Vahidov Cinayət Məcəlləsinin 234.4.1-ci (qabaqcadan əlbir olan bir qrup şəxs tərəfindən və ya mütəşəkkil dəstə tərəfindən narkotik vasitələri, psixotrop maddələri və ya prekursorları hazırlama, istehsal etmə, əldə etmə, saxlama, daşıma, göndərmə və ya satma) və 234.4.3-cü (külli miqdarda narkotik vasitələri, psixotrop maddələri və ya prekursorları hazırlama, istehsal etmə, əldə etmə, saxlama, daşıma, göndərmə və ya satma) maddələri ilə ittiham edilib.

Lənkəran Ağır Cinayətlər Məhkəməsinin hökmü ilə Saməddin Vahidov 8 il müddətə azadlıqdan məhrumetmə cəzasına məhkum edilib. Həmçinin onun cəzasını ümumi rejimli cəzaçəkmə müəssisəsində çəkməsi, Cinayət Məcəlləsinin 93.1.2-ci maddəsinə əsasən cəza çəkərkən narkomaniyadan məcburi müalicə olunması barədə qərar qəbul edilib.

Hökmdən narazı qalan Saməddin Vahidovun vəkili Akif Əliyev apelyasiya şikayəti verib. O, müdafiə etdiyi şəxsin barəsində daha yüngül cəzanın təyin edilməsini xahiş edib.

Vəkilin şikayəti araşdırılması üçün Şirvan Apelyasiya Məhkəməsinə göndərilib. Apelyasiya şikayəti hakim Zəki Babayevin sədrlik etdiyi kollegiyada araşdırılıb.

Saməddin Vahidov məhkəmədə ifadə verərək ittiham olunduğu maddələrlə özünü qismən təqsirli bilib. Törətdiyi əməldən peşmançılıq hissi keçirdiyini qeyd edən təqsirləndirilən şəxs əlavə edib ki, uzun müddətdir narkotik maddənin istifadəçisi olub: “Bu cinayəti də narkotik maddəyə olan tələbatı ödəmək üçün etmişəm”.

Məhkəmədə çıxış edən Saməddin Vahidovun vəkilin sözlərinə görə, işdə olan ambulator məcburi-narkoloji tibbi yoxlamanın 5 oktyabr 2015-ci il tarixli rəyi ilə müəyyən edilir ki, Saməddin Vahidovda tiryək alkoidlərini tərkibində saxlayan maddələrdən sui-istifadə edilməsi ilə nəticələnən narkomaniya xəstəliyi aşkar olunub: “Narkomaniyadan məcburi müalicəyə ehtiyacı vardır. Ərazi Narkoloji xəstəxanasında profilaktik qeydiyyata alınması məsləhət görülür”.

Vəkil əlavə edib ki, narkotikdən asılı olan Saməddin Vahidov xəstə hesab olmalı, bu səbəbdə də ona təyin olunmuş uzun müddətli azadlıqdan məhrumetmə cəzası Cinayət Məcəlləsinin prinsiplərinə uyğun deyil və cəza siyasətinin məqsədlərinə xidmət etmir: “Xəstəyə ağır cəza təyin edilməli deyil, o, sadəcə müalicə olunaraq, reabelitasiya edilib cəmiyyətə yararlı bir şəxs kimi qaytarılmalıdır. Bununla belə cinayət işinin materiallarından müəyyən edilir ki, Saməddin Vahidovun cəzasını ağırlaşdıran hallar müəyyən edilməyibm. Əksinə Saməddin Vahidovun səmimi peşmançılığı, istintaqla əməkdaşlıq edib, cinayətin üstünün açılmasına köməklik etməsi, öhdəsində iki aşağını itirmiş atası Zöhrab Vahidovun olması, Cinayət Məcəlləsinin 59-cu maddəsinə müvafiq olaraq cəzanı yüngülləşdirən hallar kimi qəbul olunmalıdır. Eyni

zamanda məhkəmə nəzərə almalı idi ki, Saməddin Vahidovun məhkumluğu yoxdur, əvvəllər qəsdən cinayət törətməyə görə məhkum olunmayıb, yaşadığı ünvan üzrə müsbət xarakterizə olunur, ailə qurmayıb, cavandır. Saməddin Vahidovu şəxsiyyət kimi səciyyələndirən bu hallara görə də onun barəsində Lənkəran Ağır Cinayətlər Məhkəməsinin 22 aprel 2016-cı il tarixli hökmü ilə 8 il müddətə təyin edilmiş azadlıqdan məhrum etmə cəzası həddindən artıq ağırdır. Bu səbəbdən də hökm cəza hissəsində dəyişdirilməli, Saməddin Vahidova ittiham olunduğu maddənin sanksiyasında göstərilən cəzanın aşağı həddində cəza təyin edilməlidir”.

Prokuror Samir İsmayılov bildirib ki, Saməddin Vahidоvun müdafiəçisi Akif Əliyevin apelyasiya şikayətinin dəlilləri əsassızdır. O, birinci instansiya məhkəməsi tərəfindən Saməddin Vahidоvun əməlinin Cinayət Məcəlləsinin 234.4.1 və 234.4.3-cü maddələri ilə düzgün tövsif оlunduğunu, məhkum edilmiş şəхsin cəzasını yüngülləşdirən və ağırlaşdıran hallar nəzərə alınmaqla, şəхsiyyəti, törətdiyi cinayətin ictimai təhlükəliliyi və хarakteri, təyin edilmiş cəzanın ailəsinin həyat şəraitinə təsiri nəzərə alınmaqla оna ədalətli cəza təyin оlunduğunu, məhkəmənin hökmünün apellyasiya şikayətinə əsasən dəyişdirilməsi üçün əsasların оlmadığını göstərib. Prokuror müdafiə tərəfinin apelyasiya şikayətinin təmin edilməsini istəyib.

Tərəfləri dinləyən hakim heyəti sonda qərar elan edib. Qərara görə, Saməddin Vahidovun apelyasiya şikayəti təmin edilməyib.

Amil