Sabiq millət vəkilinin həbs müddəti uzadılıb
Mayın 8-də axşam saatlarında Gülər Əhmədovanın məhkəməsi keçirilib və sabiq YAP-çı deputatın həbs müddəti uzadılıb. Minval.az saytının əməkdaşı məlumatı dəqiqləşdirmək üçün G.Əhmədovanın vəkili Əfsər Talıbovla əlaqə saxlayıb. Ə.Talıbov faktı təsdiqlədi. Onun sözlərinə görə, proses axşam saat 17.00-də baş tutub, 40 dəqiqəyə yaxın davam edib və G.Əhmədovanın həbs müddəti 3 ay artırılıb: “Heç bir sübut təqdim edilmədi. A4 formatda vərəqdə bir təqdimat oldu. Amma heç bir sübut göstərilmədi”.Hakim Nurəddin Bağırovun sədrliyi ilə keçirilən prosesdə qərar elan olunan kimi G.Əhmədova buna etiraz edib. Vəkilin dediyinə görə, əsəbiləşib özündən gedən sabiq deputat ona qarşı haqsızlıq edildiyini deyib: “Gülər xanım dedi ki, ona qarşı haqsızlıq olub. Tələb etdi ki, onun həbsdə saxlanılması ilə bağlı əlavə sübutlar təqdim edilsin. Həbs müddətinin uzadılmasını qeyri-qanuni adlandırdı”.Ə.Talıbov dedi ki, hər iki vəkil onun həbsdə saxlanılmasının qeyri-qanuni olması ilə bağlı əsasları hakimə təqdim edib. Vəkillər cinayət işinin gətirilməsini tələb etsə də, hakim buna da məhəl qoymayıb.“Mən soruşdum ki, məhkəmə buna hansı sübutla qiymət verəcək” deyə hakimə sual etdiklərini xatırladan vəkilin sözlərinə görə, sabiq deputatın vəkilləri bəzi sübutları təqdim etsələr də onlara əhəmiyyət verən olmayıb: “Biz bir neçə sübut, habelə Gülər xanımın xəstəlik kağızını təqdim etdik. Ona da əhəmiyyət verilmədi. Apelyasiya şikayəti verəcəyik. Sözümüzün üstündə dururuq. Həbs müddətinin uzadılması heç bir hüquqi məntiqə sığmır”.