İdarə rəisləri sahibkarlara divan tutur

İmişlidə bəzi yerli məmurların harınlığı, özbaşınalığının sonu Cəbrayıl köçkünlərinin etirazı ilə nəticələnməli idi. Belə də oldu.

Ötən ilin oktyabrında sahibkar Qurbanov Murad çörək sexi açıb. Orada 4 nəfər imkansız qadın təndir çörəyi bişirir, evlərinə ruzi aparırlar. Sahibkarın sözlərinə görə, işıq idarəsinin rəisi Mətləb müəllim işığa görə 1500, qaz idarəsinin rəisi İsrafil Məmiyev 1500, su idarəsinin rəisi Etibar müəllim isə 1000 manat haqq –“şirinlik” istəyir. Artıq sahibkar sexi bağlamaq üzrədir.

Hüquq müdafiəçisi kimi bu məsələ ilə maraqlanıb Muradın köhnə “Jiqulisi” ilə işıq idarəsinə getdik. Katibədən xahiş etdik ki, rəisə deyin sahibkar və hüquq müdafiəçisi qəbulunuza gəlib. Lakin rəis kameradan bizi görmüşdü deyə katibə “qəbul etmir”dedi. Müavini Yusif isə qapısı açıq, rəislə üzbə-üz otaqdan “1500 manatı gətir, baxarıq” deyəndə, “hansı ədalətlə belə edirsiz” dedim. Muradla mərkəzə qayıtdıq. Bu barədə mətbuatda yazı dərc olundu. Yazı dərc olunandan sonra - 20 noyabr 2016-cı ildə su idarəsinin rəisi Etibar dedi ki, müqavilə bağlansın. Qaz idarəsinin rəisi İ. Əliyevlə Qarabağ qaziləri ilə birgə Heydər Əliyev Mərkəzinin arxasında təsadüfən görüşdük. Onun əməllərini üzünə sadalayanda, “idarəyə gələrsiz, söhbət edərik” dedi. Bu adamdan bütün rayon şikayətçidir. Hətta icra başçısı Vilyam Hacıyev çoxsaylı vətəndaş şikayətlərinə görə, İ. Məmiyevi bir-neçə dəfə tənbeh etsə də, himayədarları onu müdafiə edir.



Nəhayət, 22 dekabr növbəti dəfə qaz kəsildiyinə görə, 200-ə yaxın yerli sakin qaz idarəsi qarşısında etiraz aksiyası keçirdi. Həmin gün şaxtalı havada Cəbrayıl köçkünləri şaxtaya dözməyərək, etiraza qalxdı, 5 nəfər həbs olundu. Nəhayət, qaz puluna nəzarətçilər Ağasəlim Hadıyev, Rabil Məmiyev 03 yanvar 2017-ci il məndən xahiş etdilər ki, rəislə görüş, məsələni dinc yolla həll edin. 05 yanvar 2017-ci il saat 12:05-də həmin idarədə olub, katibəyə içəri qəbula girməyimi xahiş edəndə, “buyurun, rəis təkdir” deyə cavab verdi. Salam verdim. İ. Məmiyev telefonla danışığı bitirdikdən sonra “Hərə bir qırmızı qalstuk vurub, gəlib pul istəyir” dedi. Ona sakitcə bildirdim ki, kim səndən pul istəyir? Masa üstündə “Həqiqət və Reallıq” qəzetini görüb, dedim ki, bu qəzet reket qəzetidir. Bu dərgi YAP RT sədri Səfa Ağayevi, mərhum birinci katib Qadir İsmayılzadəni və eləcə də məni təhqir edib, mərhum Q. İsmayılzadəni “erməni” adlandırıb, siz də bu qəzeti təbrik etmisiniz ki, nə yazıb düz yazıb, sevə-sevə mütaliə edirəm”. Rəis yenə mənə hücuma keçdi, təhqiramiz ifadələr işlədib, vəsiqəni istədi, hüquq müdafiəçisi vəsiqəni alan kimi telefonu ilə fotosunu bir-neçə dəfə çəkdi. “Gör sənin başına nə oyun açacam, səni məhv etdirəcəyəm” deyərək, məni vurmaq istədi, bağıra-bağıra itələyərək, divara çırpdı, qapını açıb, katibələrin otağına itələdi. Oradan çıxıb rayon prokuroru Pənah Abbasovun qəbuluna yazıldım. Saat 12:13-də ərizə verdim. 09.01.2017-ci ildə prokuror köməkçisi Tural müəllim zəng edib, izahat verməyimi xahiş etdi. Bakıda olduğumu bildirdim. Oradan isə RİH başçı əvəzi cənab Valid Ağayevin qəbuluna gəldim, bina qarşısında şifahi şikayət etdim:

Bir qədər də Şəhər İcra nümayəndəsi Məmi Atakişiyev barədə. Cənab Məmi müəllim 530 hektar pambıq əkib, 3 ay işə gəlməyib, pambığını yığdırıb. Məmi müəllimin nəzarətsizliyindən şəhəri sahibsiz itlər bürüyüb. İtləri tutub, çinlilərə təhvil verir, həm özü qazanar, həm də çinlilər. Heyvan hüquqları komitəsi də Məmi müəllimi qınamaz.


Etira aksiyasında həbs olunanlara gəlincə, Cəbrayıl köçkünləri təxribata çəkildi.Halbuki “Qaçqınkom”un sədri Əli Həsənova, xalqa “otxod” deyən Astan Şahverdiyevə köçkünlər məlumat veribmiş ki, biz şaxtadan donuruq, xəstə düşürük, qoca, uşaq əziyyət çəkir.

8 yanvar 2017-ci il İmişli rayon Yalavac kənd sakinləri də bələdiyyə sədri Qəhrəman Qəhrəmanovun talançılığına, korrupsiyaya yol verdiyinə, kəndin torpağını saxta və hərracsız tikinti kralı Əvəz Şükürova, eləcə də kərpic zavodun ərazisini satdığına görə etiraz mitinqi keçiriblər.

Məhbub Zülfüqarlı