“Azəristiliktəchizat” isə şikayətləri belə qəbul etmir


Son günlər sosial şəbəkələrdə əhalinin əsas narazılığı kommunal xidmətlərlə bağlıdır. Belə ki, bir çox vətəndaşlar onlara fantastik məbləğdə “işıq pulu” borcu gəldiyini bildirirlər. Hər ay maksimum 20-25 manat işıq pulu ödəyən vətəndaşlıar indi onlara 50-200 manat arasında ödəniş qəbzinin gəldiyini bildirirlər. Şübhəsiz ki, hər ilin sonu, yeni ilin əvvəlində olduğu kimi yenə də vətəndaşlar “Azərişığ”ın kəsirlərini ört-basdır etmək üçün “yüklənirlər”. Kommunal xidmətlərin səviyyəsi isə heç də qaneedici deyil. Rekasiyamıza daxil olan məqalə də elə bu barədədir. Həmin məqaləni təqdim edirik.

Nizami rayonundakı 4 saylı istismar sahəsinin balansında olan Babək prospekti, 71 saylı binanın istilik təchizatı 4 gündür kəsilib. Bununla bağlı “Azəristiliktəchizat” Açıq Səhmdar Cəmiyyətinin (ASC) 956 “qaynar xətti”nə - 379-19-78 nömrəli Mərkəzi Dispetçer Xidmətinin əlaqə mərkəzinə zənglər edilsə də , bu xidmətlərin “avtomatik” rejimdə işlədikləri bəlli olub . Başqa sözlə , canlı olaraq abonentləri dinləmək əvəzinə , siqnal səsindən sonra mesajlarını səsləndimək təklif edilir . Di gəl , dörd gündür nə mesaja qulaq asan olur , nə də istiliyin olmamasının səbəbi araşdırılır. İqtisadiyyat Nazirliyinin 498-15-01 və 195-2 “qaynar” əlaqə mərkəzləri də şikayətləri qeydə alsalar da , istehlakçıların dörd günlük istilik həsrətinə son qoyulmayıb və deyəsən , son qoyulacağı da gözlənilmir. Nədən, ümumiyyətlə , istehlakçılarla heç kimin maraqlanmır? Fikir verin , dörd gündə bir nəfər də olsun , binaya gəlib istiliyin olmamasının nədən qaynaqlandığı ilə maraqlanmayıb. Belə təsəvvür yaranır ki , müvafiq dövlət qurumlarının, hökumətin başlıca işi elə baş qatmaqdır. Axı, vətəndaş soyuqdan dona bilər! Alternativ istilik qaynaqlarından yararlanmağın mümkünlüyünü düşünənlər yanılırlar .

Birincisi , elektrik enerjisi ilə evin qızdırılması həm xətlərin yüklənməsi üzündən sıradan çıxmasına gətirir, həm də vətəndaşın cibinə uyğun deyil.

İkincisi , “Azəriqaz” İstehsalat Birliyi (İB) vətəndaşlara mənzillərini “KOMBİ” ilə qızdırmalarına da texniki şərti Nazilər Kabinetinin müvafiq qərarına zidd olaraq pulla verdiyindən vətəndaşların Tanrıdan özgə əllərini uzatmağa kimsəsi qalmır . Onu da deyək ki , sözügedən binada vaxtaşırı işıq və qaz problemi də yaşanır .

Ötən il “Azəristiliktəchizat” ASC ilə “Azəriqaz” İB arasında yaranan borc qalmaqalı üzündən istehlakçılar qış mövsümündə 1 aya yaxın istilik üzünə həsrət qalanda rəsmilər həmin bir ayın pulunu tələb etməyəcəklərini bildirdilər . (İstehlakçının da “ hələ bir verilməyən istiliyə görə pul da istə” deməkdən savayı nəyə gücü çatır, hüququnu qoruyan yox, maraqlanan yox.) Amma qış mövsümü başa çatan kimi istilik xidməti abonentlərə qanunda , tarifdə nəzərdə tutulduğundan ikiqat–üçqat məbləğdə ödəniş qəbzləri göndərib nağd yolla aldıqlarına əlavə etməyə üstünlük verdi. Yəqin indi də elə olacaq .
Hələ ki , “Azəristikitəchizat”ın 4 saylı istismar sahəsi binaya verdiyi istiliyin niyə mənzilləri qızdırmadığını araşdırmaqdan imtina edir. İqtisadiyyat Nazirliyinin 195-2 “Çağrı Mərkəzi”ndən isə gündəlik şikayətlərdən sonra 497-60-52 nömrəsinin xidmətində dayandığı Firudin Vəliyevə müraciət etməyi məsləhət bildilər . Bu nömrə isə hələ ki susur və faks nömrə olduğunu “zummer”lə açıqlayır ...

Məğrur Bədəlsoy