Ona görə də, millətə lazım olan Elçin Əfəndi kimi aktyor ölkədən getməyə çalışır, Yaqub Salmanov kimi mütəxəssis isə, çörək tapmır
“Hürriyyət” qəzetinin 14 və16 fevral 2017-ci il tarixli saylarında Elçin Əfəndinin: “İşə getmək üçün ürəyi xəstə anamdan yol pulu istəyirəm” – müsahibəsini ürək ağrısı ilə oxudum. Elçin bəy hələ də bilmir ki, dünyanı idarə edənlər prezidentlərin, sahibkarların, kapitalistlərin çoxu manyak, aktyor və artistirlər. Ötən yazılarımızda İmişli sakini Salmanov Yaqubun əsl pambıq mütəxəssisi, kənd təsərrüfatı mühəndis-mütəxəssisinin qısa müsahibəsində göstərmişdik ki, əsl mütəxəssis işsizdir, pambıq MKT rəisi isə, “ZİL” sürücüsü olmuş, bazarkom və tikinti kralı olan Məcnun Şükürov, eləcə də, coğrafiya müəllimi Səlim Məhərrəmov “dayı” hesabına kənd təsərrüfatı idarəsinin rəisidir. Yaqub bəy demişdi ki, “atın qabağına ət, itin qabağına ot qoyulan, ailə-klan idarəetmə, eləcə də, korrupsiya, rüşvət, inhisarçılıq davam etdikcə, aktyor, artislik edənlər ölkəni uçuruma sürükləyəcəklər, vətəndaşları mühacirətə göndərəcəklər. İntihar, işsizlik və ailələrin dağılması hər saniyədən bir baş verəcək”. Ailənin özü kiçik bir dövlətdir. Əsl aktyor Elçin Əfəndi ola-ola, ağılasığmayan sırtıq aktyor, artistlər vəzifədə at oynadanda, atın qabağına ət qoyulanda, at da öləcək, it də sahibsiz qalacaq. Reket qəzet, reket həkim, müəllim, rəislər ölkəni uçurum astanısında qoyublar. Ötən həftələrin birində bəzi media qurumlarında yazılmışdı ki, İmişli RPŞ rəisi Ayaz Cəfərov “Sarısu gölü” ətrafında ov edərkən avtomobilini batırır və avtomobili çıxartmaq üçün Hidroqovşaq rəisi Mirqoca Mirişova zəng edərək idarəsinin (oxu: malikanəsinin 30 ildir rəisidir) 400 minlik traktorunu istəyir. Traktor elə batır ki, bayırda yalnız torpaq yığan aqreqat qalır. Rəis isə, neft idarəsindən min metrlik tross gətizdirib avtomobilini çıxara bilir. Traktor barədə Meliorasiya və Su Təsərüfatı ASC sədri Əhməd Əhmədzadə, tabeliyində olan Hidroqovşaq rəisini danlayır ki: “Ay Mirqoca, o idarə dədənindir ki, aparıb batırmısan, indi helikopteri haradan tapaq ki, ASC-yə məxsus bahalı inventarı yerin altından çıxartsın”. Mirqoca Mirişov cavab verir ki, RPŞ rəisinin tələbindən çıxmağa qorxdum. Yani, traktoru verməsəm o halda bütün idarə rəislərimizin tank kimi avtomobillərimiz batacaq idi! Zor deyilmi, məgər? Hər iki rəis jurnalist, hüquq müdafiəçisi Məhbub Zülfüqarlıya sataşmış, M. Mirişov isə ən tərbiyyəsiz, işverən birinin əli ilə Məhbub bəyi təhdid etdirir, RPŞ rəisi ona villa tikdirmiş, Avtoyol rəisi Şükür Aslanov, tikinti kralı Əvəz Şükürovun birbaşa şikayət-sifarişləri ilə, 30.08.2016-cı il həbs etdirmişdilər. Dövlət isə Məhbub bəyin şikayətini əsassız saymışdı. Cəzanı isə, hələlik GÖYDƏKİ xəbərdarlıq, biabırçılıqla verir. Ötən həftə İmişlidə hüzr məclisində bizə sual verdilər ki: “Təhsil, səhiyyə nə vaxt düzələcək?” “Sualı niyə dövlət, hökümət rəhbərləri Milli Məclisə yox, jurnalistlərə verirsiniz?” deyə – cavab verdik. Əgər tədris fənn müəllimi imtahandan qiymət ala bilmirsə, ona diplom verənin, ondan rüşvət qoparıb müəllim götürənin, eləcə də, saxta diplomlu, savadsız müəllimin lap boyunu yerə soxum. Gələcəyimizi savadsız, küt, cahilləşdirənlərlə sovet dövrü müəllimlərimizi müqayisə etdikdə dəhşətə gəlirəm ki, gələcəyimizi cahil yetişdirirlər. Suriya, İraq, Liviya və bir çox ərəb ölkələrinin taleyini görüb, dövləti idarə edən nazirlər “Təhsil, səhiyə nə vaxt düzələcək?” – sualına cavabdeh olanlar cavab versinlər. Məgər MTN, Rabitə “çete”sindən həmin nazirlikər azmı fərqlənirlər?
Ona görə də aktyor Elçin Əfəndinin bir yolu qalır, ya kreditə pul götürüb rüşvət verməklə vəzifə almaq, ya da stomatoloqluq edərək diş çəkməklə məşğul olmalıdır. İmişlini reket stomatoloqlar bürüyüb. Əgər vətəndaşın stomatoloq diplomu yoxdursa, səhiyə nazirinin 5000-ə verdiyi sertifikat yoxdursa, İmişlidə 100-dən çox stomatoloji kabinetlərin arxasında kimlər durur? Hələ, onlar hər il Metrologiya Standartlaşdırma, Metrologiya və Patent üzrə qurumun məmurlarına 250 manat rüşvət də ödəyirlər. Stomatoloqlardan biri idarənin rəisi Saleh Səmədova dedikdən sonra, həmin şəxs 250 manat pulu verməyib və vergi idarəsi də ona məxsus VÖEN-ni bağlayıb. DSMF əməkdaşları hər reket stomatoloqdan 50 manat haqq alır, vergi məmurlarının haqqı isə 30 manatdır. Əsl stomatoloqlardan bir neçəsinin diplomu fərqlənmə diplomudur. Amma “qırmızı” qazanan reketlərdirlər.
Standartlaşma, Metrologiya və Patent üzrə qrumun rəisindən, bəzi media qurumlarında sabiq müxalifətçi Tapdıq Həsənov şok faktlar da açıqlamışdı. Əvvəllər idarənin rəisi Saleh Səmədov sifarişli faktları “Sabaha inam” qəzetinin ildə, ayda bir dəfə çıxan sahibi M. Şahverdiyevaya verdirirdi. Bu M. Şahverdiyeva indi xəstə düşüb.
O, qəzeti 2016-cı ildə bircə dəfə çıxartdı. Bu gün isə S. Səmədovun şəkilləri ayda bir dəfə işıq üzü görən reket-qəzet “Həqiqət və Reallıq” qəzetini bəzəyir. Tərifin biri 5 qəpik. İmişli RİH qarşısında 40 yaşlı Svetlana adlı bir qadınla görüşdük. Sual verdik ki, 2 gündür burada şam ağaclarının tinində niyə gizlənib, durursan? O, cavab verdi ki, “başçını gözləyirəm”. Məni görən kimi çağırır, halımı xəbər alır, elə pul verir ki, heç kim də görmür. O pulla dayım qızı mərhum Nəzakətin iki körpə balalarını 20 gün saxlayıram. Başçı yoxdur deyə narahatam. Deyirlər Saleh Səmədov insanlara əl tutur, deyə sual verdik. Cavab verdi ki, “Səmədov gözəl xanımlara pul verir, məni isə təhqir edərək qovmuşdu. Digərləri də, onun kimi köməklik istədikdə hər kəsi aşağılayıb qovurlar. Başçı burada olmasa, o iki uşaqda acından ölər.
Qeyd edək ki, Svetlana əlildir və İmişlidə heç kimi yoxdur. Ata-anası dünyasını dəyişib, iş qabiliyyəti də yoxdur ki, işləyə bilsin. Orta məktəbə də getməyib. Yəni, savadsızdır. Qarabağ müharibəsi qaziləri Svetlananın dediyini təsdiqlədilər. S. Səmədovu bir qrup yaltaq təbliğ edir. O, başçının tapşırığı əsasında Qurbanlıq bayramında Qarabağ əlillərinə qurban payı verməli idi. Çox keçmədi ki, aradan çıxmağı bacardı. Belə hərəkətlərinə görə, icra başçısı onun idarəsini İmişlidən çıxartdırdı. S. Səmədovdan elə faktlar danışırlar ki, mətbuat üçün deyil. Sahibkarların hamısı belədir. İndi də M. Şahverdiyeva imişlilərə ciddi problemlər yaradan bazar sahibi Əziz Quliyevə, tikinti kralı Əvəz Şükürova “Eloğlu, nüfuzlu sahibkar” yazaraq, pul qazanmaq eşqi ilə yaşayır. Əziz Quliyevi güllə ilə hədələsən də, dilənçiyə qəpik verməz. Bazarın içərisində bir neçə xırda biznesmen, alverlə məşğul olan şəxs dünyasını dəyişib. Bu şəxs heç birinin hüzr mərasiminə getməyib və yalnız yuxarılarla hesablaşır. Vergini, standartlaşmanı və sairəni bu adam heç cür hərləmir və çox oğullara məhkəmə hökmü çıxartdırıb. Xüsusilə də, Zülfüqarlı qardaşlarına üst-üstə 66 dəfə məhkəmə prosesi qurdurub. Vəkili isə şanlı müsavatçı Osman Kazımov və Sərraf Feyzullayevlər olublar. Müxalifətçi hara, arxalı yetim-yesiri ac qoyan “sahibkar” hara? Buna ikrahla pul qazanmaq deyərdim. Şaban demişkən: “Gec gələn belə paranın içinə.... .” Ayıbdır bəylər, ayıbdır!. Sərraf Feyzullayev bu qədər para ilə Allah evini ziyarət də edib. Hacılıq, sonuncu peyğəmbərimiz Məhəmməd (s.ə.s) evini ziyarət etməklə, məhz atılan addımlar Allahın evini ziyarət etməkmi deməkdir?. Bir hacı da deyirmiş: “Şeytana mən daş atanda, dedi ki, ala, utanmırsan? Sən məndən böyük şeytan deyilsən? O qədər şər işlər gömüsən ki, sənin yerinə mən utanıram.” Adam da şeytana daş atmayıb, gəlib yeyib-içməyindən, kefindən qalmır. Başçı V. Hacıyev İmişliyə gələndə ilk qovduğu qudurmuş, həyasızlaşan bu “həci” olub.
Məcnun pambıq rəisi olanda, Nicat da stomatoloq olmalıdır. Həsən də qəlyan çəkir, Hüsən də qəlyan çəkir tənbəki bol olanda, SİÇAN da qəlyan çəkir. Allahsızlar, Allah evini ziyarət edərək gəlib, sırtıqlaşıb, qəddarlaşanda sahibsiz itlər də çoxalacaq, İmişlinin mərkəzindən axan su kanalı, kanalizasiya üfunət mənbəyi, ölmüş heyvan və quş cəmdəkləri ilə də doldurulacaq. Axı, adamlara vəzifəni verəndə, bir az düşünmək lazımdır! Sonuncu peyğəmbərimizi ziyarətə gedənlərin çoxu qayıdandan sonra qudururlar və elə bilirlər ki, Allah arxasındadır. Çünkü belə cahil əməlləri azad insanlara düşmənçiliklə keçənləri vəzifəyə oturdanlar azad dünyaya, azad millətlərə düşmən kəsilirlər. Rəhbərlik arzusunda olanların daha çox pis əməlləri, təkəbbür və insanlara zülm etmək olar.
İmam Rza (ə) buyurur ki: “O kəsin ki, rəhbərlik etməyə ləyaqəti yoxdur, o, insanları fəlakətə sürükləyər. Rəhbər olmağa o kəs layiqdir ki, bütün insanların xeyrini düşünsün, təmiz yol ilə irəliləsin”.
Adi çoban qoyunlarını elə otarır ki, sağa-sola dağılışıb, qurda-quşa urcah olmasın, azmasın. Çoban heyvanlarını dağılmaqdan qorumaqla ailəsini, ruzisini qoruyur. Ona görə də, millətə lazım olan Elçin Əfəndi kimi aktyor ölkədən getməyə çalışır, Yaqub Salmanov kimi mütəxəssis isə, çörək tapmır.
Prezidentin sərəncamı ilə dəmiryolu xəstəxanaları ləğv edildiyindən, onlar özəlləşdirilməyə çıxarılacaq. İmişli dəmiryolu xəstəxanasının baş həkimi Rafiq bəy Məhbub bəyə yazmışdı ki, “xəstəxana onun özəl klinikasıdır”. İndi Rafiq həkimin halı dəyişib. Baş həkim olmadığından onun qəbuluna üz tutan xəstələrin sayı da azalacaq. Sakinlər baş həkim idi deyə: “Ə, sən Rafiq “doxtur”dan çox bilirsən”-deyə onun üstünə yüyürürdü.
İmişlilər indi də Əziz Quliyevin Bakıdakı “İstanbul” kilinikasına üz tuturlar. Ə. Quliyevə müəllim deyirlər. Əsl müəllim Sabir isə “tamadalıq” edir və o, bir dəfə toyların birində Əziz “müəllimə” söz vermək istəyib. O isə Sabiri çağırıb və ona dişinin dibindən çıxanı da deyib. Hansı ki, toy yiyəsi tamadaya onu dəvət etməyi tapşırıb. Sabir müəllim bir həftə qorxusundan evdən çıxmayıb ki, bazarkom onu tutduracaq və o, həmin vaxtdan da tamadalıq etmir.
Qanunda qeyd olunub ki, məmur bizneslə məşğul ola bilməz. Amma, səhiyyə, təhsil, su idarə rəisləri və s. oturduqları idarəni biznesi kimi idarə etməsi bir yana, hamısının ferma, market, tarlaları da “gül vurur”. Ona görə də bahalaşma, manatın ölməsi, onların “çiçəyini çırtladıb”. İnsan nəyə öyrənirsə ona immuniteti və vərdişi oyanır. Dünyanın siyasət dəllalları, yəni Rokfelleləri, Buş, Obama, Putinləri ölkə sakinlərimizin imunitetlərini zərərli şeylərə öyrəşdirməyi Rokfellerlərin, 102 yaşlı artistin mətbuata çıxışından oxuyub dəhşətə gəlmişəm.
Prezident qudurğan MTN, Rabitə “çete”sini qandallatdırsa da, digərləri ibrət götürmür ki, götürmür. Akif Çovdarov insanları gözüyaşlı qoyanda, ailələr dağıdılanda, qandallananda içəridə incidildiyini, şərləndiyini deyir. Ay sizləri görüm ömürlükdə qalasız. “Nə tökərsən aşına, o da çıxar qaşıına”. Heyif ki, ölkədə həbsxanalar azdır, bütün xalqı narazı salanlar indi qandallarından narazıdırlar.

Həsən Dərya