Tofiq Sadıqov ciddi yoxlamalara məruz qalacağını bildiyindən rayon təhsilində kosmetik dəyişikliklər etməyə çalışır

gundemxeber.az «Beyləqan rayon Təhsil Şöbəsinin müdiri Tofiq Sadıqov icra başçısı Vaqif Abdullayevin adından istifadə edərək, öz məqsədlərini reallaşdırmağa, daha çox gəlir əldə etməyə çalışır». Bu sözlər redaksiyamıza müraciət edən və Tofiq Sadıqovun yarıtmaz fəaliyyətindən şikayətlənən bir qrup Beyləqan sakini tərəfindən deyilib.
Şikayətçilərin bildirdiyinə görə, Beyləqan rayon Təhsil Şöbəsinin müdiri məclislərin birində açıq şəkildə rayona yeni təyin olunmuş icra başçısı Vaqif Abdullayevlə yaxın olduğunu və buna görə də ona heç kimin gücünün çatmadığını bəyan edib: «Görünür, Tofiq Sadıqov icra başçısına yaxın olmasına arxayınlaşaraq təhsil şöbəsində istədiyini eləyir və heç kimə hesabat vermir. Beyləqan təhsili uzun illərdir ki, heç bir ciddi uğurlara imza atmayıb. İnanmayan varsa, buyurub məsələ ilə bağlı müvafiq araşdırma apara bilərlər. Məsələn, hələ bir neçə il öncə təhsil sahəsində başlanılan islahatlar ölkənin əksər rayonlarında uğurla həyata keçirilsə də, Beyləqanda bu sahədə heç bir irəliləyiş əldə olunmayıb. İnandırım sizi, nə qədər ki, Tofiq Sadıqov Beyqəlanın təhsil sisteminə rəhbərlik edəcək, deməli bu vəziyyət olduğu kimi davam edəcək».
Ötən sayımızda sizləri Beyləqanda təhsilin vəziyyətilə bağlı apardığımız araşdırmanın nəticələrilə tanış edərkən qeyd etmişdik ki, 2011-2012-ci tədris ilində rayonda fəaliyyət göstərən orta məktəblərdən ümumilikdə 1000-1200 arası şagird məzun olub. Onların əksəriyyəti ali məktəblərə qəbul olmaq üçün sənəd versələr də, çox az bir hissəsi tələbə adını qazana bilib. Məhz bu faktın özü Beyləqanda təhsilin səviyyəsinin aşağı olmasından xəbər verir. Elə bu səbəbdən də rayon sakinləri Tofiq Sadıqovun yatırmaz fəaliyyətinə etiraz əlaməti olaraq redaksiyamızla yanaşı, aidiyyəti qurumlara da şikayətlər edirlər.
Eyni zamanda, o da bildirilir ki, Beyləqan rayon Təhsil Şöbəsində mövcud olan neqativ halların başında birbaşa Tofiq Sadıqov dayanır. Məsələ ilə bağlı məlumat verən mənbənin sözlərinə görə, bu, hüquq-mühafizə orqanlarının da diqqətindən yayınmayıb. Yaxın vaxtlarda məsələ ilə bağlı konkret tədbirlərin görüləcəyini deyən mənbə iddia edir ki, ölkənin hüquq-mühafizə orqanları iyun ayının sonlarına yaxın Beyləqan rayon Təhsil Şöbəsində ciddi yoxlamalara başlayacaqlar: «Hələlik yoxlamaların nə ilə nəticələnəcəyini demək bir qədər çətindir. Lakin Beyləqan əhalisini yaxşı bəllidir ki, Tofiq Sadıqov fəaliyyəti dövründə bir sıra ciddi nöqsanlara yol verib və elə bu səbəbdən də indi həyəcan içindədirlər». Mənbənin sözlərinə görə, Beyləqan rayon Təhsil Şöbəsinin müdiri yaxın vaxtlarda ciddi yoxlamalara məruz qalacağını bildiyindən sakinlərin könlünü almağa, rayon təhsilində kosmetik dəyişikliklər etməyə çalışır: «Çünki Tofiq Sadıqov həm rayon camaatının, həm də müəllim heyətinin haqlı etirazına səbəb olan çoxsaylı addımlara imza atıb. Məsələn, Beyləqan rayon Təhsil Şöbəsinin müdiri bu ilin may ayında gül bayramı ilə əlaqədar olaraq hər məktəb direktorundan 500 manat pul yığdırıb. Həmin vaxt bu məsələ ilə bağlı mətbuatda da bəzi məlumatlar getmişdi. Düzdür, daha sonra Tofiq Sadıqov deyilənləri inkar etməyə çalışsa da, Beyləqan sakinlərinə məlumdur ki, şöbə müdiri bu yolla xeyli vəsaitin toplanmasına müvəffəq olmuşdu. Odur ki, bu və digər əməllərinin üstünün açılmasından, eyni zamanda hüquq-mühafizə orqanları tərəfindən aparılacaq yoxlamalardan ehtiyat edən Tofiq Sadıqov nə yolla olursa-olsun sakinlərin könlünü almağa, rayon təhsilində kosmetik dəyişikliklər etməyə çalışır».

Sərxan Mehdizadə