Nizaməddin Rzayevin də sonuna çıxılır

gundemxeber.az «2011-2013-cü illərdə Bakı şəhərinin və onun qəsəbələrinin sosial-iqtisadi inkişafına dair Dövlət Proqramı»na əsasən şəhərin içməli su təchizatı yenidən qurulur. Habelə kanalizasiya xətləri dəyişdirilir və istifadə müddətini başa vurmuş su boruları yeniləri ilə əvəzlənir. «Azərsu» Səhmdar Cəmiyyətinin (SC) həyata keçirdiyi layihələrə dövlət tərəfindən milyardlarla manat vəsait ayrılıb. SC rəhbəri Qorxmaz Hüseynov bu posta təyin olunarkən vəd vermişdi ki, qısa müddətdə paytaxtın içməli su ilə bağlı problemləri həll olunacaq və tez-tez qəzaların baş verdiyi su boruları yenilənəcək.
Düzdür, «Azərsu» tərəfindən bəzi işlər görülüb. Ancaq ayrılan pulun qarşılığında bu, «dəvədə qulaq» kimi bir şeydir. Məlumat üçün bildirək ki, hazırda «Azərsu»nun gördüyü bütün tikinti işlərinə qurumun Əsaslı Tikinti Departamenti nəzarət edir. Departamentin fəaliyyəti və onun rəhbəri Arzuman Abbasovun ölkə qanunlarına qarşı yönələn hərəkətləri barədə ötən saylarımızdan birində geniş bəhs etmişdik. Nəzərinizə çatdıraq ki, bu şəxs hələ Oqtay Əsədov «Azərsu»ya rəhbərlik etdiyi dövrlərdən burda çalışır. O.Əsədov Milli Məclisə spiker təyin olunandan sonra Nizaməddin Rzayev yeni rəis oldu. Lakin Arzuman Abbasov Rzayevin rəhbərliyi dövründə də postunu möhkəm saxlamağı bacardı. Bəlkə də bu işdə ona kimlərsə köməklik göstərdi.
Departament rəhbərinin işləri haqqında yeni məlumatlar əldə etmişik. Redaksiyamıza daxil olan məlumatlara görə, «2011-2013-cü illərdə Bakı şəhərinin və onun qəsəbələrinin sosial-iqtisadi inkişafına dair Dövlət Proqramı»na əsasən Ceyranbatan Sutəmizləyici Qurğular Kompleksi ərazisində ultrasüzülmə texnologiyasına əsaslanan müasir sutəmizləyici qurğu tikilir. Təməli 8 sentyabr 2011-ci ildə qoyulmuş qurğunun tikinti müddəti 18 ay nəzərdə tutulur. Məhsuldarlığı saniyədə 6 kubmetr (sutkada 520 min kubmetr) olacaq bu qurğuəhalinin fasiləsiz, keyfiyyətli içməli su təminatına öz töhfəsini verəcəkdir. Bu layihənin reallaşması üçün 8 milyondan çox vəsait ayrılıb. Məlumatlara görə, tikintiyə nəzarət edən A.Abbasov bəzi əyintilərə yol verməklə işlərin deyilən vaxtda yekunlaşmasının qarşısını almağa çalışır. Tikintiyə cəlb olunan texnikalar və materiallardan departament rəisi başqa məqsədlər üçün istifadə edir. Tikinti üçün alınan materiallar sənədlərdə şişirdilmiş qiymətlərlə qeyd olunur. Qeyd edək ki, «Quba şəhərinin su təchizatı və kanalizasiya sistemləri kompleksinin yenidən qurulması layihəsi» də Əsaslı Tikinti Departamenti tərəfindən həyata keçirilir. Layihə 2035-ci ilə qədər perspektiv inkişaf nəzərə alınmaqla Quba şəhəri, Qırmızı qəsəbə, Timiryazev, Dağlı, Qaladüz, Alekseyevka və İqriğ qəsəbələrində əhalinin içməli su və kanalizasiya xidmətlərindən istifadəsinin yaxşılaşdırılmasına hesablanıb. Layihə çərçivəsində 1 ədəd 5000 kubmetrlik, 2 ədəd 3000 kubmetrlik anbar tikilib. Layihə üzrə işlərin 2012-ci ilin sonunda, yəni bu ay başa çatdırılması nəzərdə tutulsa da, bu yöndə konkret irəliləyiş yoxdur. Məlumatlara görə, sözügedən layihənin başa çatdırılması üçün hələ 3-4 ay vaxt lazımdır. İşin nəyə görə yubanmasının səbəblərinə gəlincə məlum olur ki, A.Abbasov işçilərinə göstəriş verib ki, tikintini gecikdirsinlər. Ona görə ki, işlərin uzanması əlavə vəsaitin mənimsənilməsi deməkdir. Son olaraq onu da qeyd edək ki, «Azərsu»da dolaşan xəbərlərə görə, A.Abbasov qurumun sədri Qorxmaz Hüseynovun yerinə göz dikib. Məlumatlı mənbəmizin dediyinə görə, hələ Nizaməddin Rzayevin vaxtında Abbasov bu istəyini açıq-aşkar büruzə vermişdi. Amma həmin vaxt onun niyyəti baş tutmamışdı. Maraqlıdır, görəsən, Q.Hüseynov ayağının altını qazan bir insanı nəyə görə vəzifədə saxlayır?
Rasim