Milli Dövlətçilik Partiyasının hazırda həbsdə olan sədri, milli-azadlıq hərəkatının öncüllərindən olan Nemət Pənahlının sağlıq durumu yaxşı deyil. Bu barədə “Azadlıq”a Nemət Pənahlının yoldaşı Həcər Pənahlı məlumat verib.

Onun sözlərinə görə, Nemət Pənahlı ilə sonuncu dəfə on gün öncə - iyulun 14-də görüşüblər: “Növbəti görüş üç aydan sonra olacaq. Nemət Pənahlının vəziyyəti ağırdır. 5-6 kvadrat metr ərazisi olan yerdə saxlayırlar. Gündə bir dəfə hava almağa çıxardırlar. Həmin vaxtı da onu balaca, üstü və dörd yanı dəmirlərlə bərkidilmiş yerdə saxlayırlar. Təsəvvür edin, hava almaq üçün də onu dəmir ”reşotka"larda saxlayırlar. Həmin yer qatı cinayətkarlıar üçün nəzərdə tutulub ki, bayıra çıxan kimi yenə adam öldürər. Nemətin nə günahı var? O adam öldürüb? Səhəti Qobustan həbsxanasında saxlanmasına imkan vermir. Çox ciddi bir rejim var. Üç aydan bir görüş olur, yeməkləri normal deyil. Oranın qidası ilə yaşamaq olmaz. Onu sonuncu dəfə görəndə tanıya bilmədim".

Həcər Pənalı deyir ki, Nemət Pənahlıya heç bir tibbi yardım göstərilmir: “Qobustan dəhşətli qapalı bir şəraitdir. Hamı da bilir ki, şəkərdi. Ağır formasındandır. Ona orada havasız, hərəkətsiz qalmaq həyatı üçün ciddi təhlükədir. Şəkəri olan adam daim təmiz havada olmalı və hərəkət etməlidir. Bu xəstəliyi daşıyıb yaşamaq yalnız möcüzə şəklində ola bilər. Neməti şüurlu şəkildə öldürmək istəyirlər. Bir var ki, göz görəsi öldürəsən, bir də var ki, bu cür variantla. Nemət 17 saylı Cəzaçəkmə Müəssisəsində saxlanılanda mətbuata açıqlama vermişdim ki, onu öldürmək istəyirlər. Neçə dəfə ölüm təhlükəsi ilə üzləşib. Üstünə hücum çəkiblər, təhdid ediblər. Bu günlərdə 12 saylı Cəzaçəkmə Müəssisəsində buntun qaldırılması barədə mətbuatda yazılar getdi. Mehman Sadıqovun bircə dənə vəzifəsi var. Onu kresloda oturdublar ki, nə desələr təkzib eləsin. Təkzib eləməklə iş həll olunmur. Həbsxanalarda vəziyyət o qədər acınacaqlıdır ki, orada üsyan qalxa bilər. Onların vəziyyəti çox bərbaddır. Nə tibb məntəqəsi, nə tibbi yardım var.

Nemət Pənahlı kimi bir adama, bilə-bilə ki, mətbuatın diqqətindədir, tibbi xidmət göstərilmirsə, adi dustaqlara nə ola bilər".

Həcər Pənahlı qeyd edir ki, həyat yoldaşının yalnız şəkərini ölçüblər: “Onun ancaq qanını götürürlər və sonra gəlib deyirlər ki, şəkərin bu qədərdir. Başqa bir xidmət göstərilmir. Bir sözlə tibb məntəqəsi yalnız şəkərin miqdarını ölçməklə məşğuldur”.

“Dustaqların hüquqlarını müdafiə etdiyi üçün onu Qobustana apardılar. Adam ölür, uzunmüddət qala bilməz. Həkim nəzarətində olmalıdır. Indi Mehman Sadıqovla əlaqə saxlasınız deyəcək ki, hər şey əladır. Şikayət ərizəsi yazmışam ki, yoldaşım burada qala bilməz. Çünki birincisi cinayətkar deyil, ikincisi də səhəti buna imkan vermir. Mədət Quliyev məni qəbul etmədi. Elə bil evinə qonaq getmişəm istəsə qəbul edər, istəsə yox. Məktubuma cavab verdilər ki, Nemət Pənahlı qaldığı şəraitdən razıdır. Bu qədər biabırçılıq olar?”, - deyə Həcər Pənalı bildirib.