Müsavatın Divan üzvü T. Abbaslı : “220 saatlıq işdən boyun qaçırdığım üçün həbs olunma ehtimalım var”
Müsavat Gənclər Təşkilatının sədri, Müsavat Partiyasının Divan üzvü Tural Abbaslı həbs olunma ehtimalı ilə bağlı “Yeni Müsavat”a məlumat verib. O, məhkəmənin cəza kimi kəsdiyi 220 saatlıq məcburi iş saatından boyun qaçırmaqda ittiham olunur.

Tural Abbaslı artıq onun həbsi üçün hazırlıqlar getdiyini bildirdi: “Dünən axşam Nəsimi Rayon Məhkəməsinin İcra şöbəsindən zəng edib bildirdilər ki, sabah icra şöbəsinin rəisi sizinlə söhbət etmək istəyir. Bildiyiniz kimi, mən də daxil olmaqla, bir - neçə gəncin 12 yanvar “Əsgər ölümlərinə son” aksiyasında barəmizdə cərimə tətbiq olunmuşdu. Biz də bunun qanunsuz olduğunu iddia edib, bu cəriməni ödəməmişdik. Bundan sonra hökumət həmin cəriməni ödəmədiyimiz üçün əlavə olaraq 220 saat ictimai işlərə cəlb olunmaqla bağlı qərarı verdirdi. Bizi 41 saylı Mənzil İstismar İdarəsinə (MİS) təyin etmişdilər , biz də hər gün gedib imzamızı atırdıq. Açığı, bunun özünün belə hansı qanuna əsasən edildiyi də bilinmir. Çünki onun da təlimatları olmalıdır. Hər-halda, artıq bir aydan uzun müddət idi ki, bizi MİS-ə gedib, imzamızı atırdıq. Bunlarla bağlı dünən icra şöbəsindən zəng edib məni Nəsimi Rayon Məhkəməsinə çağırdılar.”

Tural Abbaslı artıq aktın tərtib olunduğunu bildirdi: “Onlar mənim 220 saatlıq işdən boyun qaçırmağımın qeyri-qanuni olduğunu və buna görə də akt tərtib etdiklərini bildirdilər. Üstündən 5-10 dəqiqə keçməmiş, məni zala dəvət etdilər. Getdim, gördüm ki, artıq məhkəmə qurulub. Hakim gəlib, dövlət tərəfindən vəkil gəlib, polislər gətirilmişdi. Soruşdum ki, bu nə məhkəməsidir? Məlum oldu ki, artıq onlar həmin saat ərzində məhkəmə də təyin ediblər. Bununla bağlı mənə bildiriş belə verilməmişdi. Hakim məhkəmə icrasına baxıb, mənim işdən boyun qaçırdığıma görə inzibati həbs vermək haqqında qərar çıxarmaq istəyirdi. Təbii ki, mən də buna etiraz etdim. Bildirdim ki, bununla bağlı mənə xəbərdar olunmayıb, vəkilim yoxdur, dövlətin təyin etdiyi vəkili isə tanımıram, bundan imtina edirəm. Əvvəl hakim bununla bağlı vəsatətə baxmaq istəmədi. Məhkəmənin təxirə salınmasını tələb etdim. Hakim bu vəsatətə də baxmaq istəmədi. Mənim özümə yeni vəkil təyin etməyimlə əlaqədar 10 dəqiqə vaxt verdi. Özü isə müşavirə otağına getdi. O, gələnə qədər mən vəkillərlə danışdım. Bildiyiniz kimi bu vaxt ərzində vəkilin təmin olunması mümkünsüzdür. Çünki vəkil üçün müqavilə imzalanmalı, vəkil işlə tanış olmalı, müdafiə taktikası seçməlidir və s. 10 dəqiqə sonra hakim gəldi və mən məhkəmənin təxirə salınması üçün vəsatət verdim. Hakim isə məhkəməni sabah saat 11:45-ə təxirə sala biləcəyini dedi. Mən isə etiraz etdim və bildirdim ki, bir gün işlə tanış olmaq, vəkilə müraciət etmək, müqavilə bağlamaq üçün çox qısa müddətdir. O, isə qarşıdan bayram gəldiyini bəhanə edərək, başqa bir günə təxirə sala bilməyəcəyini bildirdi. Onu deyim ki, mənim həbsim üçün bütün tədbirlər görülmüşdü. Zala, zalın önünə polis işçiləri gətirilmişdi. Məhkəmə sabah - 7 avqust, saat 11:45-ə təyin olundu. Məhkəmə prosesinə hakim Xumar Mərdanova baxacaq. Yəqin ki, sabah məhkəmənin mənə təyin etdiyi 220 saatlıq işdə işləməkdən boyun qaçırdığıma görə inzibati həbs verəcəklər. Bu da yeni qanuna əsasən uzun müddətli həbs olacaq. Biz də bunu haqsız, qanunsuz, ədalətsiz hesab edirik. Bu, əslində seçki öncəsi məni seçki proseslərindən kənarda saxlamaq üçündür. Bildiyiniz kimi mən Müsavat Gənclər Təşkilatının sədri, Müsavat Partiyasının Divan üzvü, Milli Şuranın və s. üzvüyəm. Mən bunu siyasi qərar kimi qiymətləndirirəm və seçki ərəfəsində məni seçki prosesindən kənarda saxlayıb və seçkidən sonra azad edəcəklər. Bu qanunsuz siyasi qərarı pisləyirik. Hakimiyyətə də bu formada seçkiyə qatılmağın mümkün olmadığını və bu seçkinin dünya tərəfindən legitim qəbul olumayacağını bildirmək istəyirik. “