gundemxeber.az Uzun illər Azərbaycanın baş nazirinin müavini işləmiş, hazırda Rusiyada yaşayan Abbas Abbasovun «Milyarderlər konseyi»ni yaratma təşəbbüsçülərindən olması artıq «bəhrəsini» verməkdədir. Artıq hakimiyyətin ən üst siyasi çevrələrindən bu ittifaqla bağlı sərt tənqidlər ifadə olunub. Ardından isə mediada məlumatlar yayılıb ki, adıçəkilən «Milyarderlər konseyi»nin üzvlərinin Azərbaycandakı biznesi sıradan çıxarılmağa başlayıb.
Xüsusilə də Abbas Abbasovun Gəncəbasar zonasındakı imkanları minimuma endirilməyə başlayıb. Qəzetimizə daxil olan bilgiyə əsasən ötən həftə Aydın Abbasovun Gəncə şəhərində yerləşən ofisi bağlanıb. Gəncədən saytımıza daxil olan xəbərdə deyilir ki, ofisi icra hakimiyyətinin başçısı Elmar Vəliyevin göstərişi ilə dəqiq bəlli olmayan səbəblərdən qapadıblar. Məlumat üçün bildirək ki, Gəncə Şəhər İcra Hakimiyyətinin binasının yaxınlığındakı ofisdə millət vəkili olan Aydın Abbasov mütəmadi olaraq seçicilərlə görüşür, onları dinləyirdi.
Aldığımız məlumatlar arasında həmçinin Abbas Abbasovun təşəbbüsü ilə yaradılan meyvə tədarük anbarı olan 50 min tonluq soyuducunun da alındığı deyilir. Məlumata əsasən A.Abbasovun nəzarətində olan bu soyuducu tədarük anbarı artıq ötən hfətə Prezident Adminstrasiyasından gələn göstərişlə başqa bir adama verilib. Məlumatda bildirilir ki, artıq Abbas Abbasovun Gəncəbasardakı bütün maddi dayaqlarının zəiflədilməsi istiqamətində iş aparılır.
Əlavə edək ki, bir neçə gün əvvəl Abbas Abbasovun oğlu, millət vəkili Aydın Abbasov Rusiyada atasının da təşkilatçılarından olduğu «Milyarderlər konseyi» ilə bağlı danışmaq istəməyib və mediyanın verdiyi suallarla bağlı susmağa üstünlük verib.

Pərviz Quliyev