Rayonda ikili idarəçilik mövcuddur

Sirr deyil ki, Ağstafa rayonunda abadlıq və quruculuq işlərinin görülməsi hazırkı icra başçısı Məhərrəm Quliyevin vaxtına təsadüf etdi.O cümlədən uzun illərdən bəri əhalinin narazı olduğu icra başçısının müavinləri Ramiz Tatarov, Aydın Quliyev və ərazi İdarəetmə orqanları ilə iş şöbəsinin müdiri Şaiq Qurbanov kimi kapitalistlərində zərərsizləşdirilməsi Məhərrəm Quliyevin üzərinə düşdü. Rayonda onları pis mənada tanımayan yoxdur. Özləri üçün şəhərin mərkəzində ümumi görkəmə xələl gətirməklə yüzə yaxın obyekt tikdirən bu şəxslər əhalini talamaqla nə etmədilər ki?! Axrıncı halda qaz, su borularını doğratdırıb qara bazarda satdırdılar. Azadlıq qəzeti 10 sentyabr N210 (4661) sayında dərc edilmiş “Ümidlər doğrultmayan rəhbər, Ağstafa sakinləri yeni başçıdan narazıdır” başlıqlı məqalə metal mafiyasının arxasında kimlərin durduğuna əyani sübut idi.Bununlada miqyasi görünməyəcək bir şəkildə əhalinin ölkə rəhbərliyinə olan inamını şübhə altına saldılar. Bu kimi hallar Məhərrəm Quliyevin rayona rəhbər təyin edilməsi gününə qədər davam etdi – deyə rayondakı etibarlı qaynağımız bildirir. Bir ilə yaxın normal məcrada davam edən idarəçilik münasibətləri axrıncı 7-8 ayda pozulmağa başlayıb. İcra başçısı arxa plana keçib.
Hazırda uzun müddətdən bəri gözləmə mövqeyi tutan üçlük və onlara yaxın təşkilat rəhbərləri, rayonda Məhərrəm Quliyevin gözdən salınması istiqamətində iş aparırlar. Bir az əvvəl mətbuat bu barədə qeydlərini etmişdi. Müəyyən proqnozda verilmişdi. “Gündəm xəbər” qəzeti, 25 iyun 2013-cü il N143 (810) sayında “ Rayon icra başçısının dəyişdirilməsi etimal edilir, Ramiz Tatarov ən azından deputat olmaq istəyir” başlıqlı məqaləsində üçlüyün Məhərrəm Quliyevə qarşı planlarının ştrixlərini verə bilmişdi. Hazırda isə bunların müəyyən faizi özünü doğrultmağa başlayıb. Bütün fəndləri boşa çıxan Tatarova bağlı qüvvələr Məhərrəm Quliyevdən qisas almaq məqsədilə onun haqqında şayələr çıxardır, mətbuata informasiyalar ötürür, əlil və şəhid ailələrini RİHB-dən şikayətçi salırlar. Hətta haqqında prezident aparatına ünvanlanan şikayətlərdən xəbərdar olurlar. Məhərrəm Quliyev isə qarşıdan gələn prezident seçkilərini nəzərə alıb ehtimal edilməyəcək qədər ehtiyatlı davranır, üzünə qabaran şəxsləri belə cəzalandırmır. Məsələn: Bütün rayon əhalisi bilir ki, rayonun Səməd Vurğun adına parkında Ərazi İdarəetmə orqanları ilə iş şöbəsinin müdiri Şaiq Qurbanov Məhərrəm Quliyevin üzünə qayıdaraq onu hədələyib. İsmayıllı və Quba hadisələrini başçıya xatırladıb. Hətta belə davam edərsə kənd icra nümayəndələrinə, bələdiyyə sədrlərinə qapısını mismarlada biləcəyi barədə xəbərdarlıq edib. Özünün təhlükəsizlik orqanlarında çalışdığını xatırladıb. Bir az əvvəl isə başçının Ramiz Tatarovla əlbəyaxa olması barədə məlumat mətbuatda yer almışdı. Hər iki hadisənin detalları prezident aparatında təhlil olunsada hələlik Məhərrəm Quliyev üçüncü bir narahatlıq yarada biləcək məsələyə yol vermədən ehtiyatlı davranır. Əlinə düşən fürsətdən istifadə etmir. Məsələn rayonun kəndlərinin birində kənd icra nümayəndəsi el şənliyində kənd sakinini döyüb sonra da polisə apartdırmışdı. 161nömrəli qaynar xəttə olunan zəng döyülən şəxsi azadlığa çıxartdı. Amma bu məsələdən də başçı Şaiq Qurbanova qarşı istifadə etmədi. Ola bilsin başçı ilə ona tabe şəxslər arasında olan pərdə aradan götürülüb, o daha tabeçiliyində olan istənilən şəxs üzərində nəzarət imkanlarını itirib. Bu səbəbdən heç kimə söz deyə bilmir. Amma ikinci hal bir o qədər inandırıcı görünmür. İcra başçısı bilir ki, hər ay bütün bələdiyyə sədrləri və kənd icra nümayəndələri Ramiz Tatarovla Şaiq Qurbanova 40-50 manat pul verirlər. O bu halın özünə belə göz yumur. Başçı qəşəng bilir ki, rayonun Xətai, Yenigün, Zəlimxan, Aşağı Kəsəmən, Poylu qəsəbəsi, Poylu, Tatlı, Pirli, Kolxəlifəli, Dağkəsəmən, Qıraq Kəsəmən, Köçəsgər, Düzqışlaq, Qarahəsənli kənd icra nümayəndələri və bələdiyyə sədrləri üçlük üzvlərinə daha yaxın, sadiq şəxslərdir. Onlar icra başçısına deyil müavinlərə sitayiş edib,onlara arxalanırlar. O cümlədən rayonda aparıcı təşkilat rəhbərləri Məhərrəm Quliyevdən qorxmurlar. Bu halın özlüyü isə diskkonfort bir vəziyyətin pis bir şəkildə davamlı olmasına şərait yaradır. Yaranmış vəziyyət rayon rəhbərliyini narahat etmir. Başçı rayona rəhbərliyinin əvvəlki aylarındakı kimi ötkəm davranmır, susqunluq nümayiş etdirir. Bundan isə üçlük üzvləri nümayişkəranə şəkildə istifadə edir, Rayonda güclü olduqlarına dair informasiyaların yer almasında maraqlı olurlar.
Bir az əvvəl bu mövzuda qeyd etdiyimiz məsələlər qonşu Qazax rayonundan fərqli təzahür edir. Qazax rayonunda rəhbər vəzifələrdə çalışan şəxslər əhalini çapıb, talasalar belə rayon rəhbərindən qorxur, hər hansı bir müavinə sitayiş edib onu arxası bilmir. Qazaxda icra başçısının bir sözü iki edilmir. Və yaxud rəhbər şəxslər müəyyən çərçivədən kənar hərəkətlərə yol vermirlər. Çünki idarə müdirlərinin cəzalanma ehtimalı Ağstafa rayonu ilə müqayisdə çox böyükdür.
Bu məqamın özü də Ağstafalıların gözündən yayınmır, onlar bu kimi məsələlərdə fərqliliyi seçə bilirlər. Rayonu Məhərrəm Quliyevin idarə edə bilməməsini görür, ikili idarəçiliyin olduğunu sezirlər.

Elşad Məmmədov