Rayonun Mərkəzi Xəstəxanasının keçmiş baş həkimi Elşad Məmmədovun ailə üzvləri əvəzolunmaz kadrlara çevrilib

Qəzetimizin əməkdaşlarının bir sıra xəstəxanalarda apardıqları araşdırmalardan aydın olur ki, həkimlər xəstələrə sadəcə, "kliyent" kimi baxırlar. Bir müddət əvvəl ölkə başçısı vətəndaşların sosial rifah halını yaxşılaşdırmaq üçün səhiyyə sistemində müayinələrin pulsuz aparılması ilə bağlı sərəncam versə də görünür bəzi həkimlər bunu qulaq ardına vurub. Belə səhiyyə ocaqlarından biri də Ağstafa Rayon Mərkəzi Xəstəxanasıdır. Məlumdur ki, Ağstafa Rayon Mərkəzi Xəstəxanasının baş həkimi Mustafayev İlham Xəliddin oğludur.
Qəzetimizə daxil olan məlumatlara görə, Rayon Mərkəzi Xəstəxanasının keçmiş baş həkimi Elşad Məmmədovdan qalma problemlər hələ də qalmaqdadır.Belə ki, hippokrat andı içən bəzi rüşvətxor həkimlər nə içdikləri andın, nə də vicdanlarının qarşısında daşıdıqları məsuliyyəti hiss etmirlər. Ağstafa Mərkəzi Xəstəxanasında xəstə görəndə həkimlərin gözlərində günəş doğur. Sözü gedən xəstəxanada rüşvət bir nömrəli problemə çevrilib. Qəzetimizə verilən məlumatlara görə, Ağstafa Rayon Mərkəzi Xəstəxanasının baş həkimi təyin olunmuş İlham Mustafayev rəhbərlik etdiyi səhiyyədəki qanun pozuntularını elə rüşvət hesabına da ört-basdır edir. Bu barədə dəfələrlə ölkə mediasında yazılmağına baxmayaraq, havadarları bu şöbə müdirinin qanunsuzluqlarının qarşısına pərdə çəkirlər. Hətta, Səhiyyə Nazirliyinə ünvanlanan şikayətlərə də baş həkimin "əliaçıqlığından" obyektiv cavab verilmir. Onu da vurğulayaq ki, yeni baş həkim köhnə komandadan da qurtula bilmir. Belə ki, E.Məmmədovun həyat yoldaşı İradə Batıyeva hələ də Rayon Uşaq Xəstəxanasının baş həkimi işləyir. Bu, azmış kimi, İ.Batıyeva həm də rayonda 18 yaşa qədər olan uşaqların həkim məsləhət komissiyasının sədridir.
Atrıq Ağstafada belə bir şayiələr gəzir ki, bu ailənin üzvləri əvəzolunmaz kadrlara çevrilib və onlara nəinki yeni baş həkimin, hətta icra başçısı Məhərrəm Quluievin də gücü çatmır. Çünki Batıyevlərin Bakıda vəzifə tutan qohumları Afiqə və Labidə bacıları icra başçısına təzyiq göstərmək iqtidarındadırlar. Elə bu baxımdan İlham Mustafayev keşçiş həmkarının həkim qızını da, baldızı qızı Fidan Batıyevanı da yerindən tərpədə bilmir. E.Məmmədov bütün "işlərini" gördüyü köhnə ortağı Ağstafa Şəhər Poliklinikasının baş həkimi Həcər Namazovanın və səhiyyə şöbəsinin baş "ekonomisti", tibb sahəsindən uzaq olmasına baxmayaraq, səhiyyənin həmkarlar komitəsinin sədri Afət Poladovanın da kefi hələ ki, kökdür. Çünki onların da arxasında Batıyevlər dayanır. Qeyd edək ki, rayonda təcili tibbi yardımın Ağstafa təcili yardım stansiyasına çevrilməsi zamanı da E.Məmmədovun vasitəsilə qohumları işə götürülüb. Bir sözlə, Ağstafa səhiyyəsi və həkimləri Elşad Məmmədovun kadrlarının və qohumlarının girovuna çevrilib və yeni baş həkim İlham Mustafayev onlarla demək olar ki, bacarmır. Ümidvarıq ki, Ağstafa səhiyyəsində baş alıb gedən özbaşınalıqlar yerli icra hakimiyyətini də, Səhiyyə Nazirliyini də nə vaxtsa maraqlandıracaq və onlar sözdən əməli işə keçərək ciddi islahatlara başlayacaqlar.

Mehdi