Həcər Pənahlı:” Mehman Sadıqova demək istəyirəm ki, əgər Nemətin başına hər hansı bir iş gəlsə, məhkəməyə birinci onu verəcəm”


Artıq 2 ildir ki, xalq hərəkatının liderlərindən olmuş Nemət Pənahlı həbsxanadadır. Hazırda Qobustan həbsxanasında saxlanılan N. Pənahlının saxlanma şəraiti olduqca pisdir. Yaxınları iddia edirlər ki, bu günə qədər saxlanıldığı həbsxanada təzyiqlərə, təhdidlərə məruz qalan Nemət Pənahlı yeni şantajlarla üz-üzədir. Həyat yoldaşı Həcər Pənahlı müxbirimizə Nemət Pənahlının saxlanıldığı kamerada ona qarşı olan təxribatçı hücumlarından danışdı. O, iddia edir ki, Nemət Pənahlının saxlanıldığı kameraya təxribatçı salınıb. Həmin təxribatçı hər gün onun Nemət Pənahlı ilə ciddi konflikt yaradır:“ Nemətin durumu həbsxanada həddindən artıq çətindir. Üç nəfərlik kamerada qalır. Qaldığı kameraya bir nəfər gətiriblər. Həmin şəxs də sırf Neməti narahat etmək üçün ora salınıb. Gündə bir problem yaradır kamerada. Nemət də deyir ki, həmin adamı bilərəkdən bu kameraya gətiriblər ki, mənə psixoloji təsirlər etsin. Dəfələrlə Nemətlə onun konfliktləri olub. Nemət buna görə rəisə də bir neçə dəfə müraciət edib. Amma müraciəti nəzərə belə alınmayıb.”



Həcər xanım dedi ki, həmin dustaq bilərəkdən N. Pənahlının üstünə qaynar su töküb (bu barədə yazmışdıq). Lakin bu fakta görə həbsxana rəhbərliyi heç bir tədbir görməyib: “Nemət deyir ki, oturduğum yerdə bir çaydan qaynar suyu üstümə tökdü. Tez davranıb, geri çəkildim. Şükür olsun ki, heç bir xəsarət almayıb. Bunların istədikləri odur ki, Nemət o adama nə isə xəsarət yetirsin. Bununla da onu məhkəməyə cəlb etsinlər.”

Həcər xanım həbsxana rəisinə, Ombudsman Aparatına , hüquq müdafiəçilərinə dəfələrlə müraciət etdiyini dedi: “Nemətə kamerada etdiklərinə görə bir neçə dəfə həbsxana rəisinə müraciət etmişəm. O da mənə deyir ki, get, hara istəyirsən şikayət elə. Mən heç kəsdən qorxmuram. Ürəyim nə istəyir, onu da edirəm. Hər dəfə məni Neməti öldürəcəkləri ilə bağlı şantaj edirlər. Gah deyirlər ki, hökumət Neməti öldürəcək, gah deyirlər ki, buradakı cinayətkar aləm Neməti öldürəcək. Hətta Ombudsman aparatına da bununla bağlı müraciət elədim. Bir nəfər də ora getmədi. Vəkili ilə görüş üçün kağız belə vermirlər . Vəkili 10-15 gündür ki, Nemətlə görüşməyə çalışır, amma imkan vermirlər. Bundan sonra hüquq müdafiəçilərinə müraciət etdim. Heç bir reaksiya gəlmədi.”

Həcər xanım Nemətə bir şey olsa, ilk olaraq Penitensiar Xidmətinin ictimaiyyətlə əlaqələr şöbəsinin müdiri Mehman Sadıqovu məhkəməyə verəcəyini dedi: “ Bir neçə gün bundan qabaq mətbuatda Penitensiar Xidmətin ictimaiyyətlə əlaqələr şöbəsinin müdiri Mehman Sadıqovdan Nemət Pənahlıya qarşı olan hücumların səbəbini soruşublar. O da deyib ki, belə bir şey yoxdur. Mən sizin qəzet vasitəsi ilə Mehman Sadıqova demək istəyirəm ki, əgər Nemətin başına hər hansı bir iş gəlsə, məhkəməyə birinci onu verəcəm. O deyir ki, heç bir konflikt yoxdur. Bu necə ola bilər? Nemətin başına daha gəlməyən iş qalmadı, necə yəni heç bir problem yoxdur. Təsəvvür edin ki, Nemət qalan kamerada qırğın olur , heç bir nəzarətçi o kameraya yaxınlaşmır. Nemət deyir ki, hər gün mənim üstümə hücum edirlər. Bütün günü məni şantaj edirlər ki, səndən şikayət edəcəyik ki, sən çox şikayətlənirsən. Onu cinayətkar aləmin öldürməsi ilə təhdid edirlər. Birbaşa rəis Neməti şantaj edir. Bundan əvvəl də bu cürə hədə-qorxular gəliblər. Deyiblər ki, sənə iynə vurub öldürəcəyik, yatdığın yerdə səni bıçaqlayacağıq. Gördülər ki, bu hədələr Nemətə təsir etmir, indi onu cinayətkarların öldürməsi ilə təhdid edirlər. Bütün bunların hamısına bir başa həbsxana rəhbərliyi nəzarət edir və hər şey də onların əli ilə həyata keçirilir.”

Həcər xanım sonuncu dəfə Nemət Pənahlı ilə 2 ay bundan qabaq görüşdüyünü vurğuladı: “Bizə 3 aydan bir görüş verirlər. Axırıncı dəfə iki ay bundan qabaq görüşmüşəm. İçəridə elə bir vəziyyət yaradıblar ki, heç vəkilinə imkan vermirlər görüşsün. Yazılı şəkildə Elçin Behbudova, mətbuat vasitəsi ilə prezidentə qədər müraciət etmişik. Bu dərəcədə qanunsuzluq olmaz axı. Hər şeyin də bir həddi, hüdudu var. Nemət orada hər gün deyir ki, ya məni buradan çıxardın, ya da onu, Nəticədə nə onu, nə də təxribatçını çıxartmırlar. Sadəcə yuxarıdan rəisə nə tapşırıq gəlir, o da onu icra edir.”


Fazil Mustafa:” Əfv məsələsi ancaq prezidentin səlahiyyətində olduğuna görə , biz deputatların rəyi nəzərə alınmır”


Daha sonra Nemət Pənahlının həbsxanadan azad olunmasına necə dəstək ola biərsiniz deyə, gənc vaxtlarında xalq hərəkatında onunla birgə iştirak etmiş deputatların fikrlərini öyrəndik. Böyük Quruluş Partiyasının başqanı, deputat Fazil Mustafa dedi:



“Mən Nemət Pənahlının azadlığa çıxması üçün lazım olan nə müraciət varsa, imzalamağa hazıram. Təəssüflər olsun ki, deputatların səlahiyyətində deyil ki, məhkəmə hökmü olan şəxsi zaminliyə götürsün. Bunun üçün tək çıxış yolu əfv siyahısına düşməsidir. Əfv məsələsi ancaq prezidentin səlahiyyətində olduğuna görə , biz deputatların rəyi nəzərə alınmır. Ona görə də bu bir qədər çətindir. Lakin bütün hallarda nəyə ehtiyac, zərurət varsa, biz buna imza atmağa hazırıq. Parlamentin növbəti iclaslarında da mən bu məsələni bir də qaldıracam. Yəni əlimdən nə gəlirsə, nə köməyə ehtiyac olsa, etməyə hazıram.”


İqbal Ağazadə:” Nemət bəyin azadlıqda olması üçün bacardığımı etməyə hazıram”




Ümid Partiyasının sədri, millət vəkili İqbal Ağazadə Nemət Pənahlının həbsxanadan azad olunması üçün nələrin edilməli olduğunu dedi. O, Nemət Pənahlının müdafiəsi üçün əlindən nə gəlirsə etməyə hazır olduğunu da açıqladı: “Mən məhbusların hüquqları ilə bağlı məşğul olmamışam. Ancaq mənim üzərimə nə düşərsə, Nemət bəyin azadlıqda olması üçün bacardığımı etməyə hazıram.”


Fərəc Quliyev: ”Prezidentə müraciət üçün imza toplansa, imzalamağa hazıram”




Milli Dirçəliş Hərəkatının lideri Fərəc Quliyev müxbirimizə bunları dedi: ”Nemət Pənahlının azad olunması ilə bağlı mənə hər hansı bir müraciət olsa, əlimdən gələni etməyə hazıram. Bundan əlavə, prezidentə müraciət olunsa, mən də imza ataram.”

Xatırladaq Ki, Xalq hərəkatının liderlərindən olmuş Nemət Pənahlı 2011-ci il yanvarın 8-də həbs edilib. O Cinayət Məcəlləsinin 221.3 maddəsi ilə (silahdan və ya silah qismində istifadə edilən əşyaları tətbiq etməklə xuliqanlıq) ittiham edilərək 6 il azadlıqdan məhrum edilib. Pənahlı həbsini siyasi sifariş adlandırıb və beynəlxalq təşkilatlar onu siyasi məhbus hesab edir. Əvvəllər 17 saylı cəzaçəkmə müəssisəsində saxlanılan Nemət Pənahlı “daxili nizam-intizam, davranış və saxlanma qaydalarına riayət etməməsi” səbəbindən, hazırda cəzasının qalan hissəsini Qobustan Həbsxanasında çəkir.