Kriminal aləmin tanınmış nümayəndələrindən olan, “Lotu Qoca” ləqəbli Əlibala Həmidovun qətlindən keçən müddət ərzində onun ölümü ilə bağlı əfsanələr həqiqətləri üstələyib. Oğru dünyasının səs-küylü digər cinayətləri kimi bu cinayətin da açılacağı və günahkarın cəzalandırlacağına ümid az olsa da, Əlibala Bakinskinin sirli ölümü ilə bağlı maraqlı versiyalara hər gün daha yeniləri əlavə olunur.

Məzar qalmaqalının izi ilə...

“Lotu Qoca”nın ölümü təkcə hadisəyə görə yox, həm də qətldən sonra baş verənlərlə gündəmə oturdu. Türkiyədən vətəni Azərbaycana gətirilərək, Bakıda dəfn edilən “Lotu Qoca”nın məzarı il bağlı yaranan qalmaqal diqqətləri qatildən qısa müddət də olsa, yayındıra bildi. Məsələ burasındadır ki, ilk informasiyalar “Lotu Qoca”nın 2-ci Fəxri Xiyabanda dəfn edildiyi yönündə oldu və təbii ki, ağıllara ilk olaraq ““Oğrular” artıq xiyabanları da fəth edir” düşüncəsi gəldi. O da maraqlıdır ki, BŞİH-nin Əhaliyə Vətəndaşlıq Xidməti Tresti bu barədə yayılan informasiyalardan ancaq AzNews.az sayəsində xəbər tutdu və ardınca oğru aləminin nümayəndəsinin İkinci Fəxri Xiyabanda yox, Dağüstü qəbiristanlıqda dəfn olunduğu bildirildi.

Burdakılara “Lotu Qoca”nı bu qalmaqal tanıtdı...

Bura Yasamal rayonunun 1995-ci ildə yaranan qəbiristanlıqlarından biridir. Başqalarından heç nə ilə fərqlənmir, bahalı məzar daşları, qəbirlər üzərində ucalan heykəllər, hasara alınmış məzar yerləri. Məzarlıqdakı qəbirlərin sayı barədə heç kəs məlumatlı deyil, amma “Lotu Qoca”nın adını eşidən kimi dərhal məzarın yeri nişan verilir. Səbəbi burdakılarin “Lotu Qoca”nı “qanuni oğru” kimi tanıması deyil. Özlərinin dediyinə görə, məhz Fəxri Xiyaban məsələsi ilə əlaqədar “Lotu Qoca”nın adı burda tez-tez çəkilib: “Ona görə tanıyırıq”.

Solmuş çələnglər və “qanuni oğru”nun polis məzar qonşusu

Beləcə “Lotu Qoca”nın qəbiristanlığın giriş qapısının yaxınlığındakı məzarına baş çəkirik. Ölümündən 40 gün keçsə də, hələlik məzar daşı qoyulmayıb. Məzar mərhumun gənc yaşında öldüyünü bildirən qırmızı parça ilə örtülüb, Yasamal uşaqlarından və “qardaşlar”dan göndərilən, solmuş çələnglər gözə dəyir. Bura yəqin ki, Həmidov ailəsinə məxsusdur. Hasara alınmış ərazidəki qəbirlərindən bəzilərinin üzərində Hacıyev soyadına və Əlibala adına rast gəlinir. Qəbiristanlığın işçisi Bayram Şıxəliyevin sözlərinə görə, ərazi doğrudan da Əlibala Həmidovun da mənsub olduğu ailəyə məxsusdur. Qəbiristanlıqda yerlərin belə “ailələşdirilməsinə” 90-cı illərin əvvəllərindən başlanılıb: “O zaman kim istəyirdi, ailəsi üçün burda yer götürüb ətrafını hasarlayırdı. Bizdə də müsəlmançılıqdı, bu ailənin yerində başqa bir adamı dəfn edə bilmərik. Məzar üçün bizə müraciət edəndə baxdıq ki, yer var, gətirib ölülərini dəfn etdilər”. Bizə elə gəlir ki, artıq burda başqa məzar yeri qazıla bilməz. Amma sən demə yanılmışıq. Həmsöhbətimiz dayandığımız yerdə azı 3-4 məzar yerinin də qazılmasının mümkünlüyünü bildirir və izahatının verməklə bizi inandırır. Uzun illər hüquq-mühafizə orqanları ilə problemlər yaşayan, həyatının neçə ilini həbsxanada keçirən “oğru”nun məzar qonşuları arasında polis əməkdaşı da var. Məzarının üzərində elə-beləcə də yazılıb: “SSRİ DİN-in əməkdar işçisi Rəşad Əskər oğlu Qurbanov”

“Başqa ölülərdən heç nə ilə fərqlənmədi”

Sağlığında kifayət qədər məşhur olan “Lotu Qoca”nın qəbir daşının 40 mərasiminə hazır olacağını düşünürdük. Məzarlığa də bizi çəkib gətirən bir az da nəylə qarşılaşacağımız - dəbdəbəli heykəl, yoxsa “qanuni oğru”lara xas sadəliyin şahidi olacağımızın marağı idi. Ancaq öyrənirik ki, bunu müəyyən etmək üçün gözləmək lazım gələcək: “Yasamalda baş daşı adətən ölünün ilinə hazır olur. Bu elə bil ki, Yasamalda adətdir. Yəqin ki, bu mərhumun da baş daşı o vaxta hazırlanacaq”. Ərazidəki məzar daşlarının qiyməti ilə maraqlanırıq-Bahalı mərmər baş daşılarının əzəməti uzaqdan bilinir. Deyilənə görə belə bir məzar daşı üçün 1000-1500 manat ödəmək lazım gəlir. Amma Lotu Qoca”nın baş daşı fərqli olacaq yoxsa yox, bunu heç ordakılar da bilmir. Aydındır ki, çox şeydən məlumatsızdırlar, məsələn baş daşının harada hazırlanacağı kimi.

Dəfin necə keçdiyi ilə maraqlanırıq. Bu maraq dəfn günü Bakıya ayrı-ayrı ölkələrdən kifayət qədər “kriminal qonağın” gəldiyi barədə məlumatları dəqiqləşdirmək olur. Doğrudur, məzarlıqda bunu inkar edirlər. Dediklərinə görə, başqaları necə “Lotu Qoca” da elə: “Başqa ölülərdən heç nə ilə fərqlənmədi. Hami kimi onu da gətirib burda dəfn etdilər, çıxıb getdilər. 40 mərasimində də gəlmişdilər. Yəqin ki, qohumları, yaxınları idi. Amma xüsusi fərqli heç nə görmədik. Heç bilmədik ki, qəbiristanlığın mollasını çağırdılar, yoxsa kənardan özləri ilə molla gətirdilər”.

Məzarlıqda Rövşən Lənkəranski müəmması

Bu qəbiristanlığın içində eşitdiklərimizdir. Çöldə isə başqa şeylər danışırlar. “Dəfnə gələn çox idi, səliqəli geyinmişdilər, bahalı maşınlar vardı. Hələ dedilər ki, maşınların çoxu bura gəlməyib, başqa yerdə saxlayıb ki, sayları çox görünməsin”. Dəfn günü və daha sonra ətrafda polis əməkdaşlarının olub-olmamasına gəlincə “Biz görmədik. Amma dedilər ki, gələnlər arasında “oğru”lar var, ona görə də mülki paltarda gələn polis əməkdaşları olub. Dəfn günü burda adam çox idi, amma heç bir hadisə baş vermədi”- bunu yaxınlıqda gül satışı ilə məşğul olan gənc deyir. Sonra da marağını saxlaya bilmir: “Deyirlər ki, onu Rövşən Lənkəranski öldürtdürüb, düzdür?” Hətta dediyinə görə, dəfnə gələnlər də öz aralarında bu barədə danışıblar. Təbii ki, onun sualına cavab verəcək qədər məlumata malik olmadığımızı onun diqqətinə çatdırıb, uzaqlaşırıq...