Yadigar Sadıqov həbsinin siyasi sifarişlə həyata keçirildiyini söylədi: “...peşman deyiləm”
Noyabrın 22-də Lənkəran rayon məhkəməsində hakim Elçin Kazımovun sədrliyi ilə Müsavat partiyası başqanının müşaviri Yadigar Sadıqovun işi üzrə məhkəmə prosesi davam etdirildi. İşdə adı zərərçəkmiş şəxs kimi keçən Rəşid Kərimov məhkəmə zalına polis əməkdaşlarının nəzarəti altında gəldi. Hakim mətbuat nümayəndələrinə fotoçəkiliş aparmağa icazə vermədi. Məhkəmə zalında da Rəşid Kərimovla zaldakılar arasında mübahisə də düşdü. Hakim zaldakılara və Rəşid Kərimova bir neçə dəfə xəbərdarlıq etdi. Zala şahid qismində Separadi kənd sakini Pərviz Cəfərov dəvət olundu. İttiham tərəfinin şahidi olan Cəfərov hadisə günü mübahisənin olduğu iddia edilən çayxanaya gəldiyini dedi. Bildirdi ki, çayxanaya qohumu Namiq Əsədovla çay içməyə gəlib. Şahid dedi ki, çayxanaya girəndən 5 dəqiqə sonra Yadigar Sadıqovla Rəşid Kərimovun mübahisəsi olub və onlar çayxanadan çıxıblar. Şahid qohumunun çayxanada oturduğunu, özünün isə mübahisə edənlərin ardınca çölə çıxdığını söylədi. Həmin vaxt tərəflərin tutaşdıqlarını görüb. Dövlət ittihamçısının suallarını cavablandıran şahid bildirdi ki, həmin vaxt Y.Sadıqovun əlində mobil telefon görüb, ərazidə 10-12 nəfər olub.

Y.Sadıqovun vəkili Xalid Bağırovun suallarının əksəriyyətinə “bilmirəm, savadsızam” cavabı verən şahid həmin gün yaşadığı kənddə toyda olması ilə bağlı suala “ola bilər ki, olmuşam” cavabını verdi. Şahid Y.Sadıqovun suallarına da cavab verdi. Bildirdi ki, Y.Sadıqovla R.Kərimovun mübahisə etdiklərini görüb: “Aramızda 45-50 metr məsafə vardı, təqsirləndirilənin əlində telefon vardı”.

Y.Sadıqov isə şahidə “45-50 metrdən əlimdə nə olduğunu necə bildin”sualını verdi. Şahid isə “qara bir şey idi” dedi. Y.Sadıqovun “bəlkə elə badımcan idi” replikası zalda gülüş doğurdu. Bundan sonra Y.Sadıqov şahiddən yalan ifadə verənlərin şərəfsiz və namussuz olması fikri ilə razılaşıb-razılaşmaması ilə maraqlandı. X.Bağırov da şahidə bir neçə sual verdi və hakimə üzünü tutaraq “şahid yalan danışır” söylədi. Bundan sonra Y.Sadıqov sərbəst ifadə verdi: “Həbs olunmağımdan il yarım əvvəl mənə deyilmişdi ki, səni şərləyib həbs edəcəklər. Mən müxalifətçilik təcrübəmdən bilirəm ki, komsomolda olanlar icra başçısı təyin olunanda müxalifətə münasibətləri kəskin olur. Arif Qaraşov da komsomolda olub. Ondan əvvəl keçmiş komsomolçu, Lənkəranın sabiq icra başçısı Zeynal Nağdəliyev də məni həbs etdirmək istəmişdi. Müavini şikayət yazmışdı ki, guya onu mitinqdə söymüşəm. Sonra Zeynal Nağdəliyevin yerini dəyişdilər, müavinin şikayəti də nəticəsiz qaldı. Taleh Qaraşovu Lənkərana icra başçısı təyin edəndə mənə dedilər ki, ehtiyatlı ol, səni həbs edə bilərlər. Onun Astarada olanda korrupsioner və rüşvətxor olduğunu eşitmişdim. Orada onu akula adlandırırdılar, bura balina kimi gəldi. Bura gələndən sonra ilk işi Müsavat Partiyası Lənkəran Rayon Təşkilatının ofisini əlimizdən almaq oldu. Bu ilin yanvarında Müsavat Partiyasının yubileyi idi. Biz yubileyi Lənkəranda da təşkil etdik. Partiyanın başqanı İsa Qəmbər və üzvləri Lənkərana gələndə qarşılarını kəsdilər. Belə təqdim etməyə çalışırdılar ki, guya Lənkəran camaatı müsavatçıların rayona gəlməsinə bu formada etiraz ediblər. Yanvarın sonlarında yubileyi yenidən keçirmək qərarı verdik. İsa Qəmbərin Lənkərana gəlməsinin qarşısını almaq üçün yolboyu bütün rayonların yol polislərini ayağa qaldırmışdılar. Lənkəranın Göyşaban dairəsinə bütün büdcə təşkilatlarının işçilərini yığmışdılar. Orada yubileyə gələn İsa Qəmbərin və müsavatçıların maşınlarını daş-qalaq etdilər. Bununla Lənkəran İcra Hakimiyyəti sübut etdi ki, bu işlərin arxasında onlar dayanıblar. Bundan başqa icra hakimiyyətinin şöbə müdiri Əlimərdan Əliyev mətbuata açıqlama verərək deyib ki, daş atmaq cinayətdir? Üstəlik İsa Qəmbərin Lənkərana təkrar gələcəyini eşidib həmin gün müsavatçıları da həbs etmişdilər. Bundan sonra icra başçısı ilə münasibətlərimiz kəskinləşdi. Bu adam Lənkəran üçün heç nə etmir. Bazarın ərazisində dükanlar tikdirib öz ata malı kimi sotu 1500 manatdan satır. May ayında çay bayramı keçirdi, yalandan da söz verdi ki, çayçılığı inkişaf etdirəcək. Ötən il Lənkəranda 18 min ton çay yığılıb. Bunu uğur kimi təqdim edirlər. Amma vaxt vardı ki, Lənkəranda ildə 145 ton çay yığılırdı. İndi çayçılığı inkişaf etdirmək mümkün deyil. Çünki icra başçıları torpaqları satıblar. Təkcə Arif Qaraşovdan söhbət getmir, ondan əvvəlkilər də elə torpaqları satıblar. Mən bu məsələləri mətbuatda yazırdım. Lənkəran Boradigah yolu pis gündədir, rayonda zibil dizə çıxır, pis vəziyyətdə olan məktəblər var. Mən bunlar haqda mətbuatda çıxış edirdim. Təbii ki, bu Arif Qaraşovun xoşuna gəlmirdi. İsa Qəmbərin müşaviri olmağım da həbsimin səbəblərindəndir. Mənə deyirdilər ki, ehtiyatlı ol. Mən də cavab verirdim ki, xalqın malını oğurlayan, talayan, korrupsioner məmur və ya xuliqan deyiləm ki, ehtiyatlı olum. Peşman da deyiləm”.

Bundan sonra Y.Sadıqov iyulun 25-də çayxanada baş verənlərdən danışdı. Bildirdi ki, çayxanada R. Kərimov onların oturduğu stola yaxınlaşaraq müxalifətin ünvanına nalayiq sözlər işlədib, həmin vaxt Fikrət Əhmədov onu sakitləşdirib. Y.Sadıqov və onunla olan Şahin Ağayev çayxananı tərk ediblər. Y.Sadıqov bildirdi ki, növbəti gün Dövlət Teleqraf Agentliyi olan “Azərtac” onun çayxanada kiminləsə mübahisə etməsi haqda məlumat yayıb. Y.Sadıqov bunu həbsinin siyasi sifarişlə həyata keçirilməsinə sübut olduğunu hakimin diqqətinə çatdırdı, ittihamın saxta olduğunu dedi.

Bundan sonra müdafiə tərəfinin şahidi Fikrət Əhmədov sərbəst ifadə verdi. Bildirdi ki, Y.Sadıqovla R.Kərimovun arasında heç bir dava olmayıb: “Bu adamlar çayxanada və küçədə bir-birinə 3 metrdən yaxın olmayıblar. Yəni bir-birilərinə xəsarət yetirə bilməzdilər”. Şahid dedi ki, R.Kərimov müxalifətçilərin ünvanına nalayiq sözlər işlədib, o da onu sakitləşdirməyə çalışıb.

Bundan sonra X.Bağırov bir neçə vəsatətlə çıxış etdi.

Vəkil ittiham tərəfinin şahidlərinin hadisə vaxtı çayxanada olmasını yoxlamaq üçün mobil operatorlara sorğu verilərək telefonlarının anten məlumatlarının alınmasını; məhkəmə tibb ekspertizasının rəyi ilə R.Kərimovun ifadəsi arasında ziddiyyət olduğundan ekspertin və müalicə həkiminin məhkəmədə dindirilməsini; müdafiə tərəfinin daha 3 şahidinin məhkəməyə çağırılmasını; R.Kərimov haqda təkrar ekspertiza keçirilməsini; müdafiə tərəfinə protokolla tanış olmağa şərait yaradılmasını və işdə olan qərarların surətinin verilməsini məhkəmədən xahiş etdi. Y.Sadıqov isə mətbuatda R.Kərimovun adından yayılan müraciətin müəllifi kimi Lənkəran Qarabağ Əlillər Cəmiyyətinin sədri Əbülfət Əliyevin dindirilməsi haqda vəsatət verdi. Hakim vəsatətlərə növbəti prosesdə münasibət bildirəcəyini dedi. Bundan sonra proses 4 dekabr saat 11:00-a kimi təxirə salındı.
Müsavat partiyası başqanının müşaviri, Lənkəran rayon sakini Yadigar Sadıqov bu ilin iyunun 27-də rayon polis şöbəsinə çağırılıb, dindirmədən sonra həbs edilib.
Yadigar Sadıqov, İyunun 25-də Lənkəran şəhər sakini 2-ci qrup Qarabağ əlili Rəşid Kərimovun şikayəti əsasında həbs edilib. R.Kərimov döyülməsi barədə rayon polis şöbəsinə müraciət edib. Yadigar Sadıqov Cinayət Məcəlləsinin 221.3 maddəsi ilə (xuliqanlıq, silahdan və silah qismində istifadə edilən əşyaları tətbiq etməklə törədildikdə) təqsirli bilinir. Bu maddə sübut olunsa təqsirləndirilən şəxsi 3 ildən yeddi ilədək həbs gözləyir.