Ayaz Orucova plana düşən obyektlərinə görə kompensasiya verilməsi məsələsi şübhəlidir
Bakıda Heydər Əliyev prospektinə alternativ yeni yolun çəkilməsi layihəsi çərçivəsində sökülən tikililərin arasında Qaçqınların və Məcburi Köçkünlərin İşi üzrə Dövlət Komitəsindəki (“Qaçqınkom”) vəzifəsindən çıxarılan deputatın da obyektləri var.

Virtualaz.org saytı xəbər verir ki, Beyləqandan deputat Ayaz Orucovun metronun “Koroğlu” stansiyasının ətrafında yerləşən obyektində də söküntü işləri gedir. Həmin binada deputatın “Hidromaşservis” şirkətinin ofisi, “İndesit” soyuducularının distribütor mərkəzi və “Espanyol mebel” salonu yerləşir.

Nəqliyyat Nazirliyindən sökülən obyektlərə görə deputata kompensasiya ödənilib-ödənilmədiyini dəqiqləşdirmək mümkün olmayıb. Nazirliyin mətbuat xidməti gün ərzində virtualaz.org saytının telefon zənglərinə cavab verməyib.

Lakin deputat Ayaz Orucovun mövqelərinin daha əvvəldən laxladığı nəzərə alınarsa, onun kompensasiya alması məsələsi şübhəli hesab oluna bilər.

Ayaz Orucovun biznes şəbəkəsi kifayət qədər genişdir. Onun biznes şəbəkəsinə “Hidromaş servis” QSC, “Espanyol mebel” və digər şirkətlər, o cümlədən Beyləqan rayonunda və Bakı ətrafında çoxsaylı restoranlar, mağazalar, mebel sexləri və s. daxildir. İtaliya markası olan “İndesit” soyudcularının Azərbaycandakı distribütorluğunu da deputatın şirkəti həyata keçirir. Həmçinin onun biznesinə digər məişət avadanlıqlarının ixracı və satışı daxildir.

A.Orucov bu ilin mayında “Qaçqınkom”un nəzdindəki Məcburi Köçkünlərin Sosial İnkişaf Fondunun direktoru vəzifəsindən çıxarılıb. Mətbuatda yayılan xəbərlərə görə, Qaçqınların və Məcburi Köçkünlərin İşləri üzrə Dövlət Komitəsinin sədri, baş nazirin müavini Əli Həsənovla onun arasında münaqişə olub və Ə.Həsənov deputatı iclasdaca işdən azad edib. Səbəb A.Orucovun rəhbərlik etdiyi fond tərəfəfindən həyata keçirilən tikinti layihələrində ciddi korrupsiyaya yol verilməsidir.

Virtualaz.org-a isə məlum olmuşdu ki, əslində A.Orucov prezident İlham Əliyevin qəzəbinə gəlib. Belə ki, prezident ötən ilin sonlarında Müşfiqabad yaxınlığında qaçqınlar üçün tikilmiş yaşayış binalarının açılışında iştirak edəndə tikintinin yarıtmaz aparıldığının şahidi olub. Dövlət başçısı cavabdeh məmurlardan hesabat tələb edib. Əli Həsənov isə tikintiyə baş nazir Artur Rəsizadəyə yaxın şəxs olan deputat Ayaz Orucovun məsuliyyət daşıdığını bildirib.

Mənbə bildirir ki, prezident baş nazirə bununla bağlı ciddi iradını bildirib. Daha sonra Ayaz Orucovun tikdirdiyi digər yaşayış binalarında da oxşar vəziyyətin hökm sürdüyü, tikintidə və mənzillərin təmirində ucuz materiallardan istifadə olunduğu, smeta sənədlərində isə qiymətlərin şişirdildiyi məlum olub.

Əli Həsənovun rəhbərliyi ilə keçirilən müşavirədə isə deputatla mübahisə bu məsələlərin üstündə baş verib.

Vəzifədən çıxarılandan sonra deputatın biznes imperiyasında da vəziyyət dəyişməyə başlayıb. İşçilərə əmək haqlarının ödənilməsində gecikmələr başlayıb, bir çox hallarda əmək haqları azaldılıb.