“Standard & Poor's” başı Fransa futboluna qarışan “Hafka”nın şirkətinin reytinqini endirdi və banklara böyük borcu yarandığını elan etdi

Nüfuzlu beynəlxalq reytinq agentliyi “Standard & Poor's” nəqliyyat naziri Ziya Məmmədovun və “Hafka” kimi tanınan iş adamı Hafiz Məmmədovun ortaq şirkəti olan “Baghlan Group”un uzunmüddətli kredit reytinqini endirib.
Agentlik bu barədə qərarını dekabrın 4-də açıqlayıb.

Agentliyin açıqlamasında deyilir ki, “Baghlan Group”un uzunmüddətli kredit reytinqi “B” səvisyyəsindən “B-“ səviyyəsinə endirilib. Həmçinin şirkətin “CreditWatch”da reytinqini ləğv edib. Bu reytinqə şirkət ötən ay mənfi proqnozla daxil edilmişdi.



Agentlik şirkətin kredit reytinqinin endirilməsini onunla izah edir ki, “Baghlan Group”da likvidliyin fəal idarəetməsi mövcud deyil və risklər qeyri-adekvat idarə olunur.

“2013-cü ilin oktyabrında “Baghlan” Azərbaycanın bank sistemində zəif ödəmə tendensiyası fonunda öz maliyyə öhdəliklərinin yerinə yetirilməsini texniki olaraq qeyri-müəyyən vaxta gecikdirib. Bizə məlum olduğuna görə, hazırda bütün ödəmələr faizləri ilə birlikdə ödənilib, hər hansı defolt və kross-defolt halı baş verməyib.

Bununla belə bu fakt göstərir ki, indiki halda “Baghlan” zəif inkişaf etmiş yerli bank sistemi qarşısında öhdəliklərini vaxtında yerinə yetirə bilmir” - deyə agentlik bildirir.

Agentlik onu da bəyan edir ki, “Baghlan” bu yaxınlarda 100 milyon manatlıq daşınmaz əmlak satıb, vəsaitin 40 milyon manatı alınıb, qalanı isə 2014-cü ildə alınmalıdır. Bu, şirkətə imkan verə bilər ki, likvidliyə yönəlmiş təzyiqləri qısa müddət üçün azaltsın.



Agentlik xəbərdarlıq edir ki, əgər şirkətin likvidlik göstəriciləri “Standard & Poor's”un kriteriyalarına uyğun olaraq “zəif” səviyyəsinə enərsə, reytinq daha da aşağı salına bilər.

Bununla belə, əgər “Baghlan” qısamüddətli borcunu təkrar maliyyələşdirə bilsə və başqa neqativ proseslər baş verməsə, agentlik onun reytinqini yenidən “stabil” səviyyəsinə qədər artıra bilər.

Qeyd edək ki, “Baghlan Group” tikinti, nəqliyyat, daşınmaz əmlak, o cümlədən neft məhsullarının daşınması və s. sektorlarda fəaliyyət göstərən çoxsaylı şirkətləri birləşdirir. Bu günlərdə şirkətin prezidenti Hafiz Məmmədov Fransanın “Canal+Sport” telekanalına müsahibəsində şirkətin necə uğurla fəaliyyət göstərdiyini sübut etmək üçün “Standard & Poor's”un “Baghlan”a “B” reytinqini (“Stabil”) verdiyini bildirmişdi.

Ancaq indi reytinqin endirilməsi şirkətin kredit almasını çətinləşdirəcək. Çünki şirkət yerli banklar qarşısında öhdəliklərini vaxtında yerinə yetirə bilmir.