Səidə Qocamanlı: “Ümid edirik...”
Hər il olduğu kimi, Yeni il bayramı ərəfəsində əfv fərmanının veriləcəyi gözlənilir. Artıq bununla bağlı mediada xəbərlər, rəylər dərc olunur.
Mövzu ilə bağlı hüquq müdafiəçisi Səidə Qocamanlı ilə danışdıq. O, əfvlə bağlı hələ məlumat olmadığını dedi:



“Adətən hər yeni il bayramında əfv olurdu. Amma bu il hələlik əfvlə bağlı nədənsə heç bir söz-söhbət yoxdur. Ümid edirik ki, əfv olacaq. Həm Yeni il bayramı qabağı, həm AŞ PA-nın sessiyası qabağı ümid edirik ki, əfv olsun. Ancaq dəqiq heç nə deyə bilmərəm. Bununla bağlı daha dolğun məlumatı Əfv Komissiyasından öyrənə bilərsiniz. Ancaq əfv etmək səlahiyyəti ölkə prezidentinə məxsusdur. Məhkəmə qərarı olmuş şəxslər əfv siyahısına düşürlər. Ola bilsin ki, heç məhkəmə qərarı olmayanlar da əfv olunsun. Çünki bu səlahiyyət tam olaraq ölkə başçısına aiddir”.



Hüququ müdafiəçisi Novella Cəfəroğlu ölkə xaricində olduğu üçün onunla danışa bilmədik. Amma o, mövzuya dair bugünlərdə “Yeni Müsavat”a bunları demişdi: “Dekabrda əfv fərmanı olacaq. Buna ümid edirik. Həm Dünya Azərbaycanlılarının Həmrəylik Günü, həm Yeni il münasibətilə əfv olacağını gözləyirik. Buna çox böyük ümidlər var". N.Cəfəroğlunun sözlərinə görə, siyasi məhbusların azadlığa çıxacağına böyük ümidlər var: "Əfv olmalıdır. Qurban bayramında əfv verildi. İnanırıq ki, dekabrın sonunda da əfv olacaq".

Sonuncu əfv fərmanı Qurban bayramı ərəfəsində verilib. N.Cəfəroğlunun da təmsil olunduğu Hüquq Müdafiə Təşkilatlarının Monitorinq Qrupunun Əfv Komissiyasına təqdim etdiyi siyahıdan 2 məhbus azadlığa çıxmışdı. Onlar sabiq iqtisadi inkişaf naziri Fərhad və qardaşı Rafiq Əliyev olub. Ümumilikdə 150 dustaq ailəsinə qovuşub.

Dekabr əfvində isə Müsavat başqanının müavini, yazarımız Tofiq Yaqublu, REAL hərəkatı lideri İlqar Məmmədov, NİDA-çılar, islamçılar, o cümlədən “Tolışi Sədo” qəzetinin baş redaktoru Hilal Məmmədovun, hüquq müdafiəçisi İlham Əmiraslanovun azadlığa çıxacağına ümid var. Həmçinin Nemət Pənahlı da azad oluna bilər.

Eyni zamanda sabiq səhiyyə naziri Əli İnsanovun bu dəfə azadlığa çıxacağı gözləntiləri var. Avropa Məhkəməsi onun barəsində qərar çıxarıb, Azərbaycan hökuməti isə qərarı icra etmir. Ali Məhkəmənin Plenumunda sabiq nazirin işinə baxılıb və qərar qüvvədə saxlanıb. Ə.İnsanov isə həbsdən iqtidara “əfv yazmayacağam” deyə cavab göndərib.