27 saylı Qazax Yol İstismar İdarəsinin rəisi “Azəryolservis” rəhbərinin dəstəyindən necə bəhrələnir?

gundemxeber.az Ölkədə ən çox vəsait ayrılan sahələrdən biri də yol tikintisidir. Yol infrastrukturuna ayrılan vəsaitin isə açıq-açığına mənisənilməsi hamıya bəllidir. Deyilən məsələlərlə əlaqədar Qazax rayonu da həlli məlum olan, lakin tədbir görməkdə çox böyük çətinliklərlə üzləşən “dərd” içərisindədir. Söhbət 27 saylı Qazax Yol İstismar İdarəsindən gedir. Hazırda bu idarənin rəisi, özünün dediyi kimi “Azəryolservis” ASC-nin sədri Cavid Qurbanovun xalası oğlu Həsən Hadıyevdir. İstər adıçəkilən idarənin işçiləri, istərsə də rayon sakinləri arasında Hadıyevin nənəsinin erməni mənşəli olması haqda söz gəzir. 5 ilə yaxındır ki, yollara “divan” tutan rəis eləcə də idarəyə “gün verib, işıq vermir”. Rayon əhalisi o idarəni “yox” kimi təsəvvür edir.
Cəmi 75 nəfərə yaxın işçisi olan idarədə 20-25 nəfər gözə dəyir. İdarəyə mənsub asfalt zavodu uzun müddətdir ki, sahibsizlik ucbatından işləmir. Bakı-Ələt-Qazax-Gürcüstan magistral yolunun 27 Saylı Qazax Yol İstismar İdarəsinə aid hissəsi biabırçı vəziyyətdədir. Aldığımız məlumata görə, ayda 30-40 min manatlıq iş həcmi göstərilən təşkilatda rəhbər işçilərin də sayının çoxluğu istər-istəməz adamı narahat edir. Məsələn, 2 ilə yaxındır ki, Həsən Hadıyevlə sövdələşməsi nəticəsində idarəyə keyfiyyət üzrə mühəndis gətirilmiş Kamil Şahvələdovun işinin adı olsa da, özü yoxdur. Bəs onda Kamil Şahvələdov nə üçün 200 manata yaxın əməkhaqqı almalıdır? Sürücü və mexanizatorların ayda 3-5 iş günü olduğu halda bütöv maaşı necə alırlar? “Yox” kimi tanınan, lakin böyük yeyinti yuvasına çevrilmiş yol istismar idarəsində bu qədər işçidən cəmi 7 fəhlə gözə dəyir. Onlar da Qazax şəhərinin keçmiş “Məşəl” adlanan sahəsində və bu il ucaldılmış bayrağın ətrafında süpürgəçiliklə məşğuldurlar. Əksəriyyət onları komuxozun işçiləri bilirlər. İdarədə işləyən bir nəfərin söylədiyinə görə, rəis ay ərzində 6-7 min manat rahatca əmək haqqıdan qazanır. Qəribə burasıdır ki, hələ idarədə pullar kart vasitəsilə verilmir. İşləyənlər ola-ola rəis işləməyənlərin adlarına əməkhaqqı yazdırır. Həm də idarədə gündəlik heç bir maşına yol vərəqəsi yazılmadığı halda ayın axırında kifayət qədər yanacaq silinir. İş o yerə çatıbdır ki, 27 saylı yol istismar idarəsinin asfalt zavodu işləmədiyi halda, idarəyə mənsub maşınlar yaxınlıqda “Gilan” şirkətinə mənsub zavoddan asfalt daşıyaraq şəxsi sifariş olan yerlərə aparırlar. Üstəlik əməkhaqqı isə Həsən Hadıyevin idarəsindən yazılır.
Mənbənin verdiyi məlumata görə, icra edilmiş 2 nömrəli forma baş idarə tərəfindən yoxlanılmır. Rəis işçiləri qarşısında onu da “alnı açıq, üzü ağ” söyləyir ki, “bir adamın ki, xalası oğlu böyüyü olsun, kimin qeyrəti çatıb idarəni yoxlaya bilər? Ona görə də, mən bura gələcək yoxlamalarla qonşu Ağstafadaca görüşüb, oradan da geri yola salıram”. Araşdıranda Həsən Hadıyevin sözlərində həqiqət olduğu üzə çıxır. O da məlumdur ki, Həsən Hadıyev Qazaxda ay ərzində 10-15 dəfə olur. Qalan günlərini isə Bakıda və digər yerlərdə keçirir. Həmişə də səhhətinin pisliyindən şikayətlənir.
Yəqin ki, mövzu ilə tanış olan aidiyyəti qurumlar bu biabırçı vəziyyətə biganə qalmazlar.
Mövzunu diqqətdə saxlayacağıq. Qarşı tərəfin də mövqeyini dərc etməyə hazırıq.

Ələddin Kəsəmənli