Ərdoğanın ərəb ortağı xaricə qaçdı

Türkiyədə İstanbul cümhuriyyət prokuroru Muammer Akkaş tərəfindən aparılan istintaqın nəticəsi olaraq barələrində həbs qərarı çıxarılan, lakin polisin prokurorun sanksiyasına tabe olmaması üzündən həbs edilməyən şübhəlilərin siyahısı açıqlanıb.

Virtualaz.org xəbər verir ki, Akkaşın 41 nəfərlik siyahısı qəzetlərdə yayılıb və siyahıda yer alanların əksəriyyəti baş nazir Ərdoğana, o cümlədən AKP hökumətinə yaxın iş adamları, habelə məmurlardır.

Siyahının əvvəlində baş nazir Rəcəb Tayyib Ərdoğana yaxın olan ərəb iş adamı, vaxtilə BMT Təhlükəsizlik Şurasının “Əl-Qaidə”ni maliyyələşdirən şəxslər siyahısına salınan Yasin Əl Kadi yer alır. Siyahıda Usama Kutub adlı digər ərəb iş adamı da var. Dekabrın 25-də prokurorun sanksiyası İstanbul ədliyyəsinə göndərilsə də icra edilməyib. Həmçinin 17 dekabr həbslərindən sonra polisə verilən yeni təlimat əsasında sözügedən cinayət işi barədə yuxarı instansiyalara məlumat verilib. Bildirilir ki, məlumatın sızdırılması nəticəsində Yasin əl Kadi və Usama Kutub Türkiyədən qaçıblar.

Məlum olur ki, şübhəlilərin yaxalanması üçün polislə yanaşı jandarmaya da təlimat göndərilib. Lakin jandarma da prokurorun əmrinə tabe olmayıb. Akkaşın siyahısında yer alan 41 şübhəli şəxsə qarşı gəlir əldə etmək məqsədilə mütəşəkkil cinayətkar təşkilat qurmaq, bu təşkilata üzv olmaq, təhdid, rüşvət və nüfuz alveri, tenderlərə hiylə qarışdırılması, cinayət yolu ilə əldə edilən əmlakın “yuyulması”, rəsmi sənədləri saxtalaşdırmaq kimi çoxsaylı ittihamlar irəli sürülür. Bu siyahıda baş nazirin oğlunun adı yoxdur. Lakin prokuror Bilal Ərdoğana şübhəli şəxs qismində istintaqa ifadə vermək üçün çağırış göndərib, çağırışda qeyd olunub ki, şübhəli istintaqa könüllü gəlməsi onun barəsində həbs qərarı çıxarılacaq.



* * * 15:35

Bu arada Ərdoğanın barəsində həbs qərarı verilən oğlunun Türkiyəni tərk etdiyinə dair yeni iddia yayılıb.

“Haberozel.org” saytında yer alan məlumata görə Bilal Ərdoğan barəsində həbs qərarının verildiyini öyrənən kimi ölkəni tərk edib. Saytın yazdığına görə Bilal Azərbaycana gedib. Xəbərdə iddia olunur ki, onu Azərbaycanda görənlər olub. Hələlik baş nazirin ailəsi və Bilal Ərdoğan özü mətbuata açıqlama vermir.

* * * 13:25

“Habertürk” qəzetinin yaydığı xəbərə görə, ikinci rüşvət və korrupsiya əməliyyatı həbslər həyata keçirilməsə də artıq başlayıb.

Hakim Süleyman Karaçölün qərarı ilə AKP-yə yaxın bir qrup iş adamının əmlakına həbs qoyulub. Bura Mustafa Latif Topbaş, Cemal Kalyonçu, Ömer Faruk Kalyonçu, Mehmet Çingiz, “Kalyon Group” un tərkibindəki “Zirve Holdinq” və digər şirkətlər, iş adamları daxildir. “Zirve Holdinq” bu günlərdə “Sabah” qəzetini və ATV telekanalını almışdı.

Hakimin qərarında deyilir ki, sözügedən şəxslərin barələrində rüşvət, korrupsiya, çirkli pulların yuyulması ilə bağlı ciddi şübhələr olduğundan ehtiyat tədbiri kimi onların əmlaklarına həbs qoyulur.

* * * 12:54

Türkiyədə hökumət tərəfindən qarşısı alınan ikinci korrupsiya və rüşvət həbsləri üçün hazırlanan ittihamın sensasion detalları mətbuata sızdırılıb.

Virtualaz.org saytı Türkiyə qaynaqlarına istinadən xəbər verir ki, bu ittiham dosyesi dekabrın 25-də ikinci həbs dalğasını başlatmaq istəyən və 30-dan çox tanınmış şəxsin barəsində həbs sanksiyası çıxaran İstanbul cümhuriyyət prokuroru Muammer Akkaşın əlindən alınıb.

Prokuror dekabrın 26-də jurnalistlər qarşısına çıxaraq yazılı bəyanat paylayıb və elan edib ki, İstanbul polisi onun çıxardığı həbs sanksiyalarını yerinə yetirməkdən imtina etməyib.

İstanbulun baş prokuroru Turan Çolakkadı isə 100 milyard dollarlıq korrupsiya dəlillərinin yer aldığı dosyeni onun əlindən alıb.



Muammer Akkaş “Ergenekon” həbslərinə sanksiya verənlərdən biridir və belə görünür ki, o, Fətullah Gülənə bağlıdır. M.Akkaşın bəyanatının ardınca Turan Çolakkadı da bəyanat verərək bildirib ki, prokuror yalan deyir. Onun sözlərinə görə, cümhuriyyət prokuroru özbaşına həbslər apara bilməz və Akkaşın başlatdığı istintaqda toplanan dəlillərin nə dərəcədə ciddi olduğu hələ araşdırılmalıdır.

Bu qarşıdurmanın ardınca ikinci korrupsiya dosyesinin sensasion detalları Fətullah Gülənə yaxın mediaya, habelə CHP-yə yaxın qəzetlərə sızdırılıb. Məlum olub ki, Akkaşın həbsinə sanksiya verdiyi şəxslərdən biri də baş nazir Rəcəb Tayyib Ərdoğanın oğlu Bilal Ərdoğandır.

Qəzetlər M.Akkaşın Bilal Ərdoğan barəsində çıxardığı həbs sanksiyasının surətini yayıb. Məlum olub ki, baş nazirin oğlunun adı istintaqda şübhəli şəxs kimi keçir. Ərdoğanın oğlu hazırda həbsdə olan iş adamlarının milyonlarla dollar pul köçürdüyü TURGEV adlı fondun rəhbərliyində yer alır.



Bəzi qəzetlər barəsində çıxarılan sanksiyanın sızdırılmasının ardınca baş nazirin oğlunun xarici ölkələrdən birinə qaçdığı iddia edilib. “Cümhurriyet” qəzetinin xəbərində isə deyilir ki, Bilal Ərdoğan qaçmayıb və hazırda atasının İstanbuldakı evindədir. Həmin mülk baş nazirə məxsus olduğu üçün toxunulmazlıq statusu var və polis ora daxil olub əməliyyat keçirə bilməz.

Bundan əvvəl baş nazir Ərdoğan 17 dekabrda başladılan həbs əməliyyatının əsas hədəsinin o özü və oğlu olduğunu demişdi. Ərdoğanın sözlərinə görə, polis həbs olunan şəxslərdən Bilalın əleyhinə ifadə almaq istəyir. Lakin baş nazir bildirmişdi ki, onun oğlunu həbs etmək istəyənlər “ovuclarının içini yalayarlar”.

Hələlik baş nazirin oğlunun həbsi əməliyyatı baş tutmasa da Bilal Ərdoğan barəsində çıxarılmış sanksiyanın mətbuata yayılması AKP-nin hakimiyyətini daha da sarsıtmış olur.

Bu arada Ərdoğana yaxın dinçi qəzetlərdən biri yazıb ki, yaxın günlərdə Fətullah Gülənin şəbəkəsi AKP-dən 30-40 millət vəkili də daxil olmaqla bir çox tanınmış şəxsin intim videolarını yaymaqla təhdid edərək onları istefaya məcbur edəcək. Mənbə bildirir ki, Fətullah Gülənin əlində böyük həcmdə videokompromatlar var.