Prezidentin sakinlərə verdiyi evləri başqalarına satıblar
Xəbər verdiyimiz kimi, 2010-2011-ci illərdə Salyan rayonunun “Plasmas” qəsəbəsində 150-ə yaxın ev inşa edilərək imkansız sakinlərə verilmişdi. Bütün sənədləri ilə birlikdə sakinlərə verilən evlər təmirsiz olduğundan imkansız əhalinin xeyli hissəsi orada məskunlaşa bilməyib. Sakinlərin icra strukturlarına müraciəti də bir nəticə verməyib. Həmin vaxt ölkə başçısı İlham Əliyevin rayona səfərini nəzərə alaraq bir neçə evi təmir etmişdilər. Təmir edilən evlər sakinlərin deyil, rayon rəhbərliyində təmsil olunan şəxslərin evləri olub. İddialara görə, icra başçısının birinci müavini Etibar Hüseynovun orada bir neçə evi var. Bir neçə ay öncə rayonun mərkəzində sökülən yataqxananın sakinlərinə həmin şəhərcikdəki boş evlər göstərilib ki, guya onlara bu şəhərcikdən ev veriləcək. Halbuki, həmin şəhərcikdəki evlərin hamısının sənəd əsasında sahibi var. İcra hakimiyyətindən yataqxana sakinlərinə bir neçə evin ünvanı göstərilib ki, ora “hücum” etsinlər. Hətta onlara həmin evlərə qapını qırmaqla keçmələrinə də icazə verilib. Yataqxana sakinləri 1 həftə öncə “hücum” reallaşdırıblar.
Evlərin qanuni sakinlərinə İcra hakimiyyətindən bildiriblər ki, evinizə qanunsuz daxil olanlarla bağlı polisə müraciət edin. Hətta deyilib ki, gedin, həmin sakinləri evinizdən qovub çıxarın. Bu isə rayonda qarşıdurmanın yaranmasını istisna etmir. Polis idarəsindən isə sakinlərə deyiblər ki, bu məsələləri rayon icra hakimiyyəti həll edir. Bir sözlə, sakinləri yollarda yorurlar.
Məsələni araşdıran gunxeber.com Salyan Rayon İcra Hakimiyyətinin İnformasiya Təminatı və Təhlil Sektorunun müdiri Kərəm Muradovla əlaqə saxlayıb. K.Muradov bildirib ki, bu məsələlər onun səlahiyyətində olmadığından şərh verə bilməz. Digər strukturlara müraciət də nəticə verməyib.
Məsələ ilə bağlı günxəbər.comun məlumatında deyilir ki, evlərə “basqın” edən şəxslər sənədləri olmadığına görə kommunal xidmətlərdən istifadə edə bilməyiblər. Ona görə də rayon icra hakimiyyətinə müraciət ediblər. Salyan rayon icra hakimiyyətinin Salyan şəhər üzrə nümayəndəsi Kamil Əzizov sakinlərin evlərinə qanunsuz girən şəxslərə icazə sənədi verib ki, kommunal xidmətlərdən istifadə edə bilsinlər. Evlərin qanuni sakinləri Kamil Əzizova narazılıqlarını bildirəndə o deyib ki, “yuxarıdan” əmr belə gəlib. K.Əzizov qeyd edib ki, narazı sakinlərin digər dövlət orqanlarına müraciətinin heç bir əhəmiyyəti yoxdur: “Hətta mətbuatda da işıqlandıra bilərsiz. Bu, bizim işimizə təsir edə bilməz. Sənədləri mən verirəm, mənə isə əmri icra başçısı verib”.
Evləri əllərindən alınan sakinlər bildiriblər ki, bu evlər onlara prezident tərəfindən verilib: “Evimiz olmadığı üçün prezident İlham Əliyevə müraciət etmişdik. Prezidentin qərarı əsasında bizə evlər verildi. İndi isə o evlər necə verilmişdisə, elə də alındı. Görünür, prezidentin verdiyi qərarlar Salyanda keçərli deyil. Biz məsələ ilə bağlı cənab prezident İlham Əliyevə şikayət məktubu ünvanlayacağıq. Qoy, rayondakı özbaşnalıqdan xəbəri olsun”.

Fariz