Bakı Metropoliteninin göstərişi ilə bu gün Binəqədi rayonu, Rəsulzadə qəsəbəsi, 3126-cı məhəllədə evlərin söküntüsünə başlanılıb.

Ərazidə yaşayan məcburi köçkün Nailə Surxay qızı Şəfiyeva virtualaz.org saytına bildirib ki, əraziyə Bakı Metropoliteninin rəis müavini, vəzifəli şəxslər, eləcə də 40-a yaxın polis toplanıb. Bundan əlavə, buldozerlər, yük maşınları gətirilib: “Hazırda danışıqlar aparılır. İlk olaraq yerli sakinlərin evləri sökülür. Metropoliten əməkdaşları sökülən evlər üçün kompensasiya ödənildiyini deyirlər. Amma sakinlər verilən kompensasiya ilə razı deyil. Onlar pulun artırılmasını tələb edirlər”.

Sakinlərin etirazlarına baxmayaraq evlərin söküntüsünə başlanılıb. Lakin məcburi köçkün ailələrinin evlərinin söküntüsü dayandırılıb.

N.Şəfiyeva dedi ki, hazırda mənzillərin sökülməsi üçün Bakı Metropoliteninin qərarından Ali Məhkəməyə edilən şikayətə baxılır: “Məhkəmənin necə qərar verəcəyini gözləməyi tələb etdik. Buna görə də evlərin qərardan sonra söküləcəyini dedilər”.

Məcburi köçkünlər isə kompensasiya verilmədən evlərinin sökülməsinə icazə verməyəcəklərini deyirlər: “Hamı kimi biz də evlərin tikintisinə pul vermişik, hansısa obyektə özbaşına girib məskunlaşmamışıq. Yerli sakinlərə kompensasiya ödənildiyi kimi bizə də evlərin qiymətləndirilərək kompensasiya ödənilməsini tələb edirik. Bakı Metropoliteni Qaçqın və Məcburi Köçkünlərin İşləri üzrə Dövlət Komitəsinə pul ayrıldığını deyir. “Qaçqınkom” isə 100-150 min manatdan çox xərclədiyimiz evlərimizin müqabilində bizə müvəqqəti məskunlaşmağımız üçün ikiotaqlı ev verir. Sakinlər arasında ayrı-seçkilik qoyurlar. Əgər ərazi depoya aiddirsə və ya evlər qanunsuz tikilibsə, bizdən sonra mənzil tikənlərə niyə kompensasiya verilir, bizə isə yox? Mənim oğlum sülhməramlı qoşunların tərkibində İraqda döyüşərək ev tikdirib. İndi həmin evi yerlə-yeksan edirlər”.

Qeyd edək ki, 36 qaçqın ailəsi həyatı bahasına olsa da evlərindən çıxmayacaqlarını açıqlayıblar.

Ülviyyə Xudiyeva