İqtisadiyyat və Sənaye Nazirliyinin Antiinhisar Siyasəti və İstehlakçıların Hüquqlarının Müdafiəsi Dövlət Xidməti Bakıda qanunsuz kolbasa istehsalı faktları aşkarlayıb.

Dövlət Xidməti “Orxan SS” istehsal-kommersiya firmasına məxsus olan, Bakı şəhəri, Xətai rayonu, Süleyman Əhmədov küçəsi, ev 2B ünvanında yerləşən istehsalat sahəsində aparılmış yoxlama zamanı müəssisə tərəfindən bilərəkdən yalan reklamlar yayımlanmaqla və məhsulların markalanmasında düzgün olmayan məlumatlar verilməklə istehlakçıların çaşdırılmasına yol verildiyini müəyyən edib.

Nazirlikdən virtualaz.org saytına verilən məlumatda deyilir ki, müəssisə tərəfindən istehsal olunan “CF” və “Kristal” əmtəə nişanlı ət məhsullarının avtonəqliyyat vasitələrində yayımlanan reklamlarında və həmin əmtəə nişanlı “Baranina”, “Krakovskaya”, “Servelat Xəzər”, “Kristal həvəskar”, “Ukrainskaya kopçennaya” kolbasalarının və “Təndir” sosiskasının etiketində məhsulların halal olması ilə bağlı ifadələrin verildiyi halda müəssisədə halal ət məhsullarının istehsalı üçün müvafiq şəraitin olmadığı və həmin məhsulların tərkibində donuz əti və piyi olan məhsullarla eyni istehsalat sahəsində istehsal olunduğu müəyyən edilib.

Xəbərdə qeyd edilib ki, “Ukrainskaya kopçennaya” kolbasasının resepturasında və etiketində məhsulun tərkibində donuz ətinin olduğu göstərildiyi halda həmin məhsulun etiketində məhsulların halal olması bağlı ifadələrin verildiyi, “Servelat” kolbasasının resepturasında məhsulun tərkibində donuz əti və donuz piyi nəzərdə tutulduğu halda məhsulun etiketində bu məlumatın gizlədildiyi aşkar edilib.

Eyni zamanda “Baranina”, “Kristal həvəskar”, “Servelat Xəzər”, “Doktorskaya”, “Krakovskaya”, “Oxotniciye”, “Pəhriz”, “Servelat” və “Solyami” kolbasaları və “Təndir” sosiskalarının istehsalında camış ətindən istifadə edildiyi halda məhsulun mal ətindən istehsal edildiyi barədə yalnış məlumatların verildiyi müəyyən olunub.

Qanun pozuntusuna yol vermiş “Orxan SS” istehsal-kommersiya firması barədə qanunvericiliyə uyğun olaraq müvafiq tədbirlər görüləcək.

Ülviyyə